ភ្នំពេញៈ កូដករក្រុមហ៊ុនណាហ្គាវើលដ៍ប្រមាណ ១០០ នាក់ នៅថ្ងៃទី ២០ មិថុនា បានដាក់ញត្តិនៅខុទ្ទកាល័យលោកនាយករដ្ឋមន្ត្រី ហ៊ុន សែន និងរដ្ឋសភា ដើម្បីស្វែងរកកិច្ចអន្តរាគមន៍ បញ្ចប់វិវាទការងារបន្ទាប់ពីវិវាទការងារនេះត្រូវបានអូសបន្លាយរាប់ខែមកហើយ ខណៈក្រសួងការងារបានសម្របសម្រួល កិច្ចចរចាចំនួន ១៣ លើករួចមកហើយនៅតែមិនទាន់មានដំណោះស្រាយនៅឡើយ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ដែលដឹកនាំក្រុមកូដករនោះថ្លែងថា អស់រយៈពេល ៦ ខែហើយ ដែលកម្មករណាហ្គាវើលដ៍ បានចេញធ្វើកូដកម្មហើយវិវាទនេះ គឺអូសបន្លាយពេលវេលាយូរ ទោះបីមានការផ្សះផ្សានៅក្រសួងការងារច្រើនលើក ក៏នៅមិនទាន់ឈានដល់ចំណុចណាមួយដែលភាគីទាំងសងខាងអាចទទួលយកបានទេ។
កញ្ញាបន្តថា ដូចនេះក្រុមកូដករមានតែផ្តល់ក្តីសង្ឃឹមលើលោកនាយករដ្ឋមន្ត្រី ក្នុងការផ្តល់កិច្ចអន្តរាគមន៍លើរឿងនេះ។ កញ្ញាបន្តថា ក្នុងញត្តិនោះបានស្នើអន្តរាគមន៍ ចំនួន ៣ ចំណុចសំខាន់ៗ ទី១ ស្នើសុំអន្តរាគមន៍ទៅលោកនាយករដ្ឋមន្ត្រី ឱ្យជួយដោះស្រាយបញ្ហានេះ ដោយឱ្យក្រុមហ៊ុនទទួលយកអ្នកដែលនៅសេសសល់ជិត ២០០ នាក់ ត្រឡប់ចូលធ្វើការវិញ។ ទី២ សម្រាប់អ្នកដែលឯកភាពទទួលយកសំណង ស្នើសុំឱ្យអន្តរាគមន៍ទៅក្រុមហ៊ុនទូទាត់តាមផ្លូវច្បាប់ និងទី៣ ស្នើឱ្យទម្លាក់បទចោទទៅលើថ្នាក់ដឹកនាំ និងសកម្មជនសហជីពទាំង ១៥ នាក់ ដែលត្រូវបានចោទប្រកាន់កន្លងមករហូតដល់មានការឃុំខ្លួន។
កញ្ញាបញ្ជាក់ថា៖ «ពួកយើងមកទីនេះជាមួយនឹងក្តីសង្ឃឹម បើគ្មានក្តីសង្ឃឹមក្នុងដំណោះស្រាយទេ គឺយើងមិនមកទេ ពីព្រោះយើងឃើញថា មុននឹងស្នើសុំអន្តរាគមន៍ពីសម្តេច យើងប្រើគ្រប់វិធី គ្រប់យន្តការ និងមានការចូលរួមពីស្ថាប័នផ្សេងៗ ប៉ុន្តែនៅមិនមានដំណោះស្រាយ។ អ៊ីចឹងយើងមើលឃើញថា ដល់ពេលវេលាគួរសមដែលមើលឃើញថា មានតែសម្តេចទើបដោះស្រាយបញ្ហានេះបាន ព្រោះយើងមើលឃើញស្ថាប័នផ្សេងៗគឺភាគច្រើនលម្អៀងទៅខាងនិយោជក មើលទៅគ្មានស្ថាប័នណាផ្សេងក្រៅពីសម្តេចទេ ដែលអាចអន្តរាគមន៍ដោះស្រាយរឿងនេះបាន»។
លោក គង់ ចំរើន មន្ត្រីខុទ្ទកាល័យលោក ហ៊ុន សែន បានចេញមកទទួលញត្តិ ប៉ុន្តែពុំបាននិយាយអ្វីនោះទេ។ បន្ទាប់ពីដាក់ញត្តិនៅខុទ្ទកាល័យលោកនាយករដ្ឋមន្ត្រី ក្រុមកូដករទាំងនោះបានបន្តដើរទៅដាក់ញត្តិនៅរដ្ឋសភាទៀត។ ជាការកត់សម្គាល់ការដាក់ញត្តិនេះ មិនមានការរារាំងពីកម្លាំងសមត្ថកិច្ចនោះទេ ស្របពេលដែលមានការចូលរួមឃ្លាំមើលពីអង្គការសិទ្ធិមនុស្សជាតិ និងឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា។
ភ្នំពេញ ប៉ុស្តិ៍ មិនទាន់អាចសុំការអត្ថាធិប្បាយពីលោក ទេស រុក្ខាផល អង្គលេខាធិការរងនៃអគ្គលេខាធិការដ្ឋានគណៈកម្មការ សម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា នៃក្រសួងការងារបាននៅឡើយទេ ដោយលោកប្រាប់ថា ជាប់រវល់។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្សលោក មឿន តុលា ថ្លែងថា ដោយសារក្រុមកូដករបាត់បង់ទំនុកចិត្តលើក្រសួងការងារ ដែលមិនអាចរុញវិវាទនេះឱ្យមានដំណោះស្រាយ ដូច្នេះក្រុមកូដករ គឺមានតែជម្រើសស្នើសុំកិច្ចអន្តរាគមន៍ពីថ្នាក់ដឹកនាំកំពូល។ «ខ្ញុំមិនទាន់សន្និដ្ឋានថា យ៉ាងម៉េចទេ ប៉ុន្តែបើសិនជាថ្នាក់ដឹកនាំកំពូលយល់ឃើញថា មិនចង់ឱ្យមានការតវ៉ា ខណៈកម្ពុជាធ្វើប្រធានអាស៊ាន ហើយមានការបោះឆ្នោតនៅឆ្នាំក្រោយ អ៊ីចឹងរឿងនេះគួរតែមានការអន្តរាគមន៍ ហើយក្រុមហ៊ុនគួរទទួលយកបុគ្គលិកជាង ១០០ នាក់ ចូលធ្វើការវិញ គឺចប់ហើយ»៕