ភ្នំពេញៈ គណៈកម្មាធិការជាតិរៀបចំការបោះឆ្នោត (គជប) បានបញ្ចប់ការដោះស្រាយបណ្តឹងចំនួន ១៨ ដែលបានប្តឹងបន្តពីគណៈកម្មការរាជធានី-ខេត្ត រៀបចំការបោះឆ្នោតមកកាន់ គ.ជ.ប. ពាក់ព័ន្ធនឹងភាពមិនប្រក្រតីនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិ ទី៥ នាថ្ងៃទី ៥ មិថុនា ឆ្នាំ ២០២២។
លោក សោម សូរីដា អ្នកនាំពាក្យ គ.ជ.ប. ប្រាប់នៅថ្ងៃទី ២០ មិថុនាថា បណ្តឹងដែលដាក់នៅគណៈកម្មការរាជធានី-ខេត្ត រៀបចំការបោះឆ្នោតត្រូវបានដោះស្រាយបញ្ចប់សព្វគ្រប់ហើយ។ ដោយឡែក គ.ជ.ប. ដែលទទួលបានបណ្តឹងចំនួន ១៨ ប្តឹងបន្តពីរាជធានី-ខេត្ត និង ១ ទៀត ប្តឹងផ្ទាល់មក គ.ជ.ប. ក៏ត្រូវបានដោះស្រាយចប់សព្វគ្រប់ផងដែរ។ ដូច្នេះ ក្រោយពី គ.ជ.ប. បានដោះស្រាយបណ្តឹងរួចរាល់សព្វគ្រប់ហើយ គ.ជ.ប. អាចប្រកាសលទ្ធផលបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី៥ នេះជាផ្លូវការបានហើយ។ ប៉ុន្តែមិនទាន់កំណត់ពេលវេលាច្បាស់លាស់នៅឡើយទេ។
លោកថ្លែងថា៖ «សម្រាប់បណ្តឹង ថ្ងៃសៅរ៍ ១ ថ្ងៃមុនថ្ងៃបោះឆ្នោត និងនៅថ្ងៃបោះឆ្នោត គឺថ្ងៃទី ៥ ខែ មិថុនា ឆ្នាំ ២០២២ គ.ជ.ប. ទទួលបានបណ្តឹង សរុបចំនួន ១៤២ បណឹ្តង។ នៅក្នុងចំណោមបណ្តឹងនេះ នៅថ្នាក់ឃុំ-សង្កាត់រៀបចំការបោះឆ្នោតចំនួន ៨០ បណ្តឹង ប្តឹងផ្ទាល់ទៅគណៈកម្មការរាជធានី-ខេត្តចំនួន ៥៦ បណ្តឹង និងប្តឹងផ្ទាល់មក គ.ជ.ប. មាន ១ បណ្តឹង»។
បើតាមលោក សោម សូរីដា ក្នុងចំណោមបណ្តឹងចំនួន ១៤២ នេះ មាន ៨៥ បណ្តឹង ជាករណីប្តឹងសុំផ្តន្ទាទោស។ មាន ៥៣ បណ្តឹង ជាករណីប្តឹងភាពមិនប្រក្រតី នៅមុន ១ ថ្ងៃ និងនៅថ្ងៃបោះឆ្នោតចំនួន ៣២ បណ្តឹង។
លោក ថាច់ សេដ្ឋា អនុប្រធានគណបក្សភ្លើងទៀនប្រាប់ ភ្នំពេញ ប៉ុស្តិ៍ នាថ្ងៃទី ២០ មិថុនាថា សម្រាប់បណ្តឹងនៅ គ.ជ.ប. លោកមិនទាន់ទទួលបានព័ត៌មានពីមេធាវីនៅឡើយទេថា មានប៉ុន្មាន និងដោះស្រាយបានប៉ុន្មានករណី។ ប៉ុន្តែភាគច្រើននៃបណ្តឹងរបស់បក្សភ្លើងទៀន ពីថ្នាក់ឃុំ-សង្កាត់ និងថ្នាក់រាជធានី-ខេត្ត ភាគច្រើន គឺត្រូវបានទាត់ចោល និងចាត់ទុកជាមោឃៈ ដោយមិនមានការដោះស្រាយណាមួយឡើយ។
លោកថ្លែងថា៖ «សម្រាប់បណ្តឹងនៅ គ.ជ.ប. ខ្ញុំថា អាចនឹងត្រូវទាត់ចោល ដូចនៅគណៈកម្មការឃុំ-សង្កាត់រៀបចំការបោះឆ្នោត និងគណៈកម្មការរាជធានី-ខេត្ត រៀបចំការបោះឆ្នោតដែរ»។
លោក សំ គន្ធាមី នាយកប្រតិបត្តិអង្គការឃ្លាំមើលការបោះឆ្នោត (និចហ្វិក) ថ្លែងនៅថ្ងៃទី ១៣ មិថុនាថា បណ្តឹងរបស់គណបក្សនយោបាយមួយចំនួនត្រូវបាន គ.ជ.ប. បដិសេធទទួលយកមក ដោះស្រាយ ព្រោះបណ្តឹងខ្លះ ពាក់ព័ន្ធនឹងព្រហ្មទណ្ឌ និងបណ្តឹងមួយចំនួនទៀត ហួសអាជ្ញាយុកាល។
លោកថា បណ្តឹងរបស់គណបក្សនយោបាយដែលប្តឹងមក គ.ជ.ប. ភាគច្រើនពាក់ព័ន្ធនឹងភាពមិនប្រក្រតី នៅមុន និងនៅថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ នេះ។ ទោះជាយ៉ាងណា លោកថ្លែងថា៖ «យើងអត់ដឹងព័ត៌មានច្រើនទេ ពីការដោះស្រាយបណ្តឹងនេះ ព្រោះ គ.ជ.ប. អត់បើកជាសាធារណៈ»៕