.jpg)
តំបន់ធម្មជាតិភ្នំត្បែង ក្នុងខេត្តព្រះវិហារ កាលពីឆ្នាំ ២០១៩។ ហុង មិនា
ភ្នំពេញៈ អន្តរក្រសួងបានឯកភាពជ្រើសរើសយកតំបន់បេតិកភណ្ឌធម្មជាតិភ្នំត្បែង ក្នុងខេត្ដព្រះវិហារ និងតំបន់គ្រប់គ្រង និងការពារជម្រកសត្វផ្សោតមេគង្គព្រែកកាំពីចាប់ពីខេត្ដក្រចេះដល់ខេត្ដស្ទឹងត្រែង ដាក់ចូលក្នុងបញ្ជីត្រៀមស្នើបញ្ចូលជាសម្បត្ដិបេតិកភណ្ឌធម្មជាតិពិភពលោករបស់អង្គការយូណេស្កូ។ នេះបើតាមលោក នេត្រ ភក្ត្រា រដ្ឋលេខាធិការក្រសួងបរិស្ថាន។
លោក នេត្រ ភក្ត្រា ថ្លែងក្នុងពេលដឹកនាំយុទ្ធនាការអន្ទាក់សូន្យក្នុងខេត្តក្រចេះ ពីថ្ងៃទី ១៨ មិថុនាថា ក្រសួងបរិស្ថានទទួលបានអាណត្ដិពីរាជរដ្ឋាភិបាលក្នុងការរៀបចំបញ្ជីបេតិកភណ្ឌធម្មជាតិពិភពលោករបស់អង្គការយូណេស្កូ បន្ទាប់ពីកន្លងមកកម្ពុជាបានដាក់បញ្ចូលប្រាសាទបុរាណមួយចំនួនជាសម្បត្ដិបេតិកភណ្ឌវប្បធម៌ពិភពលោក ប៉ុន្ដែមិនទាន់មានបេតិកភណ្ឌធម្មជាតិពិភពលោកនៅឡើយ។
លោកបានឱ្យដឹងថា តំបន់ការពារធម្មជាតិចំនួន ៥ ដែលអន្តរក្រសួងបានយកមកពិនិត្យ និងជ្រើសរើសនោះមាន តំបន់បេតិកភណ្ឌធម្មជាតិភ្នំត្បែង តំបន់គ្រប់គ្រង និងការពារជម្រកសត្វផ្សោតមេគង្គព្រែកកាំពី ថ្មភ្នំណាមលៀរ ក្នុងដែនជម្រកសត្វព្រៃ ភ្នំណាមលៀរ ដែនជម្រកសត្វព្រៃព្រែកប្រសព្វ និងឧទ្យានជាតិក្រវាញខាងត្បូង។ ប៉ុន្ដែបានឯកភាពយកតែតំបន់បេតិកភណ្ឌធម្មជាតិភ្នំត្បែងក្នុងខេត្ដព្រះវិហារ និងតំបន់គ្រប់គ្រង និងការពារជម្រកសត្វផ្សោតមេគង្គ ព្រែកកាំពីចាប់ពីខេត្ដក្រចេះដល់ខេត្ដស្ទឹងត្រែងប៉ុណ្ណោះ ដើម្បីដាក់ចូលក្នុងបញ្ជីត្រៀមស្នើបញ្ចូលជាសម្បត្ដិបេតិកភណ្ឌធម្មជាតិពិភពលោករបស់អង្គការយូណេស្កូ។
លោកថ្លែងថា៖ «យើងកំពុងតែរៀបចំ ហើយក្នុងចំណោម ៥ នេះ គឺតំបន់បេតិកភណ្ឌធម្មជាតិចំនួន ២ ដែលអន្តរក្រសួងឯកភាពនៅក្នុងការបន្តរៀបចំឯកសារតទៅមុខទៀតនោះ គឺតំបន់ទេសភាពទន្លេមេគង្គពីខេត្ដក្រចេះ ទៅខេត្ដស្ទឹងត្រែងនេះ ដែលមានសត្វផ្សោតមានត្រីរាជ ត្រីត្រសក់ បបែលយក្ស សត្វក្ដាន់ សត្វទន្សោង អីហ្នឹងគឺប្រភេទដែលល្អឯកជា តម្លៃសកលដែលត្រូវបានរៀបចំដើម្បីដាក់ជាតម្លៃមួយ គឺបេតិកភណ្ឌធម្មជាតិពិភពលោក»។
លោកបញ្ជាក់ថា៖ «យើងដាក់ជាបញ្ជីត្រៀម មានន័យថា មុននឹងបញ្ជូនទៅគេពិនិត្យយើងត្រូវស្ថិតក្នុងបញ្ជីត្រៀមសិន មានន័យថាតម្រង់ជួរចាំគ្នាសិន។ ឥឡូវវាស្ថិតក្នុងដំណាក់កាលដែលរៀបចំបញ្ជីតម្រង់ជួរចាំគ្នា ដល់ពេលដំណាក់កាលមួយដែលយើងត្រូវការចូលអាហ្នឹង គឺយើងចូលទៅក្នុងបញ្ជីដែលយើងស្នើ»។
បើតាមលោក ភក្ត្រា ចំពោះការស្នើបញ្ចូលតំបន់ធម្មជាតិកម្ពុជាទៅក្នុងបញ្ជីបេតិកភណ្ឌធម្មជាតិពិភពលោកនេះ គឺមានផលប្រយោជន៍ច្រើនណាស់ គឺពិភពលោកនឹងចាប់អារម្មណ៍លើតំបន់ទាំងនេះ ពិភពលោកនឹងមកទេសចរតំបន់នេះច្រើន។
លោកបញ្ជាក់ថា៖ «អ៊ីចឹងចំណុចនេះ ដែលយើងត្រូវការការពារ។
ឥឡូវស្ថិតក្នុងបញ្ជីត្រៀម ប៉ុន្ដែបើបងប្អូនអត់ចូលរួមការពារទេ ធនធានធម្មជាតិដែលយើងរៀបចំស្នើនេះវាបាត់បង់ អាបញ្ជីត្រៀមនឹងក៏យើងធ្លាក់ដែរ»។
លោក ភក្ត្រា បានបន្ថែមថា អ្វីដែលបានបញ្ជាក់តម្លៃជាសកលក្នុងការស្នើសុំនេះ គឺតំបន់ទន្លេមេគង្គចាប់ពីក្រចេះ ដល់ខេត្ដស្ទឹងត្រែងជាតំបន់មានសារៈសំខាន់ដែលមានតម្លៃជាសកលដោយផ្អែកទៅលើធនធានចម្រុះដូចជា សត្វផ្សោត ត្រីពូជ សត្វទឹកធំៗនិងសត្វស្លាប ព្រៃលិចទឹក កោះ សត្វក្ដាន់ សត្វទន្សោង និងសត្វរមាំង។ មានអន្លង់ជ្រៅពី ៣០ ម៉ែត្រទៅ ៦០ ម៉ែត្រ មានជួរទឹក ថ្មប៉ប្រះទឹកជាដើម»។
ក្រៅពីនេះមានសត្វស្លាបជិតផុតពូជមានសត្វរំពេទន្លេ ត្រយងយក្ស ត្រយងចង្កំកស ត្មាត ត្រដក់តូច ត្រដក់ធំ។ មានត្រីប្រមាណ ៨០០ ប្រភេទ ត្រីកម្រជិតផុតពូជ មានត្រីគល់រាំង ត្រី
ត្រសក់ ត្រីប៉ាវ៉ា ត្រីប៉ាស៊ីអ៊ី ត្រីរាជ ត្រីបបែលយក្ស កន្ធាយក្បាលកង្កែបក្នុងតំបន់នេះជាដើម។
លោកថា៖ «នេះគឺជាចំណុចសំខាន់ៗដែលបញ្ជាក់អំពីតម្លៃនៃរមណីយដ្ឋានដែលយើងបានចាត់ទុកថា ជាតំបន់មួយដែលយើងយល់ថា គួរតែស្នើសុំទៅដាក់ជាបញ្ជីត្រៀមសម្រាប់ការស្នើសុំទៅអង្គការយូណេស្កូ ដាក់ជាតំបន់បេតិកភណ្ឌធម្មជាតិរបស់ពិភពលោក»។
រីឯតំបន់បេតិកភណ្ឌធម្មជាតិភ្នំត្បូង ត្រូវបានបង្កើតឡើងដោយអនុក្រឹត្យលេខ ១៨៩ អនក្រ.បក ចុះថ្ងៃទី ១៣ ខែ កញ្ញា ឆ្នាំ ២០១៦ មានផ្ទៃដីសរុប ២៥ ២៦៩,៤១ ហិកតា ក្នុងស្រុកត្បែងមានជ័យ ស្រុកសង្គមថ្មី ស្រុកគូលែន ស្រុករវៀង និងក្រុងព្រះវិហារនៃខេត្តព្រះវិហារ។ សក្តានុពលធនធានធម្មជាតិតំបន់នេះ នៅមានសល់ព្រៃឈើដ៏សម្បូរបែបដូចជា ព្រៃស្រោង និងព្រៃពាក់កណ្ដាលស្រោងសម្រាប់ការអភិរក្សសត្វព្រៃ ការផ្តល់សេវាប្រព័ន្ធអេកូឡូស៊ី និងធានាការផ្គត់ផ្គង់ទឹកសាបដល់សហគមន៍នៅជុំវិញតំបន់នេះ។
លោកថ្លែងថា៖ «ថនិកសត្វជិតផុតពូជ និងរងគ្រោះថ្នាក់ជាច្រើនប្រភេទនៅតំបន់នេះ រួមមាន ទោចមកុដ ខ្លាឃ្មុំធំ ខ្លាឃ្មុំតូច ប្រើស ឆ្កែព្រៃ ឆ្មាដាវ ស្វាព្រាម រញីប្រផេះ ប្រចៀវភ្នំត្បែង និងមានសត្វព្រៃជាច្រើនប្រភេទផ្សេងទៀតត្រូវបានគេឱ្យដឹងថា មានវត្តមានក្នុងតំបន់នេះ»។
លោកបញ្ជាក់ថា តំបន់បេតិកភណ្ឌធម្មជាតិនេះមានទិដ្ឋភាពព្រៃឈើស្រស់ស្អាត រួមជាមួយនឹងតំបន់ទឹកធ្លាក់និងទីតាំងជំនឿជាច្រើនកន្លែង។ ទាំងនេះបង្ហាញថា មានសក្តានុពលខ្ពស់ទាំងសម្បត្តិធនធានធម្មជាតិនិងជំនឿផ្សេងៗ ដែលត្រូវរួមគ្នាថែរក្សាការពារទុកឱ្យមានជានិរន្តរ៍។
អ្នកស្រី គិន ណារ៉ុង ម្ចាស់អាហារដ្ឋានមួយកន្លែងនៅរមណីយដ្ឋានផ្សោតព្រែកកាំពី តាំងពីឆ្នាំ ២០០៨ បានថ្លែងថា ដោយសារសត្វផ្សោត និងតំបន់ទេសចរណ៍នៅតំបន់ព្រែកកាំពីមានសភាពស្អាត ភ្ញៀវទេសចរជាតិ និងអន្តរជាតិតែងមកលេងកម្សាន្ត និងជិះទូកមើលផ្សោតក្នុងតំបន់នេះ ពិសេសនៅថ្ងៃសម្រាក ឬថ្ងៃបុណ្យដោយក្នុង ១ ថ្ងៃ អាចមានទេសចរ ១០០-២០០ នាក់
នៅមុនមានជំងឺកូវីដ ១៩។
អ្នកស្រីបានឱ្យដឹងថា ប៉ុន្តែពេលមានកូវីដ ១៩ ចំនួនភ្ញៀវទេសចរធ្លាក់ចុះ ហើយក្រោយពីរដ្ឋាភិបាលបើកដំណើរការប្រទេសឡើងវិញ ភ្ញៀវទេសចរទើបមានក្នុង ១ ថ្ងៃ ប្រមាណពី ១០-២០ នាក់ប៉ុណ្ណោះ។
អ្នកស្រីបានបញ្ជាក់ថា៖ «កាលពីមុនមានជំងឺកូវីដ ១៩ ១ ថ្ងៃ អាហារដ្ឋានខ្ញុំអាចចំណេញបាន ៣០-៤០ ម៉ឺនដែរ។ ប៉ុន្ដែក្រោយមានការរាតត្បាតពីកូវីដ ១៩ យើងរកចំណូលបានមិនសូវទៀងទាត់ទេ ជួនកាលទៅបាន ១០ ម៉ឺន ជួនកាល ២០ ម៉ឺនរៀលអីដែរ។ ប៉ុន្តែឥឡូវខ្ញុំធ្វើជាលក្ខណៈគ្រួសារទេ មិនមានជួលបុគ្គលិកដូចមុនទេ ដោយសារចំណូលតិចជាងមុន»៕
វីដេអូ៖
