.jpg)
លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជានិងសហការី ដឹកនាំកិច្ចប្រជុំ AICHR។ រូបថត CHRC
ភ្នំពេញៈ លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជានិងជាប្រធាន គណៈកម្មការអន្តររដ្ឋាភិបាលអាស៊ាន ទទួលបន្ទុកសិទ្ធិមនុស្ស ដែលហៅកាត់ថា(AICHR) ឆ្នាំ ២០២២ នឹងដឹកនាំកិច្ចប្រជុំលើកទី៣៥ រយៈពេល៣ថ្ងៃ ដែលបានចាប់ពីថ្ងៃទី ២១ ខែមិថុនា ដើម្បីពិនិត្យ ពិភាក្សា និងត្រៀមអនុម័តឯកសារពាក់ព័ន្ធជាច្រើនទាក់ទិនការលើកកម្ពស់សិទ្ធិមនុស្សក្នុងតំបន់។
លោក ជិន ម៉ាលីន អនុប្រធានគណៈកម្មាធិការសិទ្ធិមនុស្សកម្ពុជាប្រាប់ ភ្នំពេញ ប៉ុស្តិ៍ថា កិច្ចប្រជុំលើកទី៣៥ នេះ មានលក្ខណៈពិសេស ដោយត្រូវត្រៀមនូវឯកសាចំនួន ៣ ជាសំខាន់ ដើម្បីធ្វើការរាយការណ៍ជូនកិច្ចប្រជុំរដ្ឋមន្ត្រីបរទេសអាស៊ាននៅខែសីហា ខាងមុខនេះ ដែលកម្ពុជាធ្វើជាម្ចាស់ផ្ទះនៃការរៀបចំកិច្ចប្រជុំរដ្ឋមន្ត្រីការរទេសអាស៊ាន ដែលដឹកនាំដោយ ប្រធានរដ្ឋមន្ត្រីការបរទេសអាស៊ាន លោក ប្រាក់ សុខុន ហើយ AICHR ក៏នឹងចូលរួមកិច្ចប្រជុំនេះផងដែរ។
លោក ម៉ាលីន ថ្លែងថា៖ «កិច្ចការងារស្នូលរបស់អាយឆា (ឬ AICHR) ផ្តោតលើការអប់រំ ផ្សព្វផ្សាយលើកកម្ពស់សិទ្ធិមនុស្ស គ្រប់ប្រភេទទាំងអស់រួមមាន សិទ្ធិស្រី្ត និងកុមារ សិទ្ធិជនមានពិការភាព ធុរកិច្ច និង ការបង្ការទារុណកម្ម សេរីភាពជំនឿ សាសនា សេរីភាពក្នុងការបញ្ចេញមតិ សិទ្ធិទទួលបានទឹកស្អាត និងអនាម័យ បម្រែបម្រួលអាកាសធាតុ ការជួញដូរមនុស្ស សិទ្ធិទទួលបានសេវាសុខាភិបាល និងសិទ្ធិទទួលបានសញ្ញាតិ»។
លោកថា កិច្ចប្រជុំនេះក្រៅពីការអនុម័តរបាយការណ៍នានា នាពេលកន្លងមកក៏ជជែកពីផែនការដែលត្រូវរៀបចំទៅមុខនៅឆ្នាំ ២០២៣ និងផែនការរបស់ AICHR និងត្រៀមជួបដោយផ្ទាល់ជាមួយរដ្ឋមន្ត្រីការបរទេសអាស៊ាននៅថ្ងៃទី ២ ខែសីហា ដែលធ្វើឡើងនៅកម្ពុជា។
លោកថ្លែងថា៖ «កិច្ចប្រជុំនេះក៏មានការជជែកពិភាក្សាពីស្ថានភាពសិទ្ធិមនុស្សទូទៅជាលក្ខណៈតំបន់មិនមែនផ្តោតសំខាន់ទៅលើប្រទេសណាមួយនោះទេ ដោយផ្តោតទៅលើ បច្ចុប្បន្នភាពការវិវឌ្ឍន៍នៃសិទ្ធិមនុស្ស ការរីកចម្រើន និងបញ្ហាប្រឈមនានា»។
យោងតាម សេចក្តីប្រកាសព័ត៌មានរបស់ AICHR ចុះថ្ងៃទី ២១ ខែមិថុនានេះ បានឱ្យដឹងថា កិច្ចប្រជុំលើកទី៣៥ នឹងធ្វើឡើងតាមប្រព័ន្ធវីដេអូ រយៈពេលបីថ្ងៃ ចាប់ពីថ្ងៃទី ២១-២៣ ខែ មិថុនា ឆ្នាំ ២០២២ ដោយមានការចូលរួមពីតំណាង AICHR នៃប្រទេសសមាជិកអាស៊ានទាំងអស់ និងលេខាធិការដ្ឋានអាស៊ាន។
សេចក្ដីប្រកាសព័ត៌មាននេះបានឱ្យដឹងថា កិច្ចប្រជុំលើកនេះ នឹងពិនិត្យ ពិភាក្សា និងអាចអនុម័តទៅលើឯកសារជាច្រើនរួមមាន របាយការណ៍កំណត់ហេតុនៃកិច្ចប្រជុំ និងសកម្មភាពនានាដែលបានរៀបចំធ្វើនាពេលកន្លងមក វឌ្ឍនភាពនៃកម្មវិធីនានាដែលមិនទាន់បានអនុវត្តនិងរបាយការណ៍នៃកម្មវិធីដែលបានអនុវត្តរួចហើយ ឯកសារទស្សនទានស្ដីពីកម្មវិធីនិងសកម្មភាពអាទិភាពរបស់ AICHR ដែលគ្រោងនឹងអនុវត្តក្នុង ឆ្នាំ ២០២២។ ឯកសារសំខាន់ចំនួន ៣ ដែលត្រៀមសម្រាប់កិច្ចប្រជុំប្រចាំឆ្នាំជាមួយរដ្ឋមន្ត្រីការបរទេសអាស៊ាននាដើមខែសីហា ឆ្នាំ ២០២២ រួមមាន ១ របាយការណ៍ឆ្នាំ ២០២២ របស់ AICHR ទី២ សេចក្តីថ្លែងការណ៍របស់ប្រធាន AICHR ទៅកាន់រដ្ឋមន្ត្រីការបរទេសអាស៊ាន និង ៣ កម្មវិធីកម្ម និងសកម្មភាពអាទិភាពរបស់ AICHR ឆ្នាំ ២០២៣។
ក្រៅពីនេះ នៅក្នុងកិច្ចប្រជុំលើកទី៣៥ ក៏នឹងមាន កិច្ចជំនួបដាច់ដោយឡែកចំនួន ២ រវាង AICHR ជាមួយគណៈកម្មាធិការតំណាងអចិន្ត្រៃយ៍ប្រចាំអាស៊ាន និងជាមួយវេទិកានៃស្ថានប័នសិទ្ធិមនុស្សជាតិអាស៊ាន រួមទាំងការពិភាក្សាទៅ លើបញ្ហាផ្សេងៗទៀត។
កិច្ចប្រជុំលើកទី៣៤ ដែលប្រព្រឹត្តឡើងកាលពីខែមីនា ឆ្នាំ ២០២២ បានពិនិត្យលើការអនុម័តរបាយការណ៍សង្ខេបចំនួន ៥ អំពីសកម្មភាព របស់ AICHR ក្នុងឆ្នាំ ២០២១ ពីវឌ្ឍនភាពថ្មីៗ និងគំនិតផ្តួចផ្តើមពាក់ព័ន្ធនឹងសិទ្ធិមនុស្ស របស់ប្រទេសសមាជិកអាស៊ានមួយចំនួន បន្តពិភាក្សាលើឯកសារទស្សនទានជាច្រើននៃកម្មវិធីអាទិភាពរបស់AICHRដែលគ្រោងអនុវត្តក្នុងឆ្នាំ២០២២ ការពិភាក្សាពីកម្មវិធីអាទិភាពរបស់AICHRសម្រាប់អនុវត្តនៅឆ្នាំ ២០២៣ ការរាយការណ៍ពីការតាមដាន និងវាយតម្លៃលើក្របខណ្ឌការងារនៃផែនការ ៥ ឆ្នាំរបស់ AICHR (២០២១-២០២៥)៕
