.jpg)
ទូហ្គេមត្រូវបានសមត្ថកិច្ចខេត្តព្រះសីហនុ ដុតបំផ្លាញចោល។ រូបថត នគរបាល
ព្រះសីហនុៈ ទូហ្គេមគ្រប់ប្រភេទចំនួន ១៦៣ ទូ ត្រូវបានសមត្ថកិច្ចខេត្តព្រះសីហនុ ដុតបំផ្លាញចោល កាលពីថ្ងៃទី ២០ មិថុនា បន្ទាប់ពីប្រមូលបាន ពី ១០ ទីតាំង នៅក្រុង-ខេត្តព្រះសីហនុ ចាប់ពីដើមខែមករា ដល់ខែមិថុនា ឆ្នាំ ២០២២ នេះ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានប្រាប់ ភ្នំពេញ ប៉ុស្តិ៍ នៅថ្ងៃទី ២១ មិថុនាថា នគរបាល ដោយមានការសម្របសម្រួលផ្លូវច្បាប់ពីលោក ពេញ ពិសិដ្ឋ ព្រះរាជអាជ្ញារងអមសាលាដំបូងខេត្តព្រះសីហនុ បានធ្វើការដុតកម្ទេចចោល នូវប្រភេទទូហ្គេមដែលកម្លាំងសមត្ថកិច្ចរបស់លោកប្រមូលបានក្នុង ១០ ទីតាំង។
លោកថ្លែងថា៖ «ករណីនេះ មនុស្សដែលពាក់ព័ន្ធនឹងទូហ្គេមទាំងនេះ គឺខ្ញុំបានធ្វើការអប់រំដល់ពួកគេ និងណែនាំឱ្យឈប់ប្រព្រឹត្តតទៅទៀត។ ជាវិធានការណ៍យើងនៅតែបន្តអនុវត្តទៀត»។
បើតាមលោក ឧត្តមសេនីយ៍ទោ ជួន ណារិន្ទ ការបង្ក្រាបទាំង១០ទីតាំងនេះ គឺកម្លាំងសមត្ថកិច្ច នៃស្នងការដ្ឋាននគរបាលខេត្តព្រះសីហនុ បានសហការជាមួយកម្លាំងជំនាញនៃអធិការដ្ឋាននគរបាលក្រុងព្រះសីហនុ រឹបអូសនូវឧបករណ៍ទូហ្គេមអេឡិចត្រូនិកខុសច្បាប់ដែលចាប់នៅអំឡុងខែមករា ដល់ខែមិថុនា ឆ្នាំនេះ ហើយលោកទើប ធ្វើការដុតកម្ទេចចោល នៅទីតាំងដី បឹងព្រែកទប់ ស្ថិតក្នុងភូមិ ១ សង្កាត់លេខ ៣ ក្រុងព្រះសីហនុ ។
វត្ថុតាងទាំងនោះ មានតុហ្គេមបាញ់ត្រីមានចំនួន ៤៥ គ្រឿង ទូហ្គេមផ្សេងទៀត ចំនួន ១១៨ គ្រឿងដែលសរុបចំនួន ១៦៣ គ្រឿង។
លោក សេក សុជាតិ នាយកប្រតិបត្តិអង្គការអភិវឌ្ឍន៍ផ្នត់គំនិតថ្លែងថា ម្ចាស់អាជីវកម្ម ឬម្ចាស់ទីតាំង គឺត្រូវទទួលខុសត្រូវ លើបញ្ហានេះទាំងស្រុង ហើយសមត្ថកិច្ច ត្រូវបើកការស៊ើបអង្កេត និងស្វែងរកអ្នកជាប់ពាក់ព័ន្ធឱ្យឃើញ រួចរៀបចំដោះស្រាយតាមប្រព័ន្ធច្បាប់ (កុំប្រព្រឹត្តិអំពើពុករលួយ) មិនមែនត្រឹមតែយកទូហ្គេមទៅដុតបំផ្លាញចោលនោះទេ។ បើមិនដូច្នោះទេ ទោះបីសមត្ថកិច្ចខិតខំដោះស្រាយបង្ក្រាបបញ្ហានេះ ១០០ ឆ្នាំទៀត ក៏ដោះស្រាយល្បែងហ្គេមនេះ មិនអស់ដែរ ដោយសារតែកង្វះការអនុវត្តន៍ច្បាប់ និងការទទួលខុសត្រូវ របស់មន្ត្រីមានសមត្ថកិច្ចមួយចំនួន។
លោកបន្តថា វិធីសាស្ត្របញ្ចប់បញ្ហានេះ គួររៀបចំជាប្រព័ន្ធ តាមដានការរកស៊ីខុសច្បាប់ (មានមេភូមិ អនុភូមិ ជំនួយការភូមិ) ត្រូវចូលរួមទប់ស្កាត់បញ្ហានេះ ដោយធ្វើការរាយការណ៍ពីទីតាំងទៅកាន់សមត្ថកិច្ច ដើម្បីបង្ក្រាប និងទប់ស្កាត់។
បើអាជ្ញាធរមូលដ្ឋានមិនអាចធ្វើបាន ត្រូវធ្វើការផ្លាស់ប្ដូរចេញ ដាក់អ្នកថ្មីជំនួស។ តែបើខាងភូមិប្រាប់ហើយ សមត្ថកិច្ច មិនដោះស្រាយ ត្រូវចាត់វិធានការលើមន្ត្រីសមត្ថកិច្ចនោះវិញ (ប្ដូរចេញ) ដើម្បីឱ្យអ្នកមានសមត្ថភាពចូលទៅធ្វើកិច្ចការនោះ។
បើតាមលោក សុជាតិ ក្នុងករណីមានអ្នកកាងនៅពីក្រោយ គឺមន្ត្រីថ្នាក់លើ មានមន្ត្រីស៊ីវិល សមត្ថកិច្ច ឬកងកម្លាំងប្រដាប់អាវុធ ត្រូវតាមដាន និងស៊ើបអង្កេត ដើម្បីដោះស្រាយតាមផ្លូវច្បាប់ ដោយគ្មានការយោគយល់ ឬលើកលែង។
ថ្នាក់ដឹកនាំណា ដែលពាក់ព័ន្ធជាមួយបទល្មើសទាំងអស់នោះ ត្រូវតែទទួលខុសត្រូវចំពោះមុខច្បាប់ និងដោយស្មើភាពគ្នា បើមិនដូច្នោះទេ បញ្ហាទាំងអស់ នឹងមិនអាចបង្ក្រាប ឬលុបបំបាត់ពីក្នុងសង្គមជាតិយើងបានទេ។
លោកបញ្ជាក់ថា៖ «លើសពីនេះ ត្រូវបណ្ដុះបណ្ដាលផ្នត់គំនិតប្រជាសហគមន៍ ពិសេសក្មេងជំទង់ និងយុវជន កុំឱ្យចូលរួមប្រព្រឹត្តិអំពើមិនល្អទាំងអស់នោះ និងកៀរគរឱ្យយុវជន និងក្មេងជំទង់ទាំងអស់នោះ ជួយរាយការណ៍ និងលើកទឹកចិត្តឱ្យពួកគាត់ ចូលរួមធ្វើជាក្មេងជំទង់សហគមន៍ល្អ និងយុវជនសកម្ម ដើម្បីផលប្រយោជន៍ក្នុងមូលដ្ឋាន»៕
