.jpg)
គ្រូពេទ្យកំពុងចាក់វ៉ាក់សាំងដល់ជនជាប់ឃុំនៅពន្ធនាគារខេត្តព្រះវិហារកាលពីឆ្នាំ ២០២១។ រូបថត សហការី
ភ្នំពេញៈ អគ្គនាយកដ្ឋានពន្ធនាគារ ក្រសួងមហាផ្ទៃដោយមានការសម្របសម្រួលពីមន្ទីរសុខាភិបាលរាជធានី-ខេត្ដ កំពុងបន្តចាក់វ៉ាក់សាំងដូសទី៥ ដល់ជនជាប់ឃុំនៅតាមពន្ធនាគារ និងមណ្ឌលអប់រំកែប្រែទូទាំងប្រទេសសរុបប្រមាណ ៣ ម៉ឺន ៨ ពាន់នាក់។ នេះបើតាមលោក នុត សវនា អ្នកនាំពាក្យអគ្គនាយកដ្ឋានពន្ធនាគារ។
លោក នុត សវនា បានថ្លែងថា ក្នុងចំណោមជនជាប់ឃុំទាំងអស់ប្រមាណ ៣៨ ០០០ នាក់ ក្នុងនោះជនជាប់ឃុំខ្លះបានចាក់វ៉ាក់សាំងដូសទី២ ជនជាប់ឃុំខ្លះចាក់ដូសទី៣ និងខ្លះទៀតចាក់ដូសទី៤។ ប៉ុន្ដែភាគច្រើននៃជនជាប់ឃុំបានចាក់វ៉ាក់សាំង មានតែជនជាប់ឃុំមានបញ្ហាសុខភាពតិចតួចប៉ុណ្ណោះ ដែលមិនបានចាក់។
លោកថ្លែងថា៖ «មន្ដ្រីខ្ញុំតាមខេត្ដគាត់ចាក់បណ្ដើរៗចង់អស់ហើយហ្នឹង។ សម្រាប់ជនជាប់ឃុំកំពុងចាក់បណ្តើរៗដែរ។ ពន្ធនាគារនៅតាមខេត្ដយើងស្រង់មើលថា តើអ្នកណាដល់ពេលចាក់ គឺរៀបចំពេលវេលាឱ្យគាត់មកចាក់ហើយខាងមន្ទីរសុខាភិបាលខេត្ដ គឺជាអ្នកសម្របសម្រួលមកចាក់ឱ្យជនជាប់ឃុំ»។
លោក សវនា បានឱ្យដឹងថា ដោយសារតែជនជាប់ឃុំមានការផ្លាស់ប្ដូរចេញចូល ក្នុងនោះជនជាប់ឃុំខ្លះត្រូវចប់ទោស និងជនជាប់ឃុំខ្លះចូលថ្មី ដូច្នេះការចាក់វ៉ាក់សាំងដល់ជនជាប់ឃុំគឺមានសភាពមិនដូចគ្នាទេ។
លោកបញ្ជាក់ថា៖ «ដោយសារតែជនជាប់ឃុំរបស់យើងចេញ-ចូលរហូតដូច្នេះវាលំបាកដែរ យើងត្រូវពិនិត្យមើល ជនជាប់ឃុំណា ដែលដល់ពេលត្រូវចាក់ ទើបយើងរៀបចំពួកគាត់មួយក្រុម ដើម្បីឱ្យខាងសុខាភិបាលមកចាក់វ៉ាក់សាំងកូវីដ ១៩ ដល់ពួកគាត់»។
លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លើកឡើងថា ការចាក់វ៉ាក់សាំងដូសជំរុញតាមការស្ម័គ្រចិត្តដល់ជនជាប់ឃុំ គឺជាយន្តការមួយក្នុងការបង្ការ និងទប់ស្កាត់ការរីករាលដាលនៃការឆ្លងកូវីដ ១៩ ក្នុងពន្ធនាគារ។ ប៉ុន្តែការចាក់វ៉ាក់សាំងដូសជំរុញ ១ មុខ មិនគ្រប់គ្រាន់ទេ ព្រោះពន្ធនាគារ គឺមានភាពចង្អៀតណែននៃអ្នកជាប់ឃុំដដែល។
លោកបន្តថា៖ «ដូច្នេះយើងមានការព្រួយបារម្ភ ចំពោះមេរោគបំប្លែងថ្មីអាចឆ្លងចូលក្នុងពន្ធនាគារ យន្តការការដោះស្រាយកាត់បន្ថយភាពចង្អៀតណែន អ្នកជាប់ឃុំក្នុងពន្ធនាគារជារឿងចាំបាច់បំផុតទន្ទឹមគ្នាជាមួយនឹងការចាក់វ៉ាក់សាំងដូសជំរុញដល់អ្នកជាប់ឃុំ»។
ជាមួយគ្នានេះលោកស្រីវេជ្ជបណ្ឌិត ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក ១៩) បានអំពាវនាវដល់ពលរដ្ឋទាំងអស់អញ្ជើញទៅទទួលយកនូវការចាក់វ៉ាក់សាំងកូវីដ ១៩ ដូសជំរុញទាំងដូសទី ៣ ដូសទី៤ និងដូសទី៥ ជាពិសេសក្រុមគោលដៅជួរមុខ និងក្រុមគោលដៅសំខាន់ៗ និងប្រជាពលរដ្ឋវ័យចាស់ចាប់ពីអាយុ ៦០ ឆ្នាំឡើងទៅ។
លោកស្រីបញ្ជាក់ថា៖ «សូមបងប្អូនប្រជាពលរដ្ឋយកចិត្ដទុកដាក់ខ្ពស់កុំមើលស្រាលភ្លេចខ្លួន ដែលបច្ចុប្បន្ននេះថ្វីដ្បិតតែយើងមិនមានករណីឈឺ និងស្លាប់ ដោយសារជំងឺកូវីដ ១៩ ជាង ១ ខែហើយក៏ពិតមែន ក៏ប៉ុន្ដែស្ថានភាពរាតត្បាតនៃកូវីដ ១៩ មិនទាន់បិទបញ្ចប់នៅឡើយទេ»។
បើតាមលោក សវនា បច្ចុប្បន្ននៅកម្ពុជាមានពន្ធនាគារ និងមណ្ឌលអប់រំកែប្រែសរុបចំនួន ២៨ កន្លែង ក្នុងនោះមានមណ្ឌលអប់រំកែប្រែចំនួន ៤ កន្លែង។ បច្ចុប្បន្នមានជនជាប់ឃុំនៅតាមពន្ធនាគារ និងមណ្ឌលអប់រំកែប្រែសរុបប្រមាណ ៣៨ ០០០ នាក់ ក្នុងនោះជនជាប់ឃុំប្រមាណ ៥៤ ភាគរយ ជាប់ពាក់ព័ន្ធនឹងគ្រឿងញៀន។ ចំណែកមន្ត្រីពន្ធនាគារនៅទូទាំងប្រទេសមានចំនួន ២ ៩៧៥ នាក់៕
