.jpg)
ដំណើរការចាក់វ៉ាក់សាំងបង្ការជំងឺកូវីដ ១៩ នៅភ្នំពេញ ពីថ្ងៃទី ២១ មិថុនា។ ហេង ជីវ័ន
ភ្នំពេញៈ ថ្វីបើក្នុងរយៈពេល ៤៥ ថ្ងៃជាប់ៗគ្នា ប្រទេសកម្ពុជា មិនមានរកឃើញករណីឆ្លងថ្មីនៃមេរោគកូវីដ ១៩ ក៏ដោយ ប៉ុន្តែរាជរដ្ឋាភិបាល និងមន្ត្រីជាន់ខ្ពស់ក្រសួងសុខាភិបាលនៅតែបន្តឱ្យពលរដ្ឋទាំងអស់ប្រកាន់ខ្ជាប់វិធានការការពារជាប់ជាប្រចាំ ពិសេសត្រូវនាំគ្នាចូលរួមចាក់វ៉ាក់សាំងទាំងដូសមូលដ្ឋាន និងដូសជំរុញផងដែរ។
យោងតាមរបាយការណ៍ក្រសួងសុខាភិបាលដែលបានចេញផ្សាយពីថ្ងៃទី ២១ ខែមិថុនា បានឱ្យដឹងថា រយៈពេល ៤៥ ថ្ងៃជាប់គ្នា ក្រសួងមិនមានការរកឃើញនូវអ្នកឆ្លងវីរុសកូវីដ ១៩ ថ្មីនៅកម្ពុជាឡើយ ហើយក៏មិនមានអ្នកជំងឺកូវីដ ១៩ នៅសម្រាកព្យាបាលក្នុងមន្ទីរពេទ្យដែរ។
គិតត្រឹមព្រឹកថ្ងៃទី ២១ ខែ មិថុនា ឆ្នាំ ២០២២ កម្ពុជាមានអ្នកឆ្លងមេរោគកូវីដ ១៩ សរុបចំនួន ១៣៦ ២៦២ នាក់ អ្នកជាសះស្បើយសរុបចំនួន ១៣៣ ២០៦ នាក់ និងអ្នកស្លាប់ដោយសារជំងឺនេះសរុបមានចំនួន ៣ ០៥៦ នាក់។
ជាមួយគ្នានេះដែរ ការចាក់វ៉ាក់សាំងកូវីដ ១៩ នៅកម្ពុជាកំពុងតែដំណើរការដោយរលូនដែលក្នុងនោះមានទាំងដូសមូលដ្ឋាន និងដូសជំរុញ ដែលកម្ពុជាបានឈានទៅដល់ការចាក់វ៉ាក់សាំងបង្ការមេរោគកូវីដ ១៩ ដូសទី៥ ផងដែរ។
បើតាមរបាយការណ៍របស់ក្រសួងសុខាភិបាល គិតត្រឹមយប់ថ្ងៃទី ២០ ខែមិថុនា លទ្ធផលនៃការចាក់វ៉ាក់សាំងកូវីដ ១៩ ធៀបនឹងចំនួនប្រជាជនសរុប ១៦ លាននាក់ បានចំនួន ៩៤,១៩% ហើយ ខណៈដែលអត្រាអ្នកចាក់ដូសទី៣ បានជាង ៩,៣ លាននាក់ អត្រាអ្នកចាក់ដូសទី៤ បានជាង ២,៧ លាននាក់ និងអ្នកចាក់ដូសទី៥ បានជាង ២១ ម៉ឺននាក់។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) បានថ្លែងពីថ្ងៃទី ១៨ ខែមិថុនា ដោយលោកស្រីនៅតែអំពាវនាវដល់ពលរដ្ឋឱ្យមកទទួលយកនូវការចាក់វ៉ាក់សាំងកូវីដ ១៩ ឱ្យបានគ្រប់ៗគ្នា ដើម្បីរក្សាបានភាពស៊ាំរបស់បុគ្គល និងសហគមន៍ទាំងមូល។
លោកស្រីមានប្រសាសន៍ថា ៖ «ទិសដៅធំរបស់យើង គឺយើងចង់រក្សាឱ្យមាននិរន្តរភាពនៃការប្រកបរបរទទួលទានហើយបើនិយាយជាទូទៅគឺការបើកដំណើរការប្រទេសជាតិរបស់យើងនេះ សុំឱ្យមាននិរន្តរភាពយូរអង្វែង ដើម្បីចៀសវាងនូវការផ្ទុះឡើងនូវការឆ្លងរាតត្បាតនៃជំងឺកូវីដ ១៩ នេះ»។
ទន្ទឹមនឹងនេះដែរ លោកស្រី ឱ វណ្ណឌីន បានបង្ហាញពីការបារម្ភពីសុខភាពរបស់ប្រជាពលរដ្ឋមួយចំនួនតូច ដែលមិនទាន់បានទទួលការចាក់វ៉ាក់សាំងបង្ការជំងឺកូវីដ ១៩ ទាល់តែសោះ។
លោកស្រីបានបញ្ជាក់ថា៖ «ខ្ញុំក៏សង្កេតឃើញផងដែរថា មានប្រជាពលរដ្ឋធម្មតាទូទៅមួយចំនួនតូច មិនបានយកចិត្តទុកដាក់ក្នុងការមកទទួលយកវ៉ាក់សាំង ដោយគាត់គិតថា គាត់រវល់ក្នុងការប្រកបរបររកស៊ីទទួលទានរបស់គាត់ ហើយគាត់ចល័តច្រើន ដែលនេះជាបញ្ហាប្រឈមរបស់យើង»។
លោកស្រីបានណែនាំពួកគាត់ឱ្យមកទទួលយកវ៉ាក់សាំងឱ្យទាន់ពេលវេលា និងបានជំរុញដល់មន្ទីរសុខាភិបាលខេត្តឱ្យយកចិត្តទុកដាក់ក្នុងការផ្តល់វ៉ាក់សាំងដល់រោងចក្រសហគ្រាសជាបន្តទៀតផងដែរ។
លោកស្រី ឱ វណ្ណឌីន បានបញ្ជាក់ថា៖ «យើងនឹងធ្វើការក្រើនរំឭក ក៏ដូចជាបន្តកិច្ចសហការគ្នា ជាពិសេសអាជ្ញាធរមូលដ្ឋាន ហើយខ្ញុំសុំធ្វើការអំពាវនាវដល់ប្រជាពលរដ្ឋទាំងអស់មកចាក់វ៉ាក់សាំងនៅពេលដែលដល់វេនរបស់អ្នក»៕
វីដេអូ៖
