.jpg)
កុមារាម្នាក់លក់ភួងផ្កានៅស្តុបកាណាឌីយ៉ា នាពេលកន្លងទៅ។ ហុង មិនា
កំពង់ឆ្នាំងៈ មន្ត្រីមកពីអាជ្ញាធរជាតិ ដើម្បីកុមារ អាជ្ញាធរមូលដ្ឋាន និងអង្គការដៃគូដែលធ្វើការងារលើបញ្ហាការជួញដូរមនុស្ស និងកុមារ ប្រមាណ ៥០ នាក់បានចូលរួមនៅក្នុងសិក្ខាសាលាកាលពីថ្ងៃទី ២០ ខែមិថុនា នៅសាលាខេត្តកំពង់ឆ្នាំង ក្នុងគោលបំណងពង្រឹងការយល់ដឹង និងផ្លាស់ប្ដូរបទពិសោធ ដើម្បីទប់ស្កាត់ការកេងប្រវ័ញ្ចលើពលកម្មកុមារ។
លោកស្រី ញ៉េប សុភាព អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិកម្ពុជា ដើម្បីកុមារបានប្រាប់ភ្នំពេញ-ប៉ុស្តិ៍កាលពីម្សិលមិញថា នៅក្នុងសិក្ខាសាលានោះ អ្នកចូលរួមដែលជាភាគីពាក់ព័ន្ធបានជជែកគ្នាលើបញ្ហាចំណាកស្រុកដោយសុវត្ថិភាព សិទ្ធិកុមារ និងកិច្ចការពារកុមារ និងច្បាប់នានាដែលពាក់ព័ន្ធប្រព័ន្ធកិច្ចការពារកុមារ ក្នុងនិងក្រៅប្រទេសក្នុងគោលបំណងបង្ហាញជូនអំពីច្បាប់ ឯកសារ និងលិខិតបទដ្ឋានដែលពាក់ព័ន្ធនឹងសិទ្ធិកុមារឡើងវិញ ដើម្បីពង្រឹងការអនុវត្តច្បាប់ និងដាក់ចេញវិធានការនានាឱ្យកាន់តែល្អប្រសើរជាងមុន។
លោកស្រី ញ៉េប សុភាព ថ្លែងថា៖ «នេះគឺជាការបង្កើនកិច្ចសហការជាមួយអង្គការដៃគូ ស្ថាប័នមានសមត្ថកិច្ចពាក់ព័ន្ធ និងបានផ្លាស់ប្តូរបទពិសោធទៅនឹងកិច្ចការពារកុមារ ឬចំពោះអ្នកដែលកំពុងធ្វើលើរឿងនេះ ដូចជាការជួញដូរមនុស្ស ការធ្វើចំណាកស្រុកដោយសុវត្ថិភាព ដើម្បីរៀនសូត្រពីគ្នា ហើយអ្វីដែលខ្វះខាតនឹងបន្តពង្រឹង»។
លោកស្រី សុភាព ថ្លែងថា សិក្ខាសាលាបែបនេះនឹងធ្វើទៅតាមខេត្តទាំងអស់ដែលមានករណីបញ្ហាប្រឈមរបស់កុមារ ព្រោះក្នុងខេត្តមួយៗមានបញ្ហាប្រឈមផ្សេងៗគ្នា ដូចជាកុមារដែលតែងតែជួយកិច្ចការឪពុកម្តាយអាចជួយក្រៅម៉ោងសិក្សា មិនធ្វើការធ្ងន់ធ្ងរ និងកុំឱ្យបោះបង់ការសិក្សា ការធ្វើចំណាកស្រុកមិនក្រៅប្រទេសគឺចំណាកស្រុកនៅក្នុងស្រុកអាចមានកុមារធ្វើការងារជាមួយឪពុកម្តាយ ដើម្បីបានលុយ ហើយបោះបង់ចោលការសិក្សា។ ករណីដោយឡែកទៀត ដូចជាក្នុងអំឡុងកូវីដ កុមារៗខកខានរៀនសូត្រ ដែលអាចប្រឈមដល់ក្រុមគ្រួសារកុមារកើតជាអំពើហិង្សា ដែលជាអាជ្ញាធរត្រូវបង្កើនការផ្សព្វផ្សាយដល់ឪពុកម្តាយ លោកគ្រូ អ្នកគ្រូ ឱ្យបានយល់ដឹងនូវអ្វីដែលជាកិច្ចការពារកុមារ។
លោកស្រី សុភាព បានថ្លែងថា៖ «បញ្ហាកុមារជារឿងរបស់មនុស្សគ្រប់គ្នា ដែលទាមទារឱ្យអន្តរវិស័យធ្វើកិច្ចការរួមគ្នាក្នុងការលើកកម្ពស់សិទ្ធិកុមារឱ្យទទួលបានការអភិវឌ្ឍសមត្ថភាព ស្របតាមគោលនយោបាយជាតិ និងអង្គការសហប្រជាជាតិ ធ្វើម៉េចឱ្យគាត់មានសិទ្ធិគ្រប់គ្រាន់ក្នុងការទទួលបានការអភិវឌ្ឍខ្លួន»។
លោកស្រី ញ៉េប សុភាព ថ្លែងថា ការប្តេជ្ញាចិត្តរបស់រាជរដ្ឋាភិបាលកម្ពុជាពាក់ព័ន្ធកុមារនេះគឺទទួលបានជោគជ័យណាស់នៅលើឆាកអន្តរជាតិ បានន័យថាកម្ពុជាចូលរួមគោរពទាំងច្បាប់ជាតិ និងអន្តរជាតិ ហើយជំរុញធ្វើម៉េចឱ្យកុមារកាន់តែទទួលបានសិទ្ធិពេញលេញធ្វើឱ្យការប្រឈមរបស់កុមារមានការថយចុះ។
លោកស្រី សុភាព ថ្លែងថា រាជរដ្ឋាភិបាលមានគោលនយោបាយជាតិស្តីពីប្រព័ន្ធកិច្ចការពារកុមាររហូតដល់ ១០ ឆ្នាំ និងមានការកសាងផែនការ ៥ ឆ្នាំទៀត អ៊ីចឹងការវិវត្តជាជំហានៗ និងត្រួតពិនិត្យជាប្រចាំ ព្រោះធម្មតាកម្ពុជាក្រោយពីទទួលបានសច្ចាប័នអនុសញ្ញាស្តីពីសិទ្ធិកុមារ រាជរដ្ឋាភិបាលមានកាតព្វកិច្ចធ្វើរបាយការណ៍ទៅអង្គការសហប្រជាជាតិ ហើយរបាយការណ៍ស្ថានភាពកុមារ រាជរដ្ឋាភិបាលធ្វើជារៀងរាល់ឆ្នាំ។ ដោយឡែក ក្រុមប្រឹក្សាជាតិកម្ពុជា ដើម្បីកុមារ បានរៀបចំកិច្ចប្រជុំគណៈកម្មការការពារកុមារថ្នាក់ជាតិ ដើម្បីពិភាក្សាពីការត្រួតពិនិត្យតាមដាន និងវាយតម្លៃរយៈពេល ២ ថ្ងៃ ២១-២២ ខែមិថុនា ឆ្នាំ ២០២២ នៅខេត្តសៀមរាប។
កិច្ចប្រជុំនេះមានគោលបំណងជំរុញកិច្ចសហប្រតិបត្តិការ និងលើកកម្ពស់ការចូលរួមក្រុមការងារអន្តរក្រសួងក្នុងការអនុវត្តអនុសញ្ញាស្តីពីសិទ្ធិកុមារឱ្យមានប្រសិទ្ធភាព និងប្រសិទ្ធផល និងកំណត់ភារកិច្ច និងតួនាទីក្រុមការងារតាមវិស័យរបស់គណៈកម្មការការពារកុមារថ្នាក់ជាតិលើការអនុវត្តកិច្ចការពារកុមារ៕
