.jpg)
នគរបាលជំនាញសាកសួរជនជាតិកូរ៉េ ២ នាក់ (ស្តាំ) កាលពីថ្ងៃទី ២០ មិថុនា។ រូបថត នគរបាល
ប៉ៃលិនៈ ក្រោយពីបុគ្គលិកនាំគ្នាតវ៉ាទាមទារបើកប្រាក់ខែ ដែលបានអាក់ខានចំនួន ២ ខែមកហើយនោះ បុរសជនកូរ៉េ ២ នាក់ ដែលជាតំណាងនៅផ្នែក កាស៊ីណូ ឌឹហ្គដ អហ្វីលស៍ (The God of Wealth Casino) នៅខេត្តប៉ៃលិន បានទូរស័ព្ទទៅកាន់ស្ថានកុងស៊ុលរបស់ខ្លួននៅខេត្តសៀមរាប ដោយបានប្រឌិតរឿងថា ពួកគេត្រូវបានគេចាប់ «ជំរិតដើម្បីទារប្រាក់» និងបានស្នើសុំឱ្យជួយអន្តរាគមន៍ រំដោះពួកគេពីបនល្បែងនោះ។
លោក សាញ់ ណាំ ស្នងការរងនគរបាលខេត្តប៉ៃលិន ទទួលបន្ទុកផ្នែកអន្តោប្រវេសន៍ បានប្រាប់ ភ្នំពេញ ប៉ុស្តិ៍ នៅថ្ងៃទី ២២ ខែមិថុនាថា តំណាងស្ថានកុងស៊ុលកូរ៉េ (ខាងត្បូង) ប្រចាំខេត្តសៀមរាប កាលពីថ្ងៃទី ២០ ខែមិថុនា បានជូនព័ត៌មានមកកាន់ស្នងការដ្ឋាននគរបាលខេត្តប៉ៃលិន ដោយប្រាប់ថា មានបុរសជនជាតិកូរ៉េ ២ នាក់ រួមមានឈ្មោះ GOO MINCHEOL អាយុ ៣៥ ឆ្នាំ ជាអ្នកគ្រប់គ្រងបនល្បែងឡូតូ និងម្នាក់ទៀតឈ្មោះ KIM HYOJOONG អាយុ ៤៥ ឆ្នាំ ជាអ្នកគ្រប់គ្រងផ្នែក IT នៃបនល្បែងឡូតូ ក្នុងកាស៊ីណូ The God of Wealth Casino ក្នុងខេត្តប៉ៃលិន ត្រូវបានគេចាប់ជំរិត និងបានស្នើសុំកម្លាំងសមត្ថកិច្ច ជួយអន្តរាគមន៍ស្រាវជ្រាវលើករណីនេះ ដើម្បីជួយសង្គ្រោះពួកគេ។
លោក ណាំ បានបញ្ជាក់ថា៖ «ប៉ុន្តែវាជារឿងប្រឌិត ដ៏គួរឱ្យភ្ញាក់ផ្អើល របស់បុរសទាំង២នោះ ដើម្បីគេចវ៉េះពីការទទួលខុសត្រូវ លើការបើកប្រាក់ឈ្នួលដល់បុគ្គលិករបស់ខ្លួន និងថ្លៃឈ្នួលផ្សេងទៀត ដល់ម្ចាស់ក្រុមហ៊ុនកាស៊ីណូ។ យើងបានរាយការណ៍អំពីករណីនេះ ទៅខាងតំណាងស្ថានកុងស៊ូលកូរ៉េ ប្រចាំខេត្តសៀមរាបវិញផងដែរ»។
បើតាមលោក ណាំ នៅពេលកម្លាំងសមត្ថកិច្ច ទទួលបានសេចក្ដីរាយការណ៍អំពីករណីនោះ ពីតំណាងស្ថានកុងស៊ុលកូរ៉េខាងត្បូង ប្រចាំខេត្តសៀមរាប កម្លាំងការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋាននគរបាលខេត្តប៉ៃលិន បានចុះស្រាវជ្រាវភ្លាមៗដល់ទីតាំងកាស៊ីណូខាងលើនេះ ដែលស្ថិតនៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ។ ជាលទ្ធផល សមត្ថកិច្ចរកឃើញថា បុរសជនជាតិកូរ៉េទាំង២នាក់នោះ មិនបានបើកប្រាក់ឈ្នួលឱ្យបុគ្គលិកស្ត្រីជាជនជាតិខ្មែរចំនួន ១២ នាក់ ព្រមទាំងថ្លៃជួលទីតាំង និងសម្ភារបើកបនល្បែងឡូតូក្នុងកាស៊ីណូនោះចំនួន ២ ខែមកហើយ។
លោកបានថ្លែងថា៖ «តាមរយៈការបំភ្លឺរបស់បុរសជនជាតិកូរ៉េទាំង ២ នាក់នោះ ពួកគេ គឺជាតំណាងឱ្យស្ត្រីជនជាតិថៃម្នាក់ឈ្មោះ RASSMEE SRIPUPA អាយុ ៥០ ឆ្នាំ ដែលជាម្ចាស់បនល្បែងឡូតូ ក្នុងកាស៊ីណូនោះ ដែលបច្ចុប្បន្នស្នាក់នៅក្នុងប្រទេសថៃ»។
លោកបន្ថែមថា បន្ទាប់ពីបានដឹងករណីនេះច្បាស់លាស់ហើយ សមត្ថកិច្ចនគរបាលជំនាញ បានធ្វើការអប់រំណែនាំដល់បុរសជនជាតិកូរ៉េទាំង ២ នាក់នោះឱ្យបញ្ឈប់ជាបន្ទាន់នូវការផ្ដល់សក្ខីកម្មក្លែង ដែលនាំឱ្យប៉ះពាល់ដល់កិត្តិយសរបស់សមកិច្ចនគរបាលកម្ពុជា ក្នុងការទទួលខុសត្រូវផ្នែកសន្តិសុខ សុវត្ថិភាព ដល់ពលរដ្ឋ បុគ្គលិកកម្មករ និយោជក់ និងភ្ញៀវជាតិ និងអន្តរជាតិ ដែលកំពុងរស់នៅ និងបម្រើការងារនៅក្នុងប្រទេសកម្ពុជា។
យ៉ាងណាក៏ដោយ បុរសជនជាតិកូរ៉េទាំង ២ នាក់ បានទទួលកំហុសរបស់ខ្លួន និងសូមអភ័យទោសដល់សមត្ថកិច្ចនគរបាលកម្ពុជា ហើយបានផ្ដល់កិច្ចសហការ ដោយបានទូរស័ព្ទទាក់ទងទៅស្ត្រីជនជាតិថៃ ដើម្បីចូលមកដោះស្រាយប្រាក់ឈ្នួលដល់បុគ្គិកជាស្ត្រីកម្ពុជា ១២ នាក់ និងថ្លៃឈ្នួលផ្សេងៗទៀត ដែលនៅមិនទាន់បានទូទាត់ដល់ម្ចាស់កាស៊ីណូ The God of Wealth Casino នៅខេត្តប៉ៃលិន។
លោក ណាំ បាននិយាយថា៖ «តាមរយៈការឆ្លើយឆ្លងតាមទូរស័ព្ទដៃ ស្ត្រីជនជាតិថៃបានសន្យាថា និងចូលមកប្រទេសកម្ពុជា នៅចុងសប្ដាហ៍នេះ ដើម្បីបើកលុយដល់បុគ្គលិក និងទូទាត់ថ្លៃឈ្នួលទីតាំងបនល្បែងរបស់ខ្លួនក្នុងកាស៊ីណូ The God of Wealth Casino ក្នុងខេត្តប៉ៃលិន»៕
