.jpg)
ជនសង្ស័យពាក់ព័ន្ធនឹងគ្រឿងញៀនដែលតុលាការកំពុងបន្តធ្វើការសាកសួរ។ រូបថត នគរបាល
ព្រះសីហនុៈ អយ្យការអមសាលាដំបូងខេត្តព្រះសីហនុ នៅថ្ងៃទី ២២ ខែមិថុនា កំពុងសាកសួរបុរសជាជនសង្ស័យចំនួន ២០ នាក់ ក្នុងនោះ មានបុរសជនជាតិចិនម្នាក់ផង បន្ទាប់ពីកងរាជអាវុធហត្ថចាប់ខ្លួនបាន ៤ ថ្ងៃ ពាក់ព័ន្ធករណីជួញដូរគ្រឿងញៀនជិត ៣០ កញ្ចប់តូច ប្រព្រឹត្តនៅភូមិ ៣ សង្កាត់ទំនប់រលក ក្រុងព្រះសីហនុ។
លោក ហួត វិចិត្រ អ្នកនាំពាក្យអយ្យការ អមសាលាដំបូងខេត្តព្រះសីហនុប្រាប់ ភ្នំពេញ ប៉ុស្តិ៍ នៅថ្ងៃទី ២២ មិថុនាថា អយ្យការអមសាលាដំបូងខេត្តព្រះសីហនុ បានទទួលជនសង្ស័យ ជាជនជាតិខ្មែរ និងជនជាតិចិន ២០ នាក់ ហើយតំណាងអយ្យការ កំពុងបន្តសាកសួរពួកគេតាមនីតិវិធី។
លោកថ្លែងថា៖ «សំណុំរឿងនេះ ខាងអាវុធហត្ថ បានបញ្ជូនមកដល់អយ្យការ ហើយតំណាងអយ្យការ កំពុងមានចំណាត់ការស៊ើបសួរពួកគេ»។
លោក ឡុង គឹមហួរ នាយការិយាល័យប្រឆាំងបទល្មើសគ្រឿងញៀន នៃបញ្ជាការដ្ឋានកងរាជអាវុធហត្ថខេត្តព្រះសីហនុ ឱ្យដឹងនៅថ្ងៃទី ២២ មិថុនា ថា មុនមានការបង្ក្រាបបទល្មើសគ្រឿងញៀន និងឈានដល់ចាប់ខ្លួនជនសង្ស័យទាំង ២០ នាក់នេះ គឺសមត្ថកិច្ចជំនាញ ទទួលបានបញ្ជាពីលោកឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុ ឱ្យធ្វើការស្រាវជ្រាវរកទីតាំងរបស់ក្រុមជនសង្ស័យ។
បន្ទាប់មកកម្លាំងរបស់លោក បានក្លែងធ្វើជាអ្នកទិញថ្នាំញៀន ដោយស្លៀកពាក់ជាស៊ីវិល ហើយចុះប្រតិបត្តិការបង្ក្រាបតែម្តង។
លោក គឹមហួរ បន្តថា តាមប្រជាពលរដ្ឋ ដែលរស់នៅក្នុងភូមិ ៣ សង្កាត់ទំនប់រលក បានត្អូញត្អែរប្រាប់សមត្ថកិច្ចរបស់លោកថា ពួកក្រុមជួញដូរគ្រឿងញៀននេះ បានបង្កភាពរំខាន ដល់ពួកគាត់ ដែលពេលយប់ក្រុមនេះបានដើរលួចឆក់របស់ទ្រព្យប្រជាពលរដ្ឋ ដោយមិនដេកមិនពួនឡើយ។ ការបង្ក្រាបក្រុមជួញដូរគ្រឿងញៀនបែបនេះត្រូវប្រឈមនឹងគ្រោះថ្នាក់ខ្លាំងណាស់ ប៉ុន្តែដើម្បីថែរក្សាសន្តិសុខ ជូនប្រជាពលរដ្ឋសមត្ថកិច្ចត្រូវតែបំពេញតួនាទីរបស់ខ្លួន។
លោកប្រាប់ថា៖ «ការបង្ក្រាបក្រុមជនសង្ស័យនេះពិបាក ហើយអ្នកភូមិ អ្នកស្រុកក៏ពួកគាត់ពិបាករស់នៅដែរ។ ពួកនេះខ្លះមានដាវ ដែកឆាប តែដើម្បីសុខសុវត្ថិភាព ក្នុងសង្គមយើង និងដើម្បីប្រជាពលរដ្ឋ យើងត្រូវតែបង្ក្រាប »។
បើតាមលោក គឹមហួរ ការបង្ក្រាបបទល្មើសគ្រឿងញៀននេះ គឺសមត្ថកិច្ច បានចុះបង្ក្រាបនៅ៣ទីតាំងផ្សេងៗគ្នាដែលទីតាំងទី១ នៅកំពង់ផែមាត់សមុទ្រ ដែលមានជនជាតិចិន ៥ នាក់ ជាអ្នកលក់ ហើយសមត្ថកិច្ចចាប់បានម្នាក់ក្នុងចំណោមនោះ។
បន្ទាប់មក សមត្ថកិច្ចបានចុះបង្ក្រាបនៅទីតាំងល្បែងហ្គេម ១ កន្លែង និងបន្តទៅបង្ក្រាបនៅភូមិ ៣ សង្កាត់ទំនប់រលក។ ក្រុមជនសង្ស័យទាំង ២០ នាក់នេះ មានអាយុចន្លោះពី ១៤ ឆ្នាំ ដល់ជាង ៤០ ឆ្នាំ ដែលសុទ្ធតែជាអ្នកជួញដូរគ្រឿងញៀន។
ចំពោះវត្ថុតាង ដែលសមត្ថកិច្ច ដកហូតបាន មានគ្រឿងញៀនប្រភេទមេតំហ្វេតាមីនជិត ៣០ កញ្ចប់តូច៕
