.jpg)
ស្បៃមុង ដែលសមត្ថកិច្ចរឹបអូសបាននៅខេត្តពោធិ៍សាត់ កាលពីថ្ងៃទី ២០ មិថុនា។ រូបថត មន្ទីរកសិកម្មខេត្តពោធិ៍សាត់
បាត់ដំបងៈ ឧបករណ៍ឆក់ត្រីចំនួនជាង ៥០០ គ្រឿង និងរបាំងសាច់អួន របាំងស្បៃមុង មង សរុបជាង ៧ តោនរួមទាំងឧបករណ៍នេសាទខុសច្បាប់ជាច្រើនទៀតត្រូវបានកម្លាំងសមត្ថកិច្ចចម្រុះខេត្តបាត់ដំបង ទទួលបានពីពលរដ្ឋផង និងបង្ក្រាបបានផង ក្នុងរយៈពេល ៣ ខែ បន្ទាប់ពីមានបទបញ្ជារបស់លោកនាយករដ្ឋមន្ត្រី ហ៊ុន សែន ស្ដីពីការបង្ក្រាបបទល្មើសជលផល ដោយគ្មានការលើកលែងក្នុងតំបន់ជុំវិញបឹងទន្លេសាប។ នេះបើតាមការប្រាប់ឱ្យដឹងពីមន្ត្រីជំនាញខណ្ឌរដ្ឋបាលជលផល។
លោក ជួង សុភា នាយខណ្ឌរដ្ឋបាលជលផល ខេត្តបាត់ដំបងបានប្រាប់ ភ្នំពេញ ប៉ុស្តិ៍ថា បទល្មើសជលផល ដែលរួមបញ្ចូលទាំងការកាប់ទន្ទ្រានព្រៃលិចទឹក ក្នុងខេត្តបាត់ដំបងនាពេលនេះមានសភាពស្ងប់ស្ងាត់គួរឱ្យកត់សម្គាល់ក៏ពិតមែន ប៉ុន្តែបទល្មើសនេះនៅតែបន្តកើតមានដោយអន្លើនៅតាមតំបន់ដាច់ស្រយាលមួយចំនួន ដែលមានជំនន់ទឹកភ្លៀងកើតឡើង ជាពិសេសនៅស្រុកឯកភ្នំ។
លោកបានបន្តថា កាលពី ២ ថ្ងៃមុននេះ កម្លាំងសមត្ថកិច្ចចម្រុះខេត្តបាត់ដំបង បានចុះស្រាវជ្រាវបទល្មើសជលផលនៅក្នុងភូមិសាស្ត្រស្រុកឯកភ្នំ ហើយបានប្រទះបទល្មើសនេសាទជាច្រើនករណីនៅចំណុចអតីតឡូត៍នេសាទលេខ ១ និងលេខ ២ ស្ថិតក្នុងភូមិព្រែកទាល់ និងភូមិក្បាលតោល ឃុំកោះជីវាំង ដោយបានដកហូត និងរឹបអូសបានវត្ថុតាងរួមមាន៖ ក្បាលបរ ចំនួន ៤៣ គ្រឿង, របាំងសាច់អួនប្រវែង ៨ ២០០ ម៉ែត្រ, មងប្រវែង ៥០០ ម៉ែត្រ, បង្គោលចំនួន ៣ ៣០០ ដើម និងបានដោះលែងត្រីចម្រុះប្រភេទចំនួន ១៥០ គីឡូក្រាម ចូលទៅក្នុងបឹងធម្មជាតិវិញ។
លោក សុភា បានបញ្ជាក់ថា៖ «ការអនុវត្តបទបញ្ជាបង្ក្រាបបទល្មើសជលផលជុំវិញបឹងទន្លេសាបរបស់សម្ដេចនាយករដ្ឋមន្ត្រី ហ៊ុន សែន ក្នុងរយៈពេល ៣ ខែកន្លងមកនេះ កម្លាំងសមត្ថកិច្ចចម្រុះខេត្តបាត់ដំបងយើងបានបង្ក្រាបរឹបអូសនូវវត្ថុតាងនៃបទល្មើស រួមមាន របាំងសាច់អួន របាំងស្បៃមុង មង សរុបជាង ៧ តោន ឧបករណ៍ឆក់ត្រី ចំនួន ៥៤០ គ្រឿង ក្នុងនោះ ៣០០ គ្រឿងទទួលបានពីប្រជាពលរដ្ឋដែលភ្ញាក់រឭក និងឧបករណ៍បម្រើឱ្យបទល្មើសនេសាទមួយចំនួនទៀត»។
បើតាមលោក សុភា វត្ថុតាងនៃបទល្មើសទាំងនេះកំពុងត្រូវបានរក្សាទុកនៅខណ្ឌរដ្ឋបាលជលផលខេត្តបាត់ដំបង និងនៅសង្កាត់រដ្ឋបាលជលផលទាំង ៤ ដែលស្ថិតក្រោមចំណុះរបស់ខ្លួន ដើម្បីរង់ចាំការសម្រេចពីគណៈកម្មការថ្នាក់ជាតិ សម្រាប់បង្ការទប់ស្កាត់ និងបង្ក្រាបបទល្មើសជលផលជុំវិញបឹងទន្លេសាប។
ចំណែកនៅខេត្តកំពង់ធំ សមត្ថកិច្ចបានរាយការណ៍ថា នៅថ្ងៃទី ២២ ខែមិថុនា ឆ្នាំ ២០២២ ក្រុមមន្ត្រីឧទ្យានុរក្សប្រចាំនៅស្នាក់ការបាឡតក្នុងតំបន់រ៉ាមសារទន្លេឆ្មារ បានសហការជាមួយទីបញ្ជាការស្រាលនៃកងរាជអាវុធហត្ថខេត្ត ចុះល្បាតដល់តំបន់ព្រែកបាឡត ហើយបានប្រទះឃើញបទល្មើសនេសាទមួយកន្លែងក្នុងតំបន់អភិរក្ស។
លោក ហង្ស ថុល មេបញ្ជាការកងរាជអាវុធហត្ថ ខេត្តកំពង់ធំបានប្រាប់ ភ្នំពេញ ប៉ុស្តិ៍ថា ក្នុងប្រតិបត្តិការនេះ កម្លាំងសមត្ថកិច្ចបានសម្រេចរុះរើ និងកាប់បំផ្លាញចោលនូវឧបករណ៍នេសាទខុសច្បាប់ទាំងនោះនៅនឹងកន្លែង រួមមាន របាំងសាច់អួន ចំនួន ៦ របាំង មានប្រវែងសរុប ៣៨០ ម៉ែត្រ ឡុកសាច់អួនចំនួន ៨ ឡុក លូសាច់អួនចំនួន ៦ លូ បង្គោលឈើចំនួន ៣០០ ដើម និងដោះលែងត្រីចម្រុះចំនួន ១៥ គីឡូក្រាម ចូលទន្លេវិញ។
លោកថ្លែងថា៖ «នៅពេលនេះ ក្រុមកម្លាំងសមត្ថកិច្ចកំពុងបន្តស្រាវជ្រាវនៅតំបន់ខ្វែងក្របីនៃតំបន់រ៉ាមសារទន្លេឆ្មារ ជាកន្លែងដែលធ្លាប់មានបទល្មើសនេសាទកើតឡើងច្រើនជាងគេនាពេលកន្លងមក»។
បើតាមលោក ហង្ស ថុល ដែលបានថ្លែងកាលពីពេលថ្មីៗនេះ មន្ត្រីឧទ្យានុរក្សស្នាក់ការបាឡតបានសហការជាមួយកម្លាំងបញ្ជាការស្រាលនៃកងរាជអាវុធហត្ថខេត្តកំពង់ធំចុះល្បាតដល់តំបន់ខ្វែងក្របីនៃតំបន់រ៉ាមសារទន្លេឆ្មារនេះម្ដងរួចមកហើយ ដោយបានរកឃើញ និងកាប់បំផ្លាញចោលនៅនឹងកន្លែងនូវឧបករណ៍នេសាទខុសច្បាប់នៅនឹងកន្លែង រួមមាន របាំងស្បៃមុងចំនួន ៣ របាំង មានប្រវែងសរុប ៣១០ ម៉ែត្រ ឡុកស្បៃមុងចំនួន ៥ លូស្បៃមុងចំនួន ៥ លូ បង្គោលឈើចំនួន ២៥០ ដើម និងលែងត្រីចម្រុះចំនួន ៥ គីឡូក្រាមចូលក្នុងទន្លេធម្មជាតិវិញផងដែ។
ដោយឡែកនៅឯខេត្តស្ទឹងត្រែងវិញ សមត្ថកិច្ចជំនាញខណ្ឌរដ្ឋបាលជលផល បានប្រាប់ឱ្យដឹងថា ក្នុងរដូវបិទនេសាទ ចាប់ពីថ្ងៃទី ១ ខែឧសភា ដល់ ថ្ងៃទី ២២ ខែមិថុនា ឆ្នាំ ២០២២ នេះ សមត្ថកិច្ចបានចាប់ឃាត់ខ្លួនប្រជានេសាទចំនួន ៨៥ នាក់ ព្រមទាំងបានរឹបអូស និងបំផ្លាញចោលនូវឧបករណ៍នេសាទដូចជា មងបណ្តែតសរុបប្រវែងជិត ១ ម៉ឺន ៤ ពាន់ម៉ែត្រ សន្ទូចរនងដែលដាក់នៅតាមអន្លង់អភិរក្ស និងតំបន់ហាមឃាត់ចំនួន ១ ១២០ ផ្លែ ក្បាលឆក់ ៣ គ្រឿង អាគុយ ២ គ្រឿង ថ្នង ២ គ្រឿង ទូកម៉ាស៊ីនចំនួន ២ គ្រឿង និងបំផ្លាញរបាំងព្រួលប្រវែង ៤០០ ម៉ែត្រ លូសាច់អួន ៨ មាត់ លបប្រឹស ១៥ គ្រឿង និងសាច់អួនប្រវែង ៥០០ ម៉ែត្រ។
លោក ស្រី សមវិចិត្រ នាយខណ្ឌរដ្ឋបាលជលផលខេត្តស្ទឹងត្រែងបានប្រាប់ភ្នំពេញប៉ុស្តិ៍ថា ប្រជានេសាទទាំង ៨៥ នាក់ ដែលត្រូវបានឃាត់ខ្លួននោះ សមត្ថកិច្ចបានធ្វើការអប់រំណែនាំធ្វើកិច្ចសន្យាឱ្យបញ្ឈប់ការលួចឆ្មក់ចូលនេសាទក្នុងតំបន់ការពារអភិរក្សត្រីមេពូជ ជាពិសេសក្នុងរដូវត្រីពងកូននេះ។
លោកបញ្ជាក់ថា៖ «កុំថាឡើយមងបណ្ដែតខ្លីៗ សូម្បីតែសន្ទូចរនងក៏ត្រូវហាមឃាត់ប្រើប្រាស់ផងដែរ នៅក្នុងតំបន់អភិរក្សត្រីមេពូជ»៕
