.jpg)
អាគារគណបក្សប្រជាជនកម្ពុជា នៅមហាវិថីព្រះនរោត្តម។ ហេង ជីវ័ន
ភ្នំពេញៈ រដ្ឋបាលរាជធានីភ្នំពេញ នៅថ្ងៃទី ២៣ ខែមិថុនានេះ បានប្រកាសជាសាធារណៈនឹងបិទមហាវិថីព្រះនរោត្តម ចាប់ពីស្តុបជលផលដល់ស្ពានអាកាសក្បាលថ្នល់ និងបរិវេណជុំវិញខុន្ទកាល័យគណៈកម្មាធិការកណ្តាលគណបក្សប្រជាជនកម្ពុជា ចាប់ពីម៉ោង ៥ ព្រឹក នាថ្ងៃទី ២៨ ខែមិថុនា ដើម្បីអបអរសាទរខួបអនុស្សាវរីយ៍លើកទី៧១ នៃថ្ងៃបង្កើតគណបក្សប្រជាជនកម្ពុជា (២៨/០៦/១៩៥១-២៨/០៦/២០២២)។ យោងតាមសេចក្ដីជូនដំណឹង របស់ លោក ឃួង ស្រេង អភិបាលរាជធានីភ្នំពេញ។
លោក ឃួង ស្រេង បានឱ្យដឹងថា៖ «ដើម្បីឱ្យកម្មវិធីប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ព្រមទាំងបញ្ចៀសបាននូវការកកស្ទះចរាចរ រដ្ឋបាលរាជធានីភ្នំពេញនឹងបញ្ចៀសចរាចរចំពោះយានយន្តគ្រប់ប្រភេទលើកំណាត់មហាវិថីព្រះនរោត្តម ចាប់ពីស្តុបជលផល ផ្លូវលេខ ៤១ ដល់ ស្ពានអាកាសក្បាលថ្នល់ និងបរិវេណជុំវិញទីតាំងប្រារព្ធពិធី ចាប់ពីម៉ោង ០៥:០០ នាទីព្រឹក រហូតដល់បញ្ចប់កម្មវិធី»។
លោក ឃួង ស្រេង បានថ្លែងដោយសុំឱ្យប្រជាពលរដ្ឋទាំងអស់ យោគយល់ និងអធ្យាស្រ័យ និងបញ្ចៀសបានការធ្វើដំណើរឆ្លងកាត់កំណាត់ផ្លូវទាំងនេះ តាមកាលបរិច្ឆេទ។ ផុតរយៈពេលហាមឃាត់បណ្តោះអាសន្ននេះ រដ្ឋបាលរាជធានីភ្នំពេញ នឹងបើកឱ្យធ្វើចរាចរជាធម្មតាវិញ៕
