.jpg)
ឯកអគ្គរដ្ឋទូតតួកគីប្រចាំនៅកម្ពុជាដែលចប់អាណត្តិ លោកស្រី អាយដា អ៊ុនលូ និងលោកនាយករដ្ឋមន្ត្រី ហ៊ុន សែន។ រូបថត SPM
ភ្នំពេញៈ ឯកអគ្គរដ្ឋទូតតួកគីប្រចាំនៅកម្ពុជាដែលចប់អាណត្តិ លោកស្រី អាយដា អ៊ុនលូ (Ayda Unlu) បានថ្លែងថា លោកស្រីនឹងបន្តជំរុញឱ្យទំនាក់ទំនងរវាងកម្ពុជា និងតួកគី កាន់តែរឹងមាំ និងស៊ីជម្រៅថែមទៀត ទោះបីលោកស្រីបានចប់អាណត្តិជាឯកអគ្គរដ្ឋទូតក៏ដោយ។ នេះបើយោងតាមហ្វេសប៊ុកនាយករដ្ឋមន្ត្រី ហ៊ុន សែន។
ការថ្លែងរបស់លោកស្រីឯកអគ្គរដ្ឋទូត បានធ្វើឡើងនៅក្នុងជំនួបជាមួយលោក ហ៊ុន សែន នាថ្ងៃទី ២៣ ខែមិថុនា។
ហ្វេសប៊ុកដដែលបញ្ជាក់បន្ទាប់ពីជំនួបនេះថា៖ «លោកជំទាវពិតជាមានកិត្តិយសជាទីបំផុត ដែលបានមកបំពេញបេសកកម្មនៅកម្ពុជា ដើម្បីបានបម្រើទាំងតួកគី នឹងកម្ពុជា ហើយការចាកចេញពីប្រទេសកម្ពុជា លោកជំទាវ មានអារម្មណ៍ថា ដូចជាការចាកចេញពីផ្ទះដែលកំពុងតែរស់នៅ។ ទោះបីជាយ៉ាងណាក៏ដោយលោកជំទាវ អាយដា បានគោរពជម្រាបជូនសម្ដេចតេជោថា លោកជំទាវ នឹងបន្តធ្វើការធ្វើយ៉ាងណាឱ្យទំនាក់ទំនងរវាងប្រទេសទាំងពីរកាន់តែរឹងមាំ និងស៊ីជម្រៅថែមទៀត មិនថាលោកជំទាវនៅទីណាទេ»។
លោកស្រីអរគុណដល់លោក ហ៊ុន សែន ដែលបានផ្ដល់មេដាយសហមេត្រីថ្នាក់មហាសេរីវឌ្ឍន៍ ជូនលោកស្រី និងបានបញ្ជាក់ថា រយៈពេលជាង ៤ ឆ្នាំនៃបេសកកម្មនៅកម្ពុជា ទោះបីជំងឺកូវីដ១៩ បានរាតត្បាតពិភពលោកជាង ២ ឆ្នាំកន្លងមកក៏ដោយ ក៏លោកស្រីបានធ្វើការមួយចំនួនក្នុងការពង្រីកពង្រឹងទំនាក់ទំនងទាំងពាណិជ្ជកម្ម និងទាំងនយោបាយរវាងប្រទេសទាំង ២។ ក្នុងនោះលោកស្រី បានរៀបចំដំណើរទស្សនកិច្ចរបស់ថ្នាក់ដឹកនាំកម្ពុជាទៅកាន់ប្រទេសតួកគីជាបន្តបន្ទាប់ទៀត។
លោក ហ៊ុន សែន បានចាត់ទុកថា លោកស្រីមានស្នាដៃធំធេងក្នុងការបំពេញបេសកកម្មការទូតយ៉ាងរស់រវើក និងផ្លែផ្កា និងបានចូលរួមចំណែកយ៉ាងសកម្មតាមរយៈបេសកកម្មការទូតរបស់លោកស្រី ដែលបានពង្រឹង ពង្រីកទំនាក់ទំនងរវាងប្រទេសកម្ពុជា និងតួកគី។
ហ្វេសប៊ុកដដែលបន្តថា លោកស្រីបានរៀបចំឱ្យមានដំណើរទស្សនកិច្ចជាប្រវត្តិសាស្ត្ររបស់លោក ហ៊ុន សែន ទៅកាន់ប្រទេសតួកគី ដោយរៀបចំមូលដ្ឋានជាច្រើនសម្រាប់ពង្រីក ពង្រឹងទំនាក់ទំនងសេដ្ឋកិច្ច ដែលចាំតែពេលវេលាប៉ុណ្ណោះ ដោយទំហំពាណិជ្ជកម្មរវាងប្រទេសទាំង ២ នឹងកើនឡើងទៅដល់ចំនួនដែលបានកំណត់ទុក។
លោក ហ៊ុន សែន អរគុណដល់លោកស្រី អាយដា និងរដ្ឋាភិបាលតួកគី ដែលបានផ្ដល់ជំនួយដល់កម្ពុជាទាំងការជួយដល់ជនក្រីក្រ ការសង់ផ្ទះជូនជនក្រីក្រ និងការធ្វើផ្លូវតាមជនបទ។
កាលពីខែកុម្ភៈ លោក ប្រាក់ សុខុន រដ្ឋមន្ត្រីការបរទេសកម្ពុជាបានទៅបំពេញទស្សនកិច្ចនៅប្រទេសតួកគីរយៈពេល ២ ថ្ងៃ ហើយលោកបានបើកសម្ពោធស្ថានទូតរបស់កម្ពុជានៅក្នុងប្រទេសតួកគី ដើម្បីលើកកម្ពស់ទំនាក់ទំនងទ្វេភាគីឆ្ពោះឡើង ១ កម្រិតទៀត។ លោកក៏ធ្លាប់បានទៅបំពេញទស្សនកិច្ចនៅប្រទេសនេះកាលពីឆ្នាំ ២០១៨ ផងដែរ។
កាលពីឆ្នាំ ២០២០ លោក ទៀ បាញ់ រដ្ឋមន្ត្រីក្រសួងការពារជាតិ បានដឹកនាំប្រតិភូយោធាទៅបំពេញទស្សនកិច្ចនៅប្រទេសតួក គីរយៈពេល ៦ ថ្ងៃ។
កាលពីឆ្នាំ ២០១៨ លោក ហ៊ុន សែន បានទៅបំពេញទស្សនកិច្ចនៅប្រទេសតួក គីរយៈពេល ២ ថ្ងៃ និងបានចុះហត្ថលេខាលើកិច្ចព្រមព្រៀងមួយចំនួន ដើម្បីពង្រឹងកិច្ចសហ ប្រតិបត្តិការប្រទេសទាំង ២។
ចំណែក រដ្ឋមន្ត្រីក្រសួងមហាផ្ទៃ លោក ស ខេង វិញ ក៏បានទៅបំពេញទស្សនកិច្ចនៅប្រទេសតួក គីនៅឆ្នាំ ២០១៩ ផងដែរ។ លោកក៏បានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការលើវិស័យសន្តិសុខរវាងកម្ពុជា និងតួកគី។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពថ្លែងថា តួកគីប្រហែលជាមិនជាប្រទេសដែលសំខាន់ដែលកម្ពុជាផ្តោតការយកចិត្តទុកដាក់សំខាន់ខ្លាំងទៅលើបញ្ហាសេដ្ឋកិច្ច និងពាណិជ្ជកម្ម នោះទេ ប៉ុន្តែយ៉ាងហោចណាស់ក៏ជាប្រទេសមួយនៅក្នុងសហគមន៍អឺរ៉ុបដែលដើរតួនាទីសំខាន់មួយផ្នែកដែរ។
លោកថ្លែងថា៖ «សម្រាប់ទំនាក់ទំនងនៅក្នុងតំបន់អឺរ៉ុបជាមួយអាស៊ី តិចឬច្រើន គឺត្រូវតែផ្សារភ្ជាប់ជាមួយនឹងវិបត្តិនៅអ៊ុយក្រែន ជាពិសេសគឺសង្គ្រាមនៅអ៊ុយក្រែន ហើយក៏វាផ្សារភ្ជាប់គ្នាដែរចំពោះទីផ្សារកម្ពុជាទៅកាន់សហភាពអឺរ៉ុប។ កម្ពុជាក៏នឹងត្រូវការការពង្រឹងនូវដៃគូក៏ដូចជាទីផ្សារពាណិជ្ជកម្មរបស់ខ្លួនឲ្យកាន់តែមានភាពរឹងមាំដែរទៅថ្ងៃអនាគត»។
លោក យង់ គិមអេង ថ្លែងថា ពិតមែនតែតួកគីមិនមែនជាប្រទេសដែលផ្ដោតទៅលើបញ្ហាប្រជាធិបតេយ្យ ក៏ប៉ុន្តែបើសិនជាកម្ពុជាចង់ចូលនៅក្នុងទីផ្សារសហគមន៍អឺរ៉ុបដែលកម្ពុជាមិនផ្ដោតតែទៅលើតួកគី ប្រហែលកម្ពុជាត្រូវការកែលម្អលក្ខខណ្ឌជាច្រើនទាំងបញ្ហាសិទ្ធិមនុស្សទាំងបញ្ហាប្រជាធិបតេយ្យ និងបញ្ហាគុណភាពនៃទំនិញផ្សេងៗទៀតរបស់កម្ពុជាឱ្យកាន់តែមានភាពល្អប្រសើរ៕
