.jpg)
កិច្ចប្រជុំសម្របសម្រួលវិវាទរវាងតំណាងកូដករនិងតំណាងក្រុមហ៊ុនណាហ្គាវើលដ៍។ រូបថត ក្រសួងការងារ
ភ្នំពេញៈ កិច្ចចរចារកដំណោះស្រាយវិវាទការងាររួមនៅក្រុមហ៊ុនណាហ្គាវើលដ៍ លើកទី១៤ ដែលសម្របសម្រួលដោយក្រសួងការងារ មិនទាន់ឈានដល់ចំណុចរួម ខណៈក្រុមហ៊ុនណាហ្គាវើលដ៍ក៏បានផ្អាកបង់ភាគទាន ប.ស.ស. ដល់អ្នកកូដករដោយអះអាងថាមិនបានបំពេញការងារ។
សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា នៅរសៀលថ្ងៃទី ២២ ខែ មិថុនា ឆ្នាំ ២០២២ នេះ ក្រសួងបានបន្តអញ្ជើញគូភាគីវិវាទមកជួបប្រជុំដោះស្រាយ ជាលើកទី១៤ ដោយមានការចូលរួមពីតំណាងភាគីកម្មករនិយោជិត និងតំណាងភាគីនិយោជក ដូចសព្វដង។ ក្នុងនោះ មតិរបស់តំណាងភាគីកម្មករនិយោជិត ឈរលើឆន្ទៈរបស់កូដករដែលរក្សាជំហរដដែល ដោយស្នើឱ្យកម្មករនិយោជិត ២០០ នាក់ ដែលបានបញ្ឈប់ពីការងារឱ្យចូលធ្វើការងារវិញ។ ស្នើសុំបើកការិយាល័យសហជីពដែលស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ ឡើងវិញ ដើម្បីធ្វើការទំនាក់ទំនងការងារវិញ ដោយសារម្ចាស់ផ្ទះនៅតែបន្តទាមទារប្រាក់ជួលផ្ទះ ដែលមានម៉ូតូ និងសម្ភារផ្សេងៗនៅក្នុងនោះ។ ស្នើសុំទម្លាក់រាល់បទចោទទាំងអស់ដល់ថ្នាក់ដឹកនាំ និងសមាជិកដែលត្រូវបានចោទប្រកាន់។
តំណាងសហជីពក៏បាន ស្នើក្រុមហ៊ុនបញ្ឈប់ការរើសអើងអ្នកធ្វើកូដកម្ម តាមរយៈការផ្អាកបង់ភាគទាន ប.ស.ស. និងមិនផ្តល់អត្ថប្រយោជន៍សម្រាប់ស្ត្រីសម្រាកលម្ហែមាតុភាព បើផ្អែកតាមគោលការណ៍មនុស្សធម៌ កូដករដែលអត់ ចំណូលរាប់ខែហើយមិនទទួលបានថវិកាពេលសម្រាលកូន និងមិនអាចប្រើសេវា ប.ស.ស. បានពេលមានជំងឺ ជារឿងមិនគួរកើតមានទេ។
សហជីព គូសបញ្ជាក់ថា នេះមិនមែនជាការអវត្តមានគ្មានច្បាប់ពីការងារទេ ប៉ុន្តែជាការអនុវត្តសិទ្ធិដែលមាន ចែងក្នុងច្បាប់ ហើយក៏មិនមានច្បាប់ស្ដីពី ប.ស.ស. ដែលចែងថានិយោជកអាចផ្អាកបង់ភាគទាន ប.ស.ស. នៅពេលដែលកម្មករនិយោជិតធ្វើកូដកម្មដូចគ្នា។ ចំណែកមតិរបស់តំណាងក្រុមហ៊ុនណាហ្គាវើលដ៍ បានលើកឡើងថា ចំនួនបុគ្គលិកដែលបានបញ្ឈប់ពីការងាររួមដែលនៅសេសសល់ត្រឹមតែ ១៧២ នាក់ និងអំពាវនាវឱ្យកម្មករដែលនៅសេសសល់ទាំងនេះគួរតែទទួលយកការសម្របសម្រួលពីក្រសួងការងារ ឬជំនួយក្នុង ការបកស្រាយបន្ថែមអំពីកញ្ចប់បញ្ចប់កិច្ចសន្យាដោយការព្រមព្រៀង។
ក្រុមហ៊ុនបានឱ្យដឹងថា មកដល់ពេលនេះចំនួនបុគ្គលិកអវត្តមានដោយគ្មានច្បាប់មានចំនួន ៣៥៥ នាក់ ប៉ុណ្ណោះនិងអំពាវនាវឱ្យបងប្អូន មិនគួរបន្តអវត្តមានដោយគ្មានច្បាប់ទៀតទេ និងត្រឡប់មកធ្វើការវិញទាន់ពេលក្រុមហ៊ុនបន្តអនុញ្ញាតឱ្យចូលធ្វើការវិញ ដោយមិនប្រកាន់ទោសពៃរ៍នោះទេ។
ទាក់ទងការផ្អាកបង់ ប.ស.ស. វិញ ក្រុមហ៊ុនថា៖«ជាធម្មតា ការបង់ភាគទានជូន ប.ស.ស. ត្រូវផ្អែកលើចំណូលជាក់ស្តែងរបស់បុគ្គលិកម្នាក់ៗ បើបុគ្គលិកមិនបានធ្វើការ ហើយគ្មានចំណូល ក្រុមហ៊ុនមិនអាចបង់ភាគទាន ប.ស.ស. សម្រាប់បុគ្គលិកនោះទេ។ ដូច្នេះ មិនមានការរើសអើងចំពោះអ្នកធ្វើកូដកម្ម ដូចការលើកឡើងនោះទេ»។
ក្រសួងការងារ បានកំណត់កាលបរិច្ឆេទប្រជុំបន្ទាប់ នៅថ្ងៃទី ៦ ខែ កក្កដា ឆ្នាំ ២០២២ វេលាម៉ោង ១៤:៣០ នាទី ដើម្បីឱ្យភាគីទាំងពីរមានឱកាសពិចារណាឡើងវិញ អំពីលទ្ធភាពនៃការសម្បទានគ្នាទៅវិញទៅមកដែលអាចឈានទៅបញ្ចប់វិវាទនេះ។
សូមជម្រាបថា ក្រុមកូដករណាហ្គាវើលដ៍ប្រមាណ ១០០ នាក់ កាលពីថ្ងៃទី ២០ ខែ មិថុនា ឆ្នាំ ២០២២ នេះ បានដើរទៅដាក់ញាត្តិនៅខុទ្ទការិយាល័យសម្តេចនាយករដ្ឋមន្ត្រី ក្រោមដើមពោធិ៍នៅមុខវត្តបុទុមវតី និងរដ្ឋសភា ក្នុងគោលបំណងស្នើថ្នាក់ដឹកនាំកំពូលផ្តល់កិច្ចអន្តរាគមន៍ក្នុងវិវាទនេះ ឱ្យបានឆាប់រហ័ស និងទទួលយកបានទាំងសងខាង។
លោក ហេង សុផាន់ណារិទ្ធ ប្រធានការិយាល័យគោលនយោបាយនៃ (ប.ស.ស.) ប្រាប់ ភ្នំពេញ ប៉ុស្តិ៍ថា ជាគោលការណ៍ក្រុមហ៊ុនដែលបង់ភាគទានចូល ប.ស.ស នឹងទទួលបានសេវា ប៉ុន្តែបើសិនក្រុមហ៊ុនមិនបង់ភាគទានចូល ប.ស.ស. ចាប់ពី ២ ខែឡើងទៅ កម្មករនិយោជិតនឹងមិនទទួលសេវាបានទេ។ ប៉ុន្តែលោកថា ចំពោះករណីណាហ្គាវើលដ៍លុះណាតែមានការចុះអង្កេត ទើបអាចសន្និដ្ឋានបាន។
លោកថា៖ «ខ្ញុំមិនទាន់អាចសន្និដ្ឋានបានទេដោយសារយើងមិនទាន់ដឹងថា រឿងយ៉ាងម៉េច ជាធម្មតាថាមកពីកម្មករខ្លួនឯងឬមកពីក្រុមហ៊ុន យើងត្រូវពិនិត្យអង្គហេតុ នៅក្នុងករណីគាត់មានគ្រោះថ្នាក់ បើគាត់នៅប្រើប្រាស់សេវា ប.ស.ស. យើងចាត់ឱ្យអធិការកិច្ចចុះទៅអង្កេតថា ផ្តល់សេវា ឬមិនផ្តល់»៕
