.jpg)
លោក សេរី ជំនះ អនុរដ្ឋលេខាធិការក្រសួងអប់រំ ថ្លែងក្នុងកម្មវិធីការស្ម័គ្រចិត្ត ដើម្បីសហគមន៍ខ្ញុំ កាលីថ្ងៃទី ២២ ខែមិថុនា។ MoEYS
ភ្នំពេញៈ មន្ត្រីជាន់ខ្ពស់ក្រសួងអប់រំ យុវជន និងកីឡាបានលើកឡើងថា ការងារស្ម័គ្រចិត្ត គឺជាកត្តាសំខាន់ដែលជាការរួមចំណែកដល់ស្មារតីនៃសាមគ្គីភាព មនុស្សធម៌ និងគុណធម៌ក្នុងចំណោមយុវជនក្នុងគ្រួសារ និងសហគមន៍ ដែលយុវជនទាំងអស់ត្រូវបានលើកទឹកចិត្តឱ្យចូលរួមក្នុងការកែលម្អសហគមន៍ និងសង្គមកម្ពុជាតាមរយៈការងារស្ម័គ្រចិត្ត។
លោក សេរី ជំនះ អនុរដ្ឋលេខាធិការក្រសួងអប់រំបានថ្លែងនាថ្ងៃទី ២២ ខែមិថុនា ក្នុងពិធីបើកវគ្គបណ្ដុះបណ្ដាលកម្មវិធី «ការងារស្ម័គ្រចិត្ត ដើម្បីសហគមន៍ខ្ញុំ ឆ្នាំ ២០២២» និងការប្រកាសដាក់ឱ្យប្រើប្រាស់គេហទំព័រផ្លូវការរបស់ ស.ស.ខ។ ក្នុងឆ្នាំ ២០២២ នេះ កម្មវិធីការស្ម័គ្រចិត្ត ដើម្បីសហគមន៍ខ្ញុំ (ស.ស.ខ) បាននិងកំពុងអនុវត្តនៅទូទាំង ២៥ រាជធានីខេត្ត ដែលមានយុវជនស្ម័គ្រចិត្តសរុបជាង ៤០០ នាក់។ ការងារស្ម័គ្រចិត្តជាយុទ្ធសាស្ត្រមួយក្នុងចំណោមយុទ្ធសាស្ត្រទាំង ១២ ដែលបានកំណត់នៅក្នុងគោលនយោបាយជាតិស្តីពីការអភិវឌ្ឍយុវជនកម្ពុជា និងតាមរយៈវេទិកាជាតិស្ដីពីការស្ម័គ្រចិត្តនៅកម្ពុជា ដែលតែងតែបានប្រារព្ធធ្វើជារៀងរាល់ឆ្នាំដោយក្រសួងអប់រំ សហការជាមួយអង្គការជាតិ និងអន្តរជាតិ និងដៃគូពាក់ព័ន្ធនានា។
លោក សេរី ជំនះថ្លែងថា៖ «បេសកកម្មការងារស្ម័គ្រចិត្តនៅកម្ពុជាបាននិងកំពុងជំរុញឱ្យមានការយកចិត្តទុកដាក់លើការងារស្ម័គ្រចិត្តនេះ ដោយធ្វើការផ្សព្វផ្សាយ ការបណ្តុះបណ្តាល និងកៀរគរលើកទឹកចិត្តដល់យុវជនមកពីគ្រប់មជ្ឈដ្ឋានក្នុងសង្គមឱ្យចូលរួមបរិច្ចាគជាពេលវេលា ធនធាន សមត្ថភាព និងជំនាញរបស់ខ្លួន ដើម្បីបម្រើ និងកសាងសហគមន៍ឱ្យមានការរីកចម្រើនប្រកបដោយវិជ្ជមាន»។
លោកបញ្ជាក់ទៀតថា ការងារស្ម័គ្រចិត្ត គឺជាកត្តាសំខាន់ ដែលរួមចំណែកដល់ស្មារតីនៃសាមគ្គីភាព មនុស្សធម៌ និងគុណធម៌ក្នុងចំណោមយុវជនក្នុងគ្រួសារ និងសហគមន៍របស់ពួកគេ។ ការអភិវឌ្ឍប្រទេស គឺផ្សារភ្ជាប់នឹងការងារស្ម័គ្រចិត្តរបស់យុវជនហើយយុវជនទាំងអស់ត្រូវបានលើកទឹកចិត្តឱ្យចូលរួមក្នុងការកែលម្អសហគមន៍ និងសង្គមកម្ពុជាតាមរយៈការងារស្ម័គ្រចិត្ត។
យោងតាមក្រសួងអប់រំ កម្មវិធី ស.ស.ខ មានគោលបំណង ៣ សំខាន់ៗគឺ ដើម្បីយុវជន ដើម្បីសហគមន៍ និងដើម្បីស្ថាប័ន។ ប្រភពដដែលបន្តថា «ដើម្បីយុវជន» គឺមានគោលបំណងក្នុងការពង្រឹងសមត្ថភាពបំណិនទន់ បំណិនបច្ចេកទេស និងបច្ចេកវិទ្យាដល់យុវជនស្ម័គ្រចិត្ត ទាំងយុវជនក្នុងសាលា និងយុវជនក្រៅសាលា តាមរយៈការរៀនតាក់តែង និងអនុវត្តគម្រោងសម្រាប់ជួយដល់ការអភិវឌ្ឍសហគមន៍។
ចំណែក «ដើម្បីសហគមន៍» គឺមានគោលបំណងក្នុងការចូលរួមដល់ការអភិវឌ្ឍក្នុងសហគមន៍ ការលើកកម្ពស់ការយល់ដឹង ការគាំទ្រពីសហគមន៍ ស្ថាប័នពាក់ព័ន្ធ និងដៃគូអភិវឌ្ឍន៍ ព្រមទាំងលើកកម្ពស់ការយល់ដឹងអំពីផលប្រយោជន៍នៃការងារស្ម័គ្រចិត្តរបស់យុវជន។
រីឯ «ដើម្បីស្ថាប័ន» គឺមានគោលបំណងពង្រឹងសមត្ថភាពរបស់នាយកដ្ឋានគ្រប់គ្រងមជ្ឈមណ្ឌល និងមន្ទីរអប់រំ យុវជន និងកីឡា ដើម្បីបង្កើនប្រព័ន្ធការងារមួយដែលមានលក្ខណៈស្តង់ដា និងទំនើបនិយម តាមរយៈការប្រើប្រាស់បច្ចេកវិទ្យាព័ត៌មានក្នុងគោលបំណងផ្ដល់ការគាំទ្រ និងសម្របសម្រួលដល់ការងារស្ម័គ្រចិត្តក្នុងចំណោមយុវជនឱ្យកាន់តែមានប្រសិទ្ធភាព។
នាឱកាសនោះដែរលោក សេរី ជំនះ ក៏បានជំរុញលើកទឹកចិត្តឱ្យមានការបង្កើតកម្មវិធីថ្មីៗដល់យុវជនទាំងក្នុងសាលា និងក្រៅសាលារៀន ដែលជាការផ្ដល់ឱកាសឱ្យពួកគេទទួលបានការអប់រំ ការបណ្ដុះបណ្ដាលជំនាញវិជ្ជាជីវៈ និងការលើកទឹកចិត្តឱ្យមានគំនិតច្នៃប្រឌិតលើជំនាញរបស់ខ្លួន។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានលើកឡើងនាឱកាសបើកវគ្គបណ្ដុះបណ្ដាលយុវជនស្ម័គ្រចិត្តទាំង ២៥ រាជធានី-ខេត្តនៃកម្មវិធីការស្ម័គ្រចិត្ត ដើម្បីសហគមន៍ខ្ញុំកាលពីថ្ងៃទី ១៣ ខែមិថុនា កន្លងទៅដោយលោកបានពន្យល់ថា ហេតុអ្វីបានជាការងារស្ម័គ្រចិត្តនេះមានសារៈសំខាន់សម្រាប់ប្រជាជន?
លោកបានលើកឡើងថា លោកនាយករដ្ឋមន្ត្រី ហ៊ុន សែន បានដាក់ចេញនូវយុទ្ធសាស្ត្រចតុកោណដែលក្នុងយុទ្ធសាស្ត្រមានគោលដៅឱ្យយុវជនមានជំនាញមួយយ៉ាងតិច ដើម្បីអាចឱ្យយុវជនមានសមត្ថភាពផ្ទាល់ខ្លួន និងអាចចូលរួមចំណែកអភិវឌ្ឍសេដ្ឋកិច្ចសង្គមបាន។
លោក ហង់ជួន ណារ៉ុន បានមានប្រសាសន៍ថា៖ «ការងារស្ម័គ្រចិត្តនេះគឺជាឱកាសមួយដែលធ្វើឱ្យយុវជនយើងទទួលបាននូវបទពិសោធជាក់ស្តែង ហើយប្រើប្រាស់នូវចំណេះដឹង ដែលយើងរៀនពីសាលា ដើម្បីយកមកធ្វើការងារអ្វីមួយធ្វើជាបទពិសោធ»។
លោករដ្ឋមន្ត្រីបានបន្ថែមថា ការងារស្ម័គ្រចិត្តនឹងផ្តល់ឱកាសឱ្យយុវជន សិស្សានុសិស្សបានយល់ច្បាស់ពីការងារជាក់ស្តែងនៅក្នុងសហគមន៍ និងពីរបៀបធ្វើការងារនៅតាមទីកន្លែងធ្វើការនានា៕
