.jpg)
ជនសង្ស័យជួញដូរគ្រឿងញៀន ៣ នាក់ត្រូវនគរបាលខណ្ឌដង្កោឃាត់ខ្លួននៅថ្ងៃទី ២២ មិថុនា។ រូបថត នគរបាល
ភ្នំពេញៈ ក្នុងរយៈពេល ២ ថ្ងៃគឺនៅថ្ងៃទី ២២ និងទី ២៣ មិថុនា សមត្ថកិច្ចបានឃាត់ខ្លួនជនសង្ស័យរហូតដល់ ១២៧ នាក់នៅទូទាំងប្រទេសក្នុងប្រតិបត្តិការបង្ក្រាបបទល្មើសគ្រឿងញៀនជាមួយនឹងវត្ថុតាងគ្រឿងញៀនមួយចំនួន។ នេះបើតាមអគ្គស្នងការដ្ឋាននគរបាលជាតិ។
ជនសង្ស័យចំនួន ៦៦ នាក់( ស្រី ៥ នាក់ ) ត្រូវបានសមត្ថកិច្ចឃាត់ខ្លួនក្នុងប្រតិបត្តិការបង្ក្រាបបទល្មើសគ្រឿងញៀនចំនួន ២៣ ករណីទូទាំងប្រទេសនៅថ្ងៃទី ២៣ ខែមិថុនា។
ក្នុងចំណោមជនសង្ស័យទាំងចំនួន ៦៦ នាក់នេះ រួមមាន ជួញដូរ ៩ ករណី ឃាត់ខ្លួន ១៩ នាក់( ស្រី ១ នាក់ ) ដឹកជញ្ជូនរក្សាទុក ២ ករណីឃាត់ខ្លួន ៣ នាក់ (ស្រី ២ នាក់) ប្រើប្រាស់ ១២ ករណី ឃាត់ខ្លួន ៤៤ នាក់ (ស្រី ២ នាក់ )។
វត្ថុតាងដែលចាប់យកសរុបក្នុងថ្ងៃទី ២៣ ខែមិថុនារួមមាន មេតំហ្វេតាមីន (Ice) ចំនួន ១៦៩,៣៣ ក្រាម និង ៧ កញ្ចប់ តូច និងមេតំហ្វេតាមីន (wy) ចំនួន ១០,៩៨ ក្រាម។
បទល្មើសទាំងនេះត្រូវបានបង្ក្រាបដោយកងកម្លាំងនគរបាលនៃមន្ទីរប្រឆាំងគ្រឿងញៀន កងកម្លាំងនគរបាលខេត្តបាត់ដំបង កណ្តាល ព្រះវិហារ រាជធានីភ្នំពេញ ពោធិ៍សាត់ រតនគិរី សៀមរាប និងស្វាយរៀង។
ចំណែកនៅថ្ងៃទី ២២ មិថុនា ជនសង្ស័យចំនួន ៦១ នាក់ ( ស្រី ៦ នាក់ ) ត្រូវបានសមត្ថកិច្ចឃាត់ខ្លួនក្នុងប្រតិបត្តិការបង្ក្រាបបទល្មើសគ្រឿងញៀនចំនួន ២០ ករណីទូទាំងប្រទេស។
ក្នុងចំណោមជនសង្ស័យទាំងចំនួន ៦១ នាក់រួមមាន ជួញដូរ ១០ ករណីឃាត់ខ្លួន ២៦ នាក់ ( ស្រី ៥ នាក់ ) ដឹកជញ្ជូន រក្សាទុក ១ ករណី ឃាត់ខ្លួន ២ នាក់ប្រើប្រាស់ ៩ ករណីឃាត់ខ្លួន ៣៣ នាក់( ស្រី ១ នាក់)៕
