សៀមរាបៈ ផ្ទះពលរដ្ឋចំនួន ៦៦ ខ្នងត្រូវបានសាងសង់ថ្មីជួសជុល កែលម្អ, បង្គន់អនាម័យ ១៩ បង្គន់, ប្រព័ន្ធចម្រោះទឹកស្អាតសហគមន៍ ១ ទីតាំង និងសមិទ្ធផលផ្សេងៗក៏ត្រូវបានសាងសង់ឡើង ដែលធ្វើឱ្យភូមិពើងឆ័ត្រដែលភូមិក្រីក្របំផុតក្នុងស្រុកបន្ទាយស្រីកែប្រែមុខមាត់ថ្មី។ នេះបើយោងតាមលោកអភិបាលស្រុក ឃឹម ហ្វីណង់ ដែលបានបង្ហាញលទ្ធផលនៃគម្រោងសាកល្បងរយៈពេល ៣ ឆ្នាំមួយ។
ក្រៅពីនោះតាមរយៈគម្រោងសហការរវាងរដ្ឋបាលស្រុកបន្ទាយស្រី និងអង្គការលំនៅឋានមនុស្សជាតិកម្ពុជាកាលពីឆ្នាំ ២០២០ កន្លងមក ពលរដ្ឋ ២៥ គ្រួសារក៏ត្រូវបានផ្តល់ថវិកា និងទ្រទ្រង់ដល់ការបង្កើតមុខរបរខ្នាតតូច ហើយក៏មានការផ្តល់ការតភ្ជាប់អគ្គិសនីដោយប្រព័ន្ធសូឡា និងបណ្តាញចែកចាយផ្គត់ផ្គង់ទឹកស្អាតតាមផ្ទះបាន ៣២ គ្រួសារ គ្រប់គ្រងដោយសហគមន៍ផងដែរ។ លទ្ធផលសំខាន់ៗផ្សេងទៀតរួមមាន ការអប់រំ បណ្តុះបណ្តាលដល់អ្នកភូមិពីការថែទាំផ្ទះ អនាម័យ ការរស់នៅស្អាត ការគ្រប់គ្រងថវិកាគ្រួសារ និងមុខរបរ និងការបង្កើត និងពង្រឹងសមត្ថភាពគណៈកម្មការ (ក្រុមតំណាង) សហគមន៍ ដើម្បីជួយគាំទ្រ និងសម្របសម្រួលដល់ការងាររបស់គម្រោងជាប្រចាំ។
លោក ហ្វីណង់ បានសរសេរនៅលើហ្វេសប៊ុករបស់លោកថា «អ្នកភូមិពើងឆ័ត្រប្រែហើយ» ប្រែពីទម្លាប់រស់នៅដាច់ដោយឡែកៗពីគ្នាមកជារបៀបរស់នៅបែបជាសហគមន៍, ពីការរស់នៅបណ្តែតបណ្តោយតាមយថាកម្មមកធ្វើជាម្ចាស់នៅលើបញ្ហាប្រឈមនៅក្នុងសហគមន៍របស់ខ្លួន, ពីធ្លាប់តែរុកចូលព្រៃធ្វើចំណាកស្រុក ដើម្បីរករបរចិញ្ចឹមក្រពះមកជាអ្នកដាំបន្លែ ចិញ្ចឹមមាន់ ចិញ្ចឹមឃ្មុំ ដើម្បីផ្គត់ផ្គង់ជីវភាពវិញម្តង, ពីផ្ទះសម្បែងមិនសូវមានរបៀបរៀបរយ និងជួនកាលគ្មានសូម្បីតែបង្គន់អនាម័យប្រើប្រាស់ មកជាមានលំនៅឋានសមរម្យថ្លៃថ្នូរអាចរស់នៅបានសឹងតែគ្រប់ៗគ្នា, ពីគ្មានទឹកបរិភោគប្រើប្រាស់នៅរៀងរាល់រដូវប្រាំងមកជាមានបណ្តាញទឹកស្អាតរបស់សហគមន៍បំបែករត់មកដល់ផ្ទះរៀងៗខ្លួន, ពីសំឡេងគាំទ្រការដឹកនាំរបស់អាជ្ញាធរមូលដ្ឋានត្រឹមតែជាង ៣០% កាលពី ៥ ឆ្នាំមុន មកជាតំបន់ដែលផ្តល់ការគាំទ្រដល់មេភូមិរបស់ខ្លួនរហូតដល់ទៅ ៩០%។
លោកបានឱ្យដឹងថា “ពើងឆ័ត្រ” គឺជាភូមិដ៏តូចមួយនៅក្នុងឃុំឃុនរាម ដែលមានប្រជាពលរដ្ឋរស់នៅត្រឹមតែ ១៣៩ គ្រួសារប៉ុណ្ណោះ ប៉ុន្តែមានអត្រានៃភាពក្រីក្ររហូតដល់ទៅជាង ៤០% ដែលជាអត្រាខ្ពស់ជាងគេបំផុតនៅក្នុងស្រុកបន្ទាយស្រី។ ២ ឆ្នាំបានកន្លងផុតទៅ ថវិកាជាងពាក់កណ្តាលនៃថវិកាសរុបជិត ២០ ម៉ឺនដុល្លារ ក៏ត្រូវបានប្រើប្រាស់រួចមកហើយ។ ក្រុមការងារពិតជាបានធ្វើឱ្យមានការផ្លាស់ប្តូរជាវិជ្ជមានសម្រាប់ភូមិមួយនេះត្រឹមតែក្នុងរយៈពេលខ្លី និងមានភាពខុសប្លែកពីមុនស្ទើរតែរកកន្លែងចំណាំមិនបាន។
បន្ថែមពីលើវិសាលភាពនៃគម្រោងរដ្ឋបាលស្រុកបន្ទាយស្រីក៏បានជំរុញឱ្យមានការជួយជ្រោមជ្រែងក្រោមរូបភាពផ្សេងៗទៀត ដូចជា តាមរយៈការវិនិយោគទៅលើហេដ្ឋារចនាសម្ព័ន្ធសាធារណៈ ការបំពាក់អំពូលសូឡានៅតាមផ្ទះ ការតភ្ជាប់បណ្តាញអគ្គិសនី និងការជួយដោះស្រាយបញ្ហាកង្វះខាតទឹកប្រើប្រាស់ សំដៅធ្វើយ៉ាងណាឱ្យអ្នកភូមិពើងឆ័ត្រអាចមានឱកាសងើបផុតពីភាពក្រីក្រ និងធ្វើការតភ្ជាប់ភូមិពើងឆ័ត្រចូលទៅក្នុងចរន្តសេដ្ឋកិច្ចរបស់ស្រុក ដើម្បីទទួលបានឱកាសការងារ មុខរបរ និងលើកស្ទួយជីវភាពប្រជាជននៅក្នុងភូមិឱ្យបានប្រសើរឡើងដូចភូមិដទៃទៀតនៅក្នុងស្រុកបន្ទាយស្រីផងដែរ៕