ក្នុងគោលបំណងរួមចំណែកផ្សព្វផ្សាយគោលដៅសហគមន៍ទេសចរណ៍ និងអេកូទេសចរណ៍ ដែលជាសសរស្តម្ភមួយក្នុងការទ្រទ្រង់វិស័យទេសចរណ៍ក្នុងអំឡុងពេលវិបត្តិជំងឺកូវីដ ១៩ ពិសេសចូលរួមសម្រេចយុទ្ធនាការ «ស្រលាញ់ជាតិត្រូវស្គាល់ទឹកដី» ក្រសួងទេសចរណ៍បានបង្កើតឱ្យមានការប្រឡងប្រណាំងសហគមន៍ទេសចរណ៍ និងអេកូទេសចរណ៍គំរូលើកទី ៣ ឆ្នាំ ២០២២។
យោងតាមក្រសួងទេសចរណ៍កាលពីថ្ងៃទី ២៣ ខែមិថុនាបានឱ្យដឹងថា ក្រសួងទេសចរណ៍ និងគណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍បានដាក់ចេញនូវការប្រឡងប្រណាំងសហគមន៍ទេសចរណ៍ និងអេកូទេសចរណ៍គំរូលើកទី ៣ ឆ្នាំ ២០២២ ដែលដំណាក់កាលទី ១ នឹងធ្វើឡើងក្នុងខែកក្កដាខាងមុខនេះ។
បេក្ខភាពទាំងអស់អាចស្នើសុំទម្រង់បែបបទចុះឈ្មោះប្រឡងប្រណាំងដោយផ្ទាល់នៅមន្ទីរទេសចរណ៍រាជធានី-ខេត្ត។ នៅក្រសួងទេសចរណ៍ (នាយកដ្ឋានអភិវឌ្ឍន៍ផលិតផលទេសចរណ៍ និងលេខាធិការដ្ឋានគណៈកម្មការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍) បេក្ខភាពត្រូវដាក់ពាក្យចូលរួមប្រឡងប្រណាំងដោយបំពេញឱ្យបានត្រឹមត្រូវ និងភ្ជាប់ជាមួយឯកសារពាក់ព័ន្ធ រួចបញ្ជូនមកក្រសួងទេសចរណ៍ ឬតាមរយៈមន្ទីរទេសចរណ៍រាជធានី-ខេត្តរៀងរាល់ម៉ោងធ្វើការ ឬតាមរយៈតេឡេក្រាមលេខ៖ ០១០ ៥០៩ ៨១៨។
ក្រសួងបានបន្តថា សម្រាប់ដំណាក់កាលទី ២ នៅខែសីហា ដែលគណៈកម្មការវាយតម្លៃនឹងធ្វើការត្រួតពិនិត្យ និងចុះវាយតម្លៃផ្ទៀងផ្ទាត់លើឯកសារពាក់ព័ន្ធ និងស្ថានភាពជាក់ស្តែងរបស់បេក្ខភាពដែលបានដាក់ពាក្យចូលរួមការប្រឡងប្រណាំង។
ចំណែកដំណាក់កាលទី ៣ ក្នុងខែកញ្ញា ដែលគណៈកម្មការវាយតម្លៃនឹងប្រមូលទិន្នន័យរួចរៀបចំរបាយការណ៍ចុងក្រោយ ដើម្បីឈានទៅប្រកាសលទ្ធផលជយលាភី។
ក្នុងដំណាក់កាលទី ៤ នៅខែតុលា គណៈកម្មការវាយតម្លៃនឹងជូនដំណឹងអំពីជយលាភីដល់បេក្ខភាពដែលចូលរួមការប្រឡងប្រណាំង ហើយដំណាក់កាលទី ៥ នៅខែវិច្ឆិកា ក្រសួងទេសចរណ៍ និងគណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍នឹងរៀបចំពិធីប្រគល់រង្វាន់ដល់ជយលាភីការប្រឡងប្រណាំងសហគមន៍ទេសចរណ៍ និងអេកូទេសចរណ៍គំរូលើកទី ៣ ឆ្នាំ ២០២២ នាឱកាសវេទិកាជាតិអេកូទេសចរណ៍លើកទី ៣ ដែលនឹងប្រព្រឹត្តទៅនាថ្ងៃទី ២១-២២ ខែវិច្ឆិកា ឆ្នាំ ២០២២៕