ព្រះសីហនុៈ លោក គួច ចំរើន អភិបាលខេត្តព្រះសីហនុបានធ្វើការណែនាំឱ្យមន្ទីរធនធានទឹក និងឧតុនិយមខេត្តត្រូវកាយស្តារប្រព័ន្ធអូរ ប្រឡាយ នៅក្នុងភូមិសាស្ត្រក្រុងព្រះសីហនុឱ្យបានជាប្រចាំ ដើម្បីបញ្ចៀសការជន់លិចដោយជំនន់ទឹកភ្លៀងនៅរដូវវស្សា។
ចំពោះទីតាំងណាដែលអាចកាយស្តារបានត្រូវដាក់គ្រឿងចក្រចុះកាយ បើកមុខទឹកឱ្យបានធំទូលាយទៅតាមនិយាមកា ធ្វើយ៉ាងណាកុំឱ្យទឹកជន់លិច ដែលបង្កឱ្យមានផលប៉ះពាល់ផ្សេងៗ។
លោក គួច ចំរើន បានធ្វើការណែនាំបែបនេះនៅថ្ងៃទី ២៣មិថុនា ខណៈលោកអញ្ជើញចុះពិនិត្យសកម្មភាពការកាយស្ដារអូរប្រឡាយនៅក្នុងភូមិសាស្ត្រសង្កាត់លេខ ៤ ក្រុងព្រះសីហនុចាប់ពីអង្គការម្លប់តាប៉ាងរហូតដល់អាងចម្រោះទឹកកខ្វក់ ១៦ ហិកតាមានប្រវែង ១៨០០ ម៉ែត្រ ដោយប្រើប្រាស់គ្រឿងចក្រចំនួន ៣ គ្រឿង ហើយកាយស្តាររយៈពេល ២០ ថ្ងៃមានអាចម៍ដីប្រមាណ ១ ម៉ឺនម៉ែត្រគុប។
លោកអភិបាលខេត្តបានបញ្ជាក់ថា៖ «នៅពេលភ្លៀងទឹកភ្លៀងបានហូរនាំយកដីខ្សាច់ចាក់ចូលក្នុងអូរ ប្រឡាយ ប្រសិនបើយើងមិនមានវិធានការស្តារនោះទេ នឹងធ្វើឱ្យចរន្តទឹកហូរមិនបានលឿនដែលអាចបង្កជាជំនន់ទឹកភ្លៀង»។
ទន្ទឹមនោះ លោកបានក្រើនរំឭកប្រជាពលរដ្ឋរស់នៅជាប់តាមអូរ ប្រឡាយ ទាំងអស់ត្រូវចូលរួមសហការជាមួយអាជ្ញាធរពាក់ព័ន្ធ ដោយធ្វើការវេចខ្ចប់ទុកដាក់កាកសំណល់សំរាម ដែលបានប្រើប្រាស់ហើយឱ្យបានត្រឹមត្រូវចៀសវាងបោះចោលពាសវាលពាសកាលធ្វើឱ្យទឹកហូរនាំចូលអូរប្រឡាយបង្កការកកស្ទះផ្លូវទឹកហូរនាំឱ្យមានការជន់លិច៕