ភ្នំពេញៈ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានជួបពិភាក្សាការងារជាមួយនឹងក្រុមបេសកកម្ម JICA លើគម្រោងការលើកកម្ពស់វិស័យអប់រំវិស្វកម្ម និងការសិក្សាស្រាវជ្រាវ សម្រាប់ការអភិវឌ្ឍវិស័យឧស្សាហកម្មនៅកម្ពុជា តាមបែបការអប់រំផ្អែកលើមន្ទីរពិសោធន៍។
លោកយោងតាមក្រសួងអប់រំកាលពីថ្ងៃទី ២៣ ខែមិថុនាបានឱ្យដឹងថា ការអប់រំផ្អែកលើមន្ទីរពិសោធន៍នេះគឺជាការអប់រំដែលអនុវត្តនៅក្នុងក្រុមស្រាវជ្រាវ ដើម្បីលើកកម្ពស់គុណភាពនៃការអប់រំនៅក្នុងលក្ខខណ្ឌដោះស្រាយបញ្ហា និងជំនាញជាក់ស្តែង និងអនុវត្តជាទូទៅនៅក្នុងសាកលវិទ្យាល័យជប៉ុន សម្រាប់ថ្នាក់ក្រោយបរិញ្ញាបត្រ និង ថ្នាក់បណ្ឌិត។
ក្រសួងបានបញ្ជាក់ថា គម្រោងនេះធ្វើឡើងក្នុងគោលបំណងឱ្យវិទ្យាស្ថានបច្ចេកវិទ្យាកម្ពុជា (ITC) បង្កើនសមត្ថភាពអប់រំ និងស្រាវជ្រាវរបស់ខ្លួន ដើម្បីចូលជាស្ថាប័នធនធានជាតិក្នុងវិស័យវិស្វកម្ម ដោយដាក់បញ្ចូលនូវការអប់រំផ្អែកលើមន្ទីរពិសោធន៍ទៅក្នុងកម្មវិធីសិក្សា។ ក្រៅពីនោះគោលបំណងរួមរបស់គម្រោងនេះផងដែរគឺកំណត់សាកលវិទ្យាល័យគោលដៅ ដើម្បីលើកកម្ពស់សមត្ថភាពអប់រំ និងការស្រាវជ្រាវឱ្យឆ្លើយតបទៅនឹងតម្រូវការវិស័យឧស្សាហកម្មនៅកម្ពុជា។
នៅក្នុងឱកាសនោះ លោករដ្ឋមន្ត្រីបានមានប្រសាសន៍ថា ការអប់រំផ្អែកលើមន្ទីរពិសោធន៍ពិតជាគួរឱ្យចាប់អារម្មណ៍ខ្លាំង ហើយថា ការសិក្សាស្រាវជ្រាវ គឺជាវិធីមួយដែលអាចធ្វើឱ្យសិស្សបានរកឃើញភាពច្នៃប្រឌិត និងនាំយកវាមកប្រើប្រាស់ក្នុងគោលដៅផ្សេងៗនឹងជំរុញឱ្យទទួលស្គាល់ការស្រាវជ្រាវជាវិជ្ជាជីវៈមួយ និងសហការជាមួយដៃគូពាក់ព័ន្ធក្នុងការបណ្ដុះបណ្ដាលជំនាញស្រាវជ្រាវដល់សិស្ស និស្សិត និងគ្រូបង្រៀននៅតាមខេត្ត៕