កណ្តាលៈ រមណីយដ្ឋានភ្នំស្អាងភ្នំនាពេលខាងមុខនឹងទាក់ទាញភ្ញៀវទេសចរជាតិ និងអន្តរជាតិជាច្រើនមកកម្សាន្ដសប្បាយតាមបែបធម្មជាតិ បន្ទាប់ពីមានការរៀបចំកែលម្អឡើងវិញទាំងផ្នែកសុភ័ណភាព និងបរិយាកាសឱ្យល្អទៅតាមបែបធម្មជាតិរួចមក។
លោក ញឹម វណ្ណឌិន អភិបាលស្រុកស្អាងបានថ្លែងបែបនេះក្នុងឱកាសដែលលោកអញ្ជើញជាអធិបតីក្នុងពិធីដាំកូនឈើ និងលែងកូនត្រីនៅតំបន់រមណីយដ្ឋានភ្នំស្អាងភ្នំ ដោយមានការចូលរួមពីលោកគ្រូ អ្នកគ្រូ សិស្សានុសិស្ស និងប្រជាពលរដ្ឋជាច្រើននាក់នាព្រឹកថ្ងៃទី ២៣ ខែមិថុនា ឆ្នាំ ២០២២។ នេះបើតាមរដ្ឋបាលខេត្តកណ្តាល។
លោក ញឹម វណ្ណឌិន បន្តថា រដ្ឋបាលស្រុកស្អាងបាននិងកំពុងរៀបចំកែប្រែនូវសោភ័ណភាពនៅជុំវិញបរិវេណរមណីយដ្ឋានភ្នំស្អាងភ្នំ ដោយបានដាំកូនឈើនៅបរិវេណស្រះមុខភ្នំស្អាង និងបានរៀបចំកន្លែងសម្រាប់អាជីវករលក់ដូរយ៉ាងសមរម្យនៅទីនោះមានរៀបចំកន្លែងអង្គុយលេងកម្សាន្ត តាមបែបធម្មជាតិ ហើយនាពេលខាងមុខនឹងមានការរៀបចំសួនច្បារ សម្រាប់ទស្សនាកម្សាន្តផងដែរ។
លោកអភិបាលស្រុកស្អាងបានបន្ថែមទៀតថា បន្ទាប់ពីធ្វើការកែលម្អនូវសោភ័ណភាពនៅជុំវិញបរិវេណរមណីយដ្ឋានភ្នំស្អាងភ្នំនេះរួចហើយ ទីនេះនឹងទាក់ទាញភ្ញៀវទេសចរទាំងជាតិ និងអន្តរជាតិមកលេងកម្សាន្តសប្បាយនាថ្ងៃឈប់សម្រាកដោយភាពសប្បាយរីករាយ។
នៅក្នុងពិធីដាំកូនឈើ និងលែងកូនត្រីនេះ រដ្ឋបាលស្រុកស្អាងបានដាំដើមរាំងចំនួន ៥០០ ដើម នៅបរិវេណស្រះទឹកមុខរមណីយដ្ឋានភ្នំស្អាងភ្នំបន្តដាំដើមឈើប្រភេទផ្សេងៗទៀត ចំនួន ១ ម៉ឺនដើមបន្ថែមទៀត តាមការណែនាំរបស់រដ្ឋបាលខេត្តកណ្ដាល និងធ្វើការលែងកូនត្រីចូលក្នុងស្រះទឹកចំនួន ១ ម៉ឺន កូនត្រីផងដែរ៕