.jpg)
សារលិខិតអបអរសារទររបស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជាគោរពជូនឯកឧត្តម Vuong Dinh Hue ប្រធានរដ្ឋសភានៃសាធារណរដ្ឋសង្គមនិយមវៀតណាមក្នុងឱកាសនៃការប្រារព្ធខួបអនុស្សាវរីយ៍លើកទី ៥៥ នៃថ្ងៃបង្កើតទំនាក់ទំនងការទូតរវាងព្រះរាជាណាចក្រកម្ពុជាជាមួយសាធារណរដ្ឋសង្គមនិយមវៀតណាម។
ភ្នំពេញៈ លោក សាយ ឈុំ ប្រធានព្រឹទ្ធសភាកម្ពុជាបានថ្លែងថា សភាកម្ពុជា-វៀតណាម បានដើរតួនាទីស្នូលក្នុងការរួមចំណែកលើកកម្ពស់ទំនាក់ទំនងរវាងប្រជាជន និងប្រទេសទាំង ២ ស្របតាមទិសស្លោក «ទំនាក់ទំនងមិត្តភាពជិតខាងល្អជាប្រពៃណី និងប្រកបដោយសហប្រតិបត្តិការរឹងមាំ យូរអង្វែង និងគ្រប់វិស័យ»។
លោកថ្លែងដូច្នេះតាមរយៈសារលិខិតផ្សព្វផ្សាយនៅថ្ងៃនេះផ្ញើជូនលោក Vuong Dinh Hue ប្រធានរដ្ឋសភាវៀតណាម ដើម្បីអបអរសាទរខួបលើកទី ៥៥ នៃថ្ងៃបង្កើតទំនាក់ទំនងការទូតរវាងកម្ពុជា និងវៀតណាម។
លោក សាយ ឈុំ ថ្លែងថា៖ «ក្នុងរយៈពេល ៤៥ ឆ្នាំកន្លងមកនេះ ប្រទេសយើងទាំង ២ បានឆ្លងកាត់នូវដំណាក់កាលជាប្រវត្តិសាស្ត្រជាច្រើន ដោយបានជួយគាំទ្រគ្នាទៅវិញទៅមក ដើម្បីបុព្វហេតុឯករាជ្យ អធិបតេយ្យភាព បូរណភាព និងការអភិវឌ្ឍ។
លោកបន្តថា បច្ចុប្បន្នប្រជាជន និងប្រទេសទាំង ២ បាននិងកំពុងសប្បាយរីករាយដោយការពេញចិត្ត ចំពោះវឌ្ឍនភាពនៃទំនាក់ទំនង «ដ៏ល្អ» លើគ្រប់វិស័យដែលបានផ្តល់ផលប្រយោជន៍ទៅវិញទៅមកដល់ការរីកចម្រើនផ្នែកសង្គមសេដ្ឋកិច្ចនាំមកនូវការអភិវឌ្ឍ និងវិបុលភាពរួម «ដ៏ត្រចះត្រចង់»។
ប្រធានព្រឹទ្ធសភាកម្ពុជារូបនេះបញ្ជាក់ថា សភាទាំង ២ បានដើរតួនាទីដ៏សំខាន់នៅក្នុងវិស័យការទូតសភា តាមរយៈការពង្រឹងពង្រីកសហប្រតិបត្តិការដ៏ជិតស្និទ្ធក្នុងក្របខ័ណ្ឌទ្វេភាគី ពហុភាគី ដោយបន្តគាំទ្រគ្នាទៅវិញទៅមកនៅក្នុងក្របខ័ណ្ឌអន្តរសភា ដើម្បីបម្រើបុព្វហេតុសន្តិភាព ស្ថិរភាព និងការអភិវឌ្ឍក្នុងតំបន់ និងលើពិភពលោក។
លោកបានជូនពរដល់បក្ស រដ្ឋ រដ្ឋាភិបាល សភា និងប្រជាជនវៀតណាម ឱ្យសម្រេចបាននូវសមិទ្ធផលដ៏ធំធេងថ្មីៗថែមទៀតក្នុងការអភិវឌ្ឍសង្គម-សេដ្ឋកិច្ច និងសម្រេចបាននូវគោលដៅក្លាយទៅជាប្រទេសអភិវឌ្ឍន៍មានចំណូលកម្រិតខ្ពស់នៅឆ្នាំ ២០៤៥៕
