ភ្នំពេញ: ការចូលរួមបរិច្ចាគឈាម ពីសំណាក់យុវជននៅតាមបណ្ដាក្រុមហ៊ុន និងសហគ្រាសនានា ពិតជាបានចូលរួមចំណែកយ៉ាងសំខាន់ក្នុងការជួយសង្គ្រោះជីវិតអ្នកជំងឺ ខណៈការប្រើប្រាស់ឈាមប្រចាំថ្ងៃត្រូវការប្រមាណពី ២៥០ ប្លោក ទៅដល់ ៣០០ ប្លោក។ នេះបើយោងតាម លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម (NBTC)។
ដោយសារតែវិបត្ដិកូវីដសកល ដែលរារាំងដល់ការជួបជុំ រួមទាំងកិច្ចការមនុស្សធម៌ផ្សេងៗ ការបរិច្ចាគឈាមជួយជនរងគ្រោះមានការធ្លាក់ចុះ ត្រឹមប្រមាណ ៥ ភាគរយ នៃតម្រូវការប្រមាណ ៣០០ ប្លោក ក្នុង ១ ថ្ងៃនៅ NBTC។ យ៉ាងណាមិញក្រោយស្ថានភាពជំងឺរាតត្បាតបានថមថយ ការបរិច្ចាគឈាមចាប់ផ្ដើមមានសម្ទុះឡើងវិញទ្វេដងក្នុងរង្វង់ប្រមាណ ១០ ភាគរយ។
លោក សុខ ប៉ូ បានប្រាប់ ភ្នំពេញ ប៉ុស្ដិ៍ថា៖ «អ្នកបរិច្ចាគឈាមភាគច្រើន មកពីសហភាពសហព័ន្ធយុវជនកម្ពុជា (សសយក) ក៏ដូចជាសហគ្រិនឯកជននានាដូចជា ក្រុមហ៊ុនជីបម៉ុង ក្រុមហ៊ុនវីតាល់ ក្រុមហ៊ុនមីជាតិ មន្ទីរពេទ្យ រ៉ូយាល់ភ្នំពេញ មន្ទីរពេទ្យ Sunrise និងសាកលវិទ្យាល័យភ្នំពេញ។ និយាយទៅ សហគ្រិនផ្សេងៗទៀត ពួកគាត់ចូលរួមកិច្ចបរិច្ចាគច្រើន ក្រោយចប់ការរាតត្បាតនៃជំងឺកូវីដ ១៩»។
ជាមួយផ្នែកនៃការចូលរួមកិច្ចការមនុស្សធម៌ ក្រុមហ៊ុនខ្មែរប៊ែរវើរីជីស ជាបុត្រសម្ព័ន្ធរបស់ជីបម៉ុងគ្រុប បានកៀរគរបុគ្គលិកធ្វើការបរិច្ចាគឈាមសម្រាប់ជួយសង្គ្រោះជីវិតមនុស្ស។
លោក លាង ពៅ ហៅ ភីធើរ ជាអគ្គនាយកក្រុមហ៊ុនខ្មែរប៊ែរវើរីជីស បានឱ្យដឹងថា ក្រុមហ៊ុនមានគោលតម្លៃចម្បងមួយ គឺការផ្ដល់ត្រឡប់ទៅសង្គមវិញ។ ដូច្នេះ គោលបំណងសំខាន់នៃកម្មវិធីបរិច្ចាគឈាមនេះ គឺដើម្បីផ្សារភ្ជាប់បុគ្គលិកទៅនឹងសកម្មភាពផ្ដល់ត្រឡប់ទៅសង្គមវិញរបស់ក្រុមហ៊ុន ដោយបង្កើតវប្បធម៌ជួយគ្នា និងជំរុញឱ្យបុគ្គលិកយល់ដឹងបន្ថែមពីសារៈសំខាន់នៃការជួយសង្គ្រោះជីវិតមនុស្សក្នុងសង្គមតាមរយៈការផ្ដល់ឈាម។
លោកប្រាប់ ភ្នំពេញ ប៉ុស្ដិ៍ថា៖ «មានបុគ្គលិកខ្មែរ ប៊ែរវើរីជីស និងជីបម៉ុងចូលរួមសរុបចំនួន ១៧៦ នាក់ ដែលក្នុងនោះ មាន ១២៥ នាក់ គ្រប់លក្ខខណ្ឌក្នុងការបរិច្ចាគឈាមដោយជោគជ័យ។ ក្រុមហ៊ុនមិនមែនទើបតែធ្វើកម្មវិធីបរិច្ចាគឈាមនៅក្នុងឆ្នាំនេះនោះទេ យើងធ្វើជារៀងរាល់ឆ្នាំ និងនៅតែបន្ដជានិរន្ដរ៍នូវសកម្មភាពមនុស្សធម៌ តាមរូបភាពផ្សេងៗ នៅគ្រប់កាលៈទេសៈ»។ លោក ប៉ូ អះអាងថា៖ «ប៉ុន្ដែភាគច្រើននៃក្រុមបរិច្ចាគឈាមដោយស្ម័គ្រចិត្ដនេះមកពីក្រុមយុវជនជាពិសេសយុវជន (សសយក) រាជធានី ដែលចប់កូវីដភ្លាម ពួកគាត់នាំគ្នាមកបរិច្ចាគប្រហែល ៧០០ ប្លោក»។
ប្រធានមជ្ឈមណ្ឌលជាតិផ្ដល់ឈាមទទួលស្គាល់ថា អំឡុងពេលកូវីដ ជាទូទៅមជ្ឈមណ្ឌលមានការលំបាកចំពោះបញ្ហាខ្វះឈាម។ តែដោយសារមានគោលនយោបាយបរិច្ចាគជំនួស មជ្ឈមណ្ឌលជួបបញ្ហាតិចតួចជាងសាច់ញាតិអ្នកជំងឺ ដែលត្រូវរកអ្នកបរិច្ចាគឈាមជាថ្នូរនឹងការទទួលឈាមពីមជ្ឈមណ្ឌល។ លោក ប៉ូ ឱ្យដឹងថា៖ «បញ្ហានេះហើយ ដែលធ្វើឱ្យបងប្អូនអ្នកជំងឺមួយចំនួនជួបការលំបាកខ្លាំង ហើយវាមិនមែនលំបាកតែពួកគាត់ប៉ុណ្ណោះទេ ប៉ុន្ដែក្រុមគ្រូពេទ្យយើងក៏ត្រូវធ្វើការទ្វេដងដែរ ជាពិសេសយើងខ្លាចជំងឺកូវីដ ១៩ ផង យើងធ្វើការផង ដែលធ្វើឱ្យមានការលំបាកខ្លាំង»។
ចំពោះការប្រើប្រាស់ឈាមប្រចាំថ្ងៃជាមធ្យម លោក ប៉ូ ឱ្យដឹងថា (NBTC) ត្រូវការឈាមប្រមាណ ២៥០ ប្លោក ដោយថ្ងៃខ្លះ តម្រូវការបានកើនដល់ ៣០០ ប្លោក។
ការសម្រាលកូនត្រូវការឈាមច្រើនបំផុត
អ្នកស្រី គង់ សុភារី មានបញ្ហាខ្វះគ្រាប់ឈាម អំឡុងពេលមានទម្ងន់ក្នុងឆ្នាំ ២០១៦ កន្លងទៅ។ ខណៈពេលសម្រាលដោយការវះកាត់ អ្នកស្រីមានបញ្ហាខ្វះឈាម ដែលទាមទារការបញ្ចូលឈាម។
លោក ផន សុខជា ជាស្វាមីដែលមានការបារម្ភពីសុវត្ថិភាពរបស់ភរិយាខ្លាំង បានរំឭកប្រាប់ថា៖ «កាលនោះគាត់ត្រូវការបញ្ចូលឈាម ១ ប្លោក ដោយមានការបរិច្ចាគ។ ខ្ញុំជាអ្នកទៅយកផ្ទាល់នៅមន្ទីរពេទ្យអង្គឌួង»។
ស្ដ្រីសម្រាលកូនជាអ្នកត្រូវការប្រើប្រាស់ឈាមច្រើនបំផុត ក្នុងចំណោមអ្នកជំងឺវះកាត់ដទៃទៀត។ នេះគឺជាបន្ទុកដ៏ធំមួយសម្រាប់មជ្ឈមណ្ឌលជាតិផ្ដល់ឈាម ក៏ដូចជាសាច់ញាតិអ្នកជំងឺផ្ទាល់។ លោក ប៉ូ បានកត់សម្គាល់ថា ជាទូទៅអ្នកជំងឺត្រូវការប្រើប្រាស់ឈាមច្រើន គឺស្ដ្រីដែលសម្រាលកូនតែងតែធ្លាក់ឈាមច្រើន ពួកគាត់ត្រូវការបញ្ចូលឈាមវិញ។ ចំណុចទី២ គឺការវះកាត់ជំងឺបេះដូងនៅមន្ទីរពេទ្យកាល់ម៉ែត និងមន្ទីរពេទ្យនានាក្នុងរាជធានីក៏ប្រើច្រើនដែរ។
លោកបានលើកឧទាហរណ៍ជាក់ស្ដែងថា៖ «នៅក្នុងថ្ងៃនេះ ខ្ញុំមើលឃើញស្ដ្រីម្នាក់នៅក្នុងគ្លីនិក អរៀនដា គាត់ប្រើរហូតទៅដល់ជិត ២០ ប្លោកតែម្នាក់ឯង។ ខ្ញុំគិតថា ប្អូនស្រីនោះ អាចរួចផុតពីមរណៈហើយ»។ ចំពោះការប្រើប្រាស់ឈាមដ៏ច្រើននេះ បើសាច់ញាតិអស់លទ្ធភាពរកអ្នកបរិច្ចាគឈាម វាជាបន្ទុករបស់មជ្ឈមណ្ឌលជាតិផ្ដល់ឈាម ដោយលោក ប៉ូ បានលើកឡើងនូវអនុសាសន៍របស់លោករដ្ឋមន្ដ្រីក្រសួងសុខាភិបាល ដោយបាននិយាយថា បើសិនពលរដ្ឋមិនអាចរកបងប្អូនជំនួសបាន មានតែមជ្ឈមណ្ឌលជាតិផ្ដល់ឈាម មានតែក្រសួងសុខាភិបាល។
បងប្អូនសាច់ញាតិទទួលខុសត្រូវដំបូង តែដល់ពេលត្រូវការប្រើឈាមច្រើនអ៊ីចឹង គឺក្រសួងសុខាភិបាល ជាពិសេសមជ្ឈមណ្ឌលជាតិផ្ដល់ឈាមត្រូវដើរប្រមូល ដើម្បីបង្គ្រប់សង្គ្រោះជីវិតអ្នកជំងឺ។
ការបរិច្ចាគឈាម ទទួលអត្ថប្រយោជន៍មិននឹកស្មានដល់
strong> លោក ចាន់ សុខហៀង អាយុ ៣៤ ឆ្នាំ ជាអាជីវករទិញ-លក់រថយន្ដជជុះនៅកម្ពុជាបានស្ម័គ្រចិត្ដផ្ដល់ឈាមជាលើកដំបូងក្នុងបំណងដោះដូរឈាមឱ្យអ្នកជំងឺជាសាច់ញាតិដែលត្រូវការប្រើប្រាស់ឈាម។ លោកថា៖ «ខ្ញុំទើបផ្ដល់ឈាមជាលើកដំបូង កាលពីខែឧសភាកន្លងទៅ។ ខ្ញុំមិនមានអារម្មណ៍ខុសប្រក្រតីអីទេ។ ពេលផ្ដល់ឈាមរួចហើយ គេមានអាហារសម្រន់ឱ្យញ៉ាំទៀត។ បើមានពេលទំនេរ ចាប់ពីពេលនេះតទៅ ខ្ញុំសុខចិត្ដទៅបរិច្ចាគឈាមខ្លះ ដើម្បីជួយអ្នកត្រូវការឈាម»។ សព្វថ្ងៃនេះ ការបរិច្ចាគឈាមភាគច្រើនត្រូវបានធ្វើឡើងដោយក្រុមស្ម័គ្រចិត្ដមកពីសហគ្រាសផ្សេងៗ ដែលបានចូលរួមចំណែកយ៉ាងចម្បង សម្រាប់ការទ្រទ្រង់មជ្ឈមណ្ឌលជាតិផ្ដល់ឈាម។ លោកប៉ូ ទទួលស្គាល់ថា ពលរដ្ឋទូទៅមិនទាន់បានយល់ទូលំទូលាយ និងចូលរួមកិច្ចបរិច្ចាគឈាមឱ្យបានទូលំទូលាយនោះទេ។ លោកជឿថា វាអាចមកពីការបារម្ភច្រើន ពីព្រោះប្រជាជនខ្មែរមានឆន្ទៈជួយគ្នា។ ប៉ុន្ដែដោយសារពួកគេបារម្ភថា ការបរិច្ចាគឈាមអាចនាំឱ្យខូចសុខភាព។ លោកបន្ដថា៖ «ការពិត ការបរិច្ចាគឈាមនេះ មិនត្រឹមតែជួយអ្នកជំងឺសម្រាកនៅតាមមន្ទីរពេទ្យនោះទេ ប៉ុន្ដែអ្នកបរិច្ចាគក៏ទទួលបានអត្ថប្រយោជន៍ផ្ទាល់ខ្លួនផងដែរ។ ទី១ ការកាត់បន្ថយនូវកំហាប់ឈាមពីក្នុងខ្លួន ជាពិសេសអាចកាត់បន្ថយលើសជាតិដែក សម្រួលរំហូរឈាមនៅក្នុងខ្លួន កាត់បន្ថយជំងឺបេះដូង ជាពិសេសជំងឺ Stroke ហើយកាត់បន្ថយជំងឺមហារីក និងការឡើងទម្ងន់ផងដែរ»។ «ខ្ញុំសូមបញ្ជាក់ថា ការបរិច្ចាគឈាម បើសិនប៉ះពាល់សុខភាព គ្រូពេទ្យនឹងមិនធ្វើទេ។ អ៊ីចឹង កិច្ចបរិច្ចាគឈាមនេះ មិនប៉ះពាល់សុខភាពនោះទេ។ ចំពោះបុរសយើង បរិច្ចាគឈាមទៅរៀងរាល់ ៣ ខែ។ យើងអត់ខូចសុខភាពទេ ហើយយើងចែករំលែកឈាមដល់អ្នកត្រូវការ។ នៅពេលយើងមានឧបសគ្គ យើងក៏អាចប្រើប្រាស់វាវិញបានដែរ ដោយសារយើងបានកត់ត្រាទុកក្នុងប្រព័ន្ធកុំព្យូទ័រ។ ប៉ុន្ដែការបរិច្ចាគទាំងនោះមិនអាចទុកប្រើប្រាស់សម្រាប់បងប្អូនយើងបានទេ លុះត្រាតែយើងធ្វើការបរិច្ចាគភ្លាមៗទៀត»។ មូលហេតុនៃការបញ្ឈប់ចេញបណ្ណបរិច្ចាគឈាម ចំពោះការបញ្ឈប់ការចេញបណ្ណសម្រាប់អ្នកបរិច្ចាគឈាម លោកវេជ្ជបណ្ឌិតបានបកស្រាយថា ការបរិច្ចាគឈាមហើយមិនអាចយកឈាមនោះសម្រាប់ឱ្យអ្នកដទៃប្រើប្រាស់ជំនួសនោះទេ។ ចំពោះសាមីខ្លួន ពួកគេអាចផ្ដល់ជូនបាន។ ឧបមាថា បុគ្គលម្នាក់ទៅបរិច្ចាគឈាម ហើយថ្ងៃក្រោយពួកគេមានបញ្ហា ពួកគេអាចប្រើប្រាស់ឈាមនោះបាន។ លោក ប៉ូ និយាយថា៖ «យ៉ាងណាមិញ មានជនខិលខូចមួយចំនួនឆ្លៀតប្រើនូវនយោបាយយើងពីមុន ដែលពេលយើងបរិច្ចាគឈាម យើងអាចយកឈាមនោះទៅជួយបងប្អូនយើង។ ប៉ុន្ដែក្រុមបរិច្ចាគឈាមអាជីពបានធ្វើឱ្យខូចគោលនយោបាយនេះ។ យើងបានបញ្ឈប់វា»។ ចំពោះបុគ្គលមានបំណងចង់បរិច្ចាគឈាមទុកប្រើប្រាស់ផ្ទាល់ខ្លួនពេលគ្រាអាសន្នណាមួយ ពិតជាបាន។ ការបរិច្ចាគឈាមជាក្រុមធំ ត្រូវបានធ្វើឡើងតាមរយៈមន្ដ្រីទំនាក់ទំនងរបស់គ្រឹះស្ថាននីមួយៗ ប្រសិនបើពួកគេត្រូវការប្រើប្រាស់ឈាម។ ប្រធានមជ្ឈមណ្ឌល ឱ្យដឹងថា ការចេញកាតឱ្យបុគ្គលនេះ ត្រូវបានជនខិលខូចបោកបញ្ឆោតអ្នកស្ម័គ្រចិត្ដដោយប្រមូលកាតពីពួកគេ និងមកបើកឈាមអស់ពីស្ដុក។ លោក ប៉ូ លើកឡើងថា៖ «បទពិសោធឆ្នាំ ២០១៩ យើងរៀបចំកម្មវិធីមួយ ដែលទទួលបានឈាមរហូតដល់ ៩០០ សាក់ ក្នុង ១ ថ្ងៃ។ ជនខិលខូចបានទៅលួងលោមសមាជិកយកកាតសឹងតែទាំងអស់ រួចបើកយកឈាមចេញទៅវិញអស់។ នោះជាវិបត្ដិដ៏ធ្ងន់ធ្ងរសម្រាប់មជ្ឈមណ្ឌលជាតិផ្ដល់ឈាម»។ លោកនិយាយថា លោកគិតថា អ្នកបរិច្ចាគទាំងនោះ មិនគិតថា ចង់ត្រូវការប្រើប្រាស់ឈាមនោះវិញទេ។ អ្នកបរិច្ចាគឈាមពិតប្រាកដមានតែម្យ៉ាងទេ មានតែឧទ្ទិសថា កុំឱ្យជួបវាសនាប្រើប្រាស់ឈាមនោះ។ ការបរិច្ចាគ និងឈាមដែលមានគុណភាព គួរបញ្ជាក់ថា តម្រូវការឈាម ២០ សាក់ មិនមែនរកមនុស្សសុខភាពល្អ ២០ នាក់ អាចបរិច្ចាគគ្រប់ ២០ សាក់នោះទេ តែត្រូវរកមនុស្សយ៉ាងតិចពី ៣០ ទៅ ៤០ នាក់ ពីព្រោះពួកគេទាំងអស់ មិនទៀងថា អាចបរិច្ចាគបានទេ។ អ្នកខ្លះអាចមានជំងឺប្រចាំកាយ ជាពិសេស សម្ពាធឈាមមិនគ្រប់ ហើយជួនកាលគាត់អត់ងងុយ គាត់ដើរលេងយប់ ផឹកស្រា រួមទាំងការកើនឡើងនៃសម្ពាធផងដែរ។ លោក ប៉ូ ឱ្យដឹងថា ការបរិច្ចាគតាមរយៈអ្នកស្ម័គ្រចិត្ដមានចំនួនមិនទាន់ឆ្លើយតបចំពោះការប្រើប្រាស់ឈាមប្រចាំថ្ងៃនោះទេ។ ការរៀបចំព្រឹត្ដិការណ៍បរិច្ចាគឈាមមួយ ច្រើនបំផុតបាន ៧០០ សាក់។ បើមជ្ឈមណ្ឌលអត់ទទួលអ្នកបរិច្ចាគជំនួសទេ មជ្ឈមណ្ឌលនឹងប្រើឈាមអស់ត្រឹមរយៈពេលតែ ២ ថ្ងៃប៉ុណ្ណោះ។ លោកបញ្ជាក់ថា៖ «សំខាន់បំផុត ឈាមដែលបូមបានទាំងអស់ មិនអាចយកទៅប្រើបានទាំងអស់នោះទេ។ យើងត្រូវឆ្លងកាត់មន្ទីរពិសោធន៍មួយចំនួនដែលឈាមខ្លះត្រូវខូចខាតដោយសារមេរោគ ឬអ្នកបរិច្ចាគមានជាតិខ្លាញ់ច្រើន។ ឈាមទាំងនោះក៏មិនអាចប្រើប្រាស់បានដែរ។ អ៊ីចឹង ឈាមដែលយើងបូមបានពីអ្នកបរិច្ចាគ ១០០ ប្លោក មិនមែនយកទៅប្រើបានទាំង ១០០ នោះទេ គឺត្រឹម ៩០ ប្លោកប៉ុណ្ណោះ។ ចំពោះការទទួលឈាមបរិច្ចាគ ១ ថ្ងៃ ៧០០ សាក់់ យើងកាត់ ១០ ភាគរយចេញទៅ»។ ចំពោះអ្នកមានបំណងចង់បូមឈាមផ្ញើទុកនៅមជ្ឈមណ្ឌលសម្រាប់ប្រើប្រាស់លើអ្នកជំងឺបងប្អូន ដែលនឹងត្រូវការប្រើនៅពេលណាមួយខាងមុខ លោកវេជ្ជបណ្ឌិត ប៉ូ បានឱ្យដឹងថា ការផ្ញើទុកនេះ មានសុពលភាពត្រឹម ៣០ ថ្ងៃប៉ុណ្ណោះ។ លោកឱ្យដឹងថា៖ «ក្រោយរយៈពេលនោះមជ្ឈមណ្ឌលចែកចាយទៅកាន់មន្ទីរពេទ្យអស់ហើយ»។ មជ្ឈមណ្ឌលជាតិផ្ដល់ឈាមនឹងធ្វើការកត់ត្រាទុកនូវប្រវត្ដិរបស់អ្នកផ្ដល់ក្នុងប្រព័ន្ធកុំព្យូទ័រ ហើយមជ្ឈមណ្ឌលនឹងធ្វើវឌ្ឍនភាពបច្ចេកវិទ្យាតាមរយៈការធ្វើ Face ID ដែលមានន័យថា ការបរិច្ចាគឈាមរបស់បុគ្គលនេះមានប្រវត្ដិច្បាស់លាស់។ «យើងត្រូវមានវិធានការតឹងតែងខ្លាំង ពីព្រោះយើងបង្ការការជួញដូរឈាមខុសច្បាប់»៕