គណៈកម្មាធិការជាតិសុវត្ថិភាពចរាចរណ៍ផ្លូវគោកបានរៀបចំផែនការទសវត្សរ៍ជាតិ សុវត្ថិភាពចរាចរណ៍ផ្លូវគោកថ្មី ឆ្នាំ ២០២១-២០៣០ ដោយសំដៅសម្រេចឱ្យបាននូវគោលដៅកាត់បន្ថយអ្នកស្លាប់ និងអ្នករបួស ដោយគ្រោះថ្នាក់ចរាចរណ៍ផ្លូវគោកឱ្យបាន ៥០% នៅឆ្នាំ ២០៣០។
នេះជាការលើកឡើងរបស់លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោកនាថ្ងៃទី ២២ ខែមិថុនា ក្នុងពិធីបើកសិក្ខាសាលាស្តីពីការប្រមូលធាតុចូល សម្រាប់ផែនការទសវត្សរ៍ជាតិសុវត្ថិភាពចរាចរណ៍ផ្លូវគោក ឆ្នាំ ២០២១-២០៣០។
សិក្ខាសាលានេះមានរយៈពេល ២ ថ្ងៃចាប់ពីថ្ងៃទី ២២-២៣ ខែមិថុនា ដែលមានការចូលរួមពីអគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក ក្រសួងមហាផ្ទៃ ក្រសួងសាធារណការ និងដឹកជញ្ជូន និងដៃគូពាក់ព័ន្ធមួយចំនួនទៀត។
គោលបំណងនៃសិក្ខាសាលានេះ គឺដើម្បីបង្ហាញពីលទ្ធផលការងារសម្រេចបាន បញ្ហាប្រឈម និងបទពិសោធនៃផែនការទសវត្សរ៍ជាតិសុវត្ថិភាពចរាចរណ៍ផ្លូវគោកលើកទី ១ ឆ្នាំ ២០១១-២០២០ ព្រមទាំងជាវេទិកាពិភាក្សា ដើម្បីប្រមូលធាតុចូលពីស្ថាប័នជាតិ អន្តរជាតិ និងដៃគូពាក់ព័ន្ធលើពង្រាងផែនការទសវត្សរ៍ជាតិ សុវត្ថិភាពចរាចរណ៍ផ្លូវគោកថ្មី ឆ្នាំ ២០២១-២០៣០។
លោកស្រី មឹន មាណវី បានលើកឡើងថា ដោយសារករណីគ្រោះថ្នាក់ចរាចរណ៍មានសភាពធ្ងន់ធ្ងរនោះទើបអង្គការសហប្រជាជាតិបានផ្តល់អនុសាសន៍ឱ្យគ្រប់ប្រទេសជាសមាជិកដាក់ចេញនូវផែនការទសវត្សរ៍សុវត្ថិភាពចរាចរណ៍លើកទី ១ រយៈពេល ១០ ឆ្នាំ ពីឆ្នាំ ២០១១-២០២០ ដោយតម្រូវឱ្យខិតខំកាត់បន្ថយយ៉ាងណាឱ្យបាន ៥០ ភាគរយនៃចំនួនប៉ាន់ស្មាន ដែលក្នុងប្រទេសកម្ពុជាគឺមានប្រមាណ ៧ ៧៥០ នាក់ ក្នុងចំនួនប៉ាន់ស្មានរួម ១៤ ៧០០ នាក់។
ប៉ុន្តែកម្ពុជាកាត់បន្ថយបានតែជាង ៤ ៧១០ នាក់ ស្មើនឹង ៦៤ ភាគរយ នៃ ៥០ ភាគរយ តែបើធៀបនឹងចំនួនសរុបរួម គឺបានតែ ៣១ ភាគរយ តែប៉ុណ្ណោះ។
លោកស្រីមានប្រសាសន៍ថា៖ «គណៈកម្មាធិការសុវត្ថិភាពចរាចរណ៍ផ្លូវគោកបានព្រាងនូវផែនការទសវត្សរ៍សុវត្ថិភាពចរាចរណ៍ផ្លូវគោកបន្ទាប់គឺ ២០២១-២០៣០ ដើម្បីកាត់បន្ថយអ្នកស្លាប់ក្នុងគម្រោងឱ្យបាន ៥០ ភាគរយទៀតតាមវិធានការនានាដែលមានការឯកភាពក្នុងកិច្ចប្រជុំសកលនៃរដ្ឋមន្ត្រីទទួលបន្ទុកសុវត្ថិភាពចរាចរណ៍លើកទី ៣ នៅប្រទេសស៊ុយអែតកាលពីចុងឆ្នាំ ២០២០ និងការប្រកាសរបស់អង្គការសហប្រជាជាតិតំបន់អាស៊ីប៉ាស៊ីហ្វិកកាលពីថ្ងៃទី ២៨ ខែតុលា ឆ្នាំ ២០២១ កន្លងទៅនេះ»។
ករណីគ្រោះថ្នាក់ចរាចរណ៍ឆ្នាំ ២០២១ ក្នុងប្រទេសកម្ពុជាបានថយចុះចំនួន ៥០៩ លើក ស្មើ ១៦% (២៦៧០/៣១៧៩ លើក) អ្នកស្លាប់ថយចុះចំនួន ១៤៩ នាក់ ស្មើ ៩% (១៤៩៧/១៦៤៦ នាក់) និងអ្នករបួសថយចុះចំនួន ១០៧១ នាក់ ស្មើ ២៣% (៣៦១៥/៤៦៨៦) ប្រៀបធៀបនឹងឆ្នាំ ២០២០។
ក្នុងនោះអ្នកស្លាប់នៅរាជធានីភ្នំពេញមានចំនួន ២៤៥ នាក់ ខេត្តកណ្តាលចំនួន ១៤១ នាក់ និងខេត្តកំពង់ចាមចំនួន ៩៦ នាក់។ មូលហេតុបណ្តាលឱ្យមានគ្រោះថ្នាក់ រួមមាន៖ បើកបរលើសល្បឿនកំណត់ ៣៨% មិនគោរពសិទ្ធិ ២៤% មិនប្រកាន់ស្តាំ ១៤% វ៉ាជែង ៨% បត់ ៨% ស្រវឹង ៤% កត្តាយានយន្ត ៣% និងងងុយ ១%។
ករណីគ្រោះថ្នាក់ចរាចរណ៍ទាំងនោះបង្កឡើង ដោយសារការបើកបរក្នុងល្បឿនហួសកំណត់ ការបើកបរក្រោមឥទ្ធិពលគ្រឿងស្រវឹង ការមិនពាក់មួកសុវត្ថិភាព និងមិនពាក់ខ្សែក្រវាត់សុវត្ថិភាព ការជែងដោយប្រថុយប្រថានបានបង្កឱ្យគ្រោះថ្នាក់ចរាចរណ៍មានសភាពធ្ងន់ធ្ងរធ្វើឱ្យបាត់បង់ជីវិតមនុស្ស ឬរបួស៕