ជំនួបពិភាក្សារវាងភាគីកម្ពុជានិងថៃ នៅថ្ងៃទី ២៣ មិថុនា។ រូបថត រដ្ឋបាលខេត្តបន្ទាយមានជ័យ
បន្ទាយមានជ័យៈ អភិបាលខេត្តបន្ទាយមានជ័យ និងខេត្តបាត់ដំបង នៅថ្ងៃទី ២៣ ខែ មិថុនា ឆ្នាំ ២០២២ បានជួបប្រជុំពិភាក្សាជាមួយអភិបាលខេត្តស្រះកែវ ប្រទេសថៃ នៅទីស្នាក់ការអន្តរជាតិក្លងលឹក ស្រុកអារញ្ញ ខេត្តស្រះកែវ ក្នុងគោលបំណងដើម្បីពង្រឹងកិច្ចសហប្រតិបត្តិការ សម្ព័ន្ធមេត្រីភាព និងដោះស្រាយកិច្ចការងារមួយចំនួន។
ភាគីកម្ពុជា ប្រតិភូខេត្តបន្ទាយមានជ័យដឹកនាំដោយ លោក អ៊ុ រាត្រី អភិបាលខេត្តបន្ទាយមានជ័យ និងខេត្តបាត់ដំបងដឹកនាំដោយ លោក ធូ ភា អភិបាលរងខេត្តបាត់ដំបង។
ចំណែកភាគីថៃដឹកនាំដោយ លោក បរិនបញ្ញា ភោធិសាធ អភិបាលខេត្តស្រះកែវ ព្រមទាំងមានការចូលរួមពីមន្ត្រីពាក់ព័ន្ធ និងកងកម្លាំងប្រដាប់អាវុធជាច្រើនរូបទៀត។
ក្នុងកិច្ចប្រជុំនេះភាគីទាំង ២ បានពិភាក្សាគ្នា ដើម្បីសម្របសម្រួលបន្ថែម នៃកិច្ចដំណើរការច្រកជាប់ព្រំដែន នៃខេត្តបន្ទាយមានជ័យរួមមាន ច្រកទ្វារអន្តរជាតិប៉ោយប៉ែត គឺពិភាក្សាការប្រើប្រាស់បណ្ណព្រំដែន អនុញ្ញាតឱ្យចេញចូលហើយកន្លងមកនេះ តែសូមឱ្យប្រើប្រាស់យានយន្តអាចចេញចូលបន្ថែមទៀត ។
បន្ថែមពីនេះ បានពិភាក្សាការបើកបណ្តោះអាសន្នច្រកស្ទឹងបត់ និងពិភាក្សាការបើកច្រក ៤៣ ក្នុងខេត្តបន្ទាយមានជ័យ។
រីឯខេត្តបាត់ដំបងបានជជែកពីការ សម្របសម្រួលបន្ថែមដំណើរការលើច្រកទ្វារអន្តរជាតិគីឡូ ១៣ ស្រុកសំពៅលូន ឈមភាគីច្រកខៅឌិន ស្រុកក្លងហាត ខេត្តស្រះកែវ។
ក្នុងកិច្ចពិភាក្សាទាំងប៉ុន្មានចំណុចដែលភាគីខាងកម្ពុជាបានលើកមកនេះ នៅមិនទាន់មានការសម្រេចជាផ្លូវការនោះទេ ប៉ុន្តែភាគីទាំង៣ខេត្ត គឺបន្ទាយមានជ័យ បាត់ដំបង និងខេត្តស្រះកែវ បានរៀបចំបង្កើតឱ្យមានគណៈកម្មការរួមមួយ ដែលដឹកនាំដោយអភិបាលរងខេត្តមួយរូប ដើម្បីពិនិត្យសិក្សាលម្អិតបន្ថែម ហើយភាគីខេត្តបន្ទាយមានជ័យ និងខេត្តស្រះកែវ នឹងមានបើកកិច្ចប្រជុំមួយទៀត នៅសាលាខេត្តបន្ទាយមានជ័យ នៅក្នុងសប្តាហ៍ទី៣ នៃខែកក្កដាខាងមុខដើម្បីពិនិត្យសម្រេចជាលទ្ធផល។
ក្នុងកិច្ចប្រជុំពិភាក្សានេះដែរភាគីថៃ បានទទួលយកសំណើកិច្ចពិភាក្សានេះ ដើម្បីស្នើសុំបន្តទៅថ្នាក់ដឹកនាំរដ្ឋាភិបាលថៃរបស់គេ ដើម្បីសម្រេចពេលក្រោយ ហើយកម្ពុជា នឹងស្នើសុំគោលការណ៍ឯកភាពពីប្រមុខរាជរដ្ឋាភិបាលផងដែរ៕
