ភ្នំពេញៈ អង្គការ WWF កម្ពុជា កំពុងតែប្រកាសឱ្យយុវជនចូលរួមកម្មវិធីប្រកួតបង្កើតខិត្តប័ណ្ណស្តីពីសារៈសំខាន់នៃការអភិរក្សសត្វខ្លាធំ ដែលកាលបរិច្ឆេទក្នុងការដាក់ខិត្តប័ណ្ណក្នុងការប្រកួតប្រជែងនោះនឹងត្រូវធ្វើឡើងនៅថ្ងៃទី ៤ ខែកក្កដា ខាងមុខនេះ។
យោងតាមអង្គការ WWF កម្ពុជាបានឱ្យដឹងថា សម្រាប់យុវជនដែលមានអាយុចាប់ពី ១៥ ដល់ ២១ ឆ្នាំ ហើយចង់បង្ហាញភាពច្នៃប្រឌិតរបស់ខ្លួនក្នុងការបង្កើតខិត្តប័ណ្ណ ដើម្បីបង្កើនការយល់ដឹងពីការអភិរក្សសត្វខ្លាធំត្រូវមានលក្ខខណ្ឌដូចជា មានភាពច្នៃប្រឌិត ជាប្រភេទគំនូរគូរដោយដៃ គំនូរឌីជីថល ឬការច្នៃណាមួយ ដែលអាចបង្ហាញខ្លឹមសារ និងសារទាក់ទងនឹងប្រធានបទនេះ, ទំហំ A4 និងទម្រង់ JPEG មានតុល្យភាពក្នុងការប្រើប្រាស់រូបភាព សញ្ញា និងអក្សរ និងជាភាសាខ្មែរ ឬអង់គ្លេស។
ចំពោះរង្វាន់មានជយលាភីមួយរូប និងជយលាភីលើកទឹកចិត្ត ២ រូប។ ជយលាភីលេខ ១ នឹងត្រូវក្លាយជាយុវទូតសុច្ឆន្ទៈតំណាងឱ្យប្រទេសកម្ពុជា ចូលរួមក្នុងកិច្ចប្រជុំកំពូលយុវជនស្ដីអំពីសត្វខ្លាពីចម្ងាយ ដែលរៀបចំដោយ WWF-Tiger Alive Initiative និង WWF-India, ជួបផ្ទាល់ពិសេសជាមួយអ្នកវិទ្យាសាស្ត្រដើម្បីស្វែងយល់ពីការងារអភិរក្សធនធានធម្មជាតិ និងវិញ្ញាបនបត្រនៃការទទួលស្គាល់ការចូលរួមផងដែរ។
យវុជនដែលចូលរួមអាចដាក់ខិត្តប័ណ្ណដែលបានធ្វើតាមតំណភ្ជាប់នេះ៖ https://bit.ly/3xKAuob៕