បាត់ដំបងៈ អភិបាលខេត្តបាត់ដំបង លោក សុខ លូ បានស្នើឱ្យប្រទេសបារាំងពិនិត្យមើលលទ្ធភាពក្នុងការជួយជួសជុលសំណង់អគារចាស់សល់ពីសម័យអាណានិគមបារាំង ខណៈដែលឯកអគ្គរដ្ឋទូតបារាំងប្រចាំកម្ពុជាបានសន្យាថានឹងបន្តពង្រឹងកិច្ចសហប្រតិបត្តិការគ្នាបន្ថែមទៀត។
ការស្នើនេះត្រូវបានធ្វើឡើងនៅក្នុងជំនួបពិភាក្សាការងារមួយរវាងលោកអភិបាលខេត្ត និងលោក ហ្សាក់ ប៉ឺឡេ (Jacques Pellet) ឯកអគ្គរដ្ឋទូតបារាំងប្រចាំកម្ពុជានារសៀលថ្ងៃទី ២២ ខែមិថុនានេះ។
លោក សុខ លូ បានមានប្រសាសន៍ថា រាជរដ្ឋាភិបាលបានឯកភាពជាគោលការណ៍ដល់អាកាសចរស៊ីវិលឱ្យធ្វើការកែលម្អអាកាសយានដ្ឋានបាត់ដំបងឱ្យក្លាយទៅជាអាកាសយានដ្ឋាន ប្រភេទ 4C ដែលមានកម្រិតស្មើនឹងខេត្តសៀមរាប ហើយបច្ចុប្បន្នក្រុមការងារកំពុងតែរៀបចំលើគម្រោងមួយនេះ។ លោកបានបន្តទៀតថា កន្លងមករដ្ឋបាលខេត្តបាត់ដំបងបានធ្វើការខិតខំក្នុងការថែរក្សាសំណង់អគារបុរាណមួយនេះ តែក៏មានបញ្ហាមួយចំនួនដែលពាក់ព័ន្ធទៅនឹងបញ្ហាបច្ចេកទេស និងថវិកាមួយចំនួនផងដែរ ដើម្បីអភិវឌ្ឍន៍តំបន់អភិរក្សទាំងនេះ។ លើសពីនោះ រដ្ឋបាលខេត្តបាត់ដំបងបានធ្វើការហាមឃាត់ប្រជាពលរដ្ឋដែលបានធ្វើការជួសជុលផ្ទះដែលជាសំណង់បុរាណដោយខុសពីទម្រង់ដើមនៃអគារ។ ក្នុងនោះរដ្ឋបាលខេត្តក៏នឹងធ្វើការពិនិត្យលទ្ធភាពដល់ផ្ទះ ដែលបានកែប្រែខុសពីទម្រង់ដើមផងដែរ។
លោក សុខ លូ ក៏បានលើកឡើងផងដែរថា ខេត្តបាត់ដំបងក៏មានផ្សារមួយដែលជាសំណង់តាំងពីសម័យអាណានិគមបារាំង ដែលកំពុងជួបប្រទះហានិភ័យ។ លោកបានសំណូមពរដល់ប្រទេសបារាំងតាមរយៈឯកអគ្គរដ្ឋទូតបារាំងប្រចាំកម្ពុជា ដើម្បីពិនិត្យមើលលទ្ធភាពជួយដល់សំណង់អគារនេះតាមលទ្ធភាពជាក់ស្ដែងហើយថ្ងៃក្រោយតំបន់អភិរក្សបេតិកភណ្ឌទាំងនេះនឹងធ្វើឱ្យខេត្តបាត់ដំបងអាចរកចំណូល តាមរយៈភ្ញៀវទេសចរមកទស្សនាកម្សាន្ត។
លោក ហ្សាក់ ប៉ឺឡេ បានថ្លែងកោតសរសើរដល់រដ្ឋបាលខេត្តបាត់ដំបងដែលបានខិតខំព្យាយាមក្នុងការថែរក្សាសំណង់អគារបុរាណនានា ដែលកសាងឡើងតាមសម័យអាណានិគមនិយមបារាំង និងបានធ្វើការជួសជុលជាអន្លើកន្លែងដែលខូចខាត ដើម្បីរក្សានូវសំណង់អគារបុរាណនោះបានល្អប្រសើរ។ ក្នុងនោះ លោកក៏បានមានការចាប់អារម្មណ៍ទៅលើគម្រោងដែលដាក់ឱ្យដំណើរការឡើងវិញអាកាសយានដ្ឋានបាត់ដំបង ដែលនេះគឺជាផ្លូវមួយឈានទៅរកការដឹកជញ្ជូនកាន់តែមានភាពងាយស្រួល និងបង្កឱ្យមានការលើកស្ទួយនៅក្នុងវិស័យដឹកជញ្ជូននៅខេត្តបាត់ដំបង កាន់តែមានការរីកចម្រើន។
លោក ហ្សាក់ ប៉ឺឡេ បានបន្តថា ទាក់ទងទៅនឹងការអភិរក្សសំណង់បេតិកភណ្ឌក៏ស្ថានទូតបានធ្វើការគិតគូរផងដែរនៅក្នុងប្រទេសកម្ពុជា ដើម្បីទាក់ទាញភ្ញៀវទេសចរមកទស្សនាកាន់តែច្រើន។ ប៉ុន្តែអ្វីដែលស្ថានទូតត្រូវដឹងគឺផែនការអភិវឌ្ឍន៍ និងអភិរក្ស សំណង់បេតិកភណ្ឌ សតវត្សរ៍ទី ២០ ដែលត្រូវធ្វើការសិក្សាអំពីប្លង់លម្អិតជាមុនសិនផងដែរ និងធ្វើការពិភាក្សាជាមួយដៃគូនៃប្រទេសបារាំង។
លោក ហ្សាក់ ប៉ឺឡេ បានថ្លែងថា៖ «ប្រទេសបារាំងនឹងបន្តពង្រឹងកិច្ចសហប្រតិបត្តិការជាមួយគ្នាក្នុងន័យធ្វើការអភិវឌ្ឍឱ្យកាន់តែមានការរីកចម្រើន និងបន្តផ្សព្វផ្សាយដល់ភ្ញៀវទេសចរ និងអ្នកវិនិយោគឱ្យមកខេត្តបាត់ដំបងកាន់តែច្រើនឡើងៗ»៕