.jpg)
ប្រជាពលរដ្ឋតម្រង់ជួរចូលរួមបោះឆ្នោតឃុំ-សង្កាត់ នៅខណ្ឌទួលគោក កាលពីថ្ងៃទី ៥ មិថុនា។ ហុង មិនា
គណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា ប្រជាពលរដ្ឋចេញទៅបោះឆ្នោតសរុបជាង ៧ លាននាក់ ដែលស្មើនឹង ៨០,៣២% ហើយគណបក្សប្រជាជនកម្ពុជាទទួលបានចំនួន ៩ ៣៧៦ អាសនៈ ខណៈគណបក្សភ្លើងទៀនទទួលបានចំនួន ២ ១៩៨ អាសនៈ។
យោងតាមសេចក្តីប្រកាសព័ត៌មានបានឱ្យដឹងថា គណៈកម្មាធិការជាតិរៀបចំការបោះឆ្នោតបានបើកកិច្ចប្រជុំមួយនាព្រឹកថ្ងៃទី ២៤ ខែមិថុនា ដើម្បីពិនិត្យ និងសម្រេចលើឯកសារពាក់ព័ន្ធនឹងការប្រកាសលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៥ ឆ្នាំ ២០២២។
យោងតាមតារាងលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិ ទី ៥ ឆ្នាំ ២០២២ បានលើកឡើងថា ប្រជាពលរដ្ឋចេញទៅបោះឆ្នោតសរុបចំនួន ៧ ៣៩៨ ៤២៧ នាក់ ស្មើនឹង ៨០,៣២% ក្នុងនោះសន្លឹកឆ្នោតបានការសរុបចំនួន ៧ ២៣៧ ០៣៧ សន្លឹក និងសន្លឹកឆ្នោតមិនបានការសរុបចំនួន ១៥៧ ៣៩០ សន្លឹក។
ចំណែក បញ្ជីបេក្ខជននៃគណបក្សនយោបាយចំនួន ៩ ក្នុងចំណោមគណបក្សនយោបាយចំនួន ១៧ ដែលបានចូលរួមប្រកួតប្រជែងបានទទួលអាសនៈក្រុមប្រឹក្សា សម្រាប់ការបោះឆ្នោត ជ្រើសរើសក្រុមប្រឹក្សាឃុំ សង្កាត់ អាណត្តិទី ៥ ឆ្នាំ ២០២២។
គណៈកម្មាធិការជាតិរៀបចំការបោះឆ្នោតបានឱ្យដឹងថា៖ «គណបក្សប្រជាជនកម្ពុជាទទួលបាន ៩៣៧៦ អាសនៈនៃគណបក្សភ្លើងទៀនទទួលបាន ២១៩៨ អាសនៈ, គណបក្សហ៊្វុនស៊ិនប៉ិចទទួលបាន ១៩ អាសនៈ, គណបក្សខ្មែររួបរួមជាតិទទួលបាន ១៣ អាសនៈ»។
ប្រភពដដែលបានបន្តថា គណបក្សប្រជាធិបតេយ្យមូលដ្ឋានទទួលបាន ៦ អាសនៈ,គណបក្សខ្មែរស្រឡាញ់ជាតិទទួលបាន ៥ អាសនៈ, គណបក្សយុវជនកម្ពុជាទទួលបាន ៣ អាសនៈ, គណបក្សកម្ពុជានិយមទទួលបាន ១ អាសនៈ និងគណបក្សសំបុកឃ្មុំសង្គមប្រជាធិបតេយ្យទទួលបាន ១ អាសនៈ។
គ.ជ.ប សម្រេចឱ្យអង្គភាពជំនាញផ្សព្វផ្សាយលទ្ធផលផ្លូវការនៃការបោះឆ្នោតនេះជាសាធារណៈនៅថ្ងៃអាទិត្យទី ២៦ ខែមិថុនា ឆ្នាំ ២០២២ តាមប្រព័ន្ធផ្សព្វផ្សាយព័ត៌មានរបស់រដ្ឋ និងផ្សាយតាមគេហទំព័រ និងតាមប្រព័ន្ធផ្សព្វផ្សាយព័ត៌មានសង្គម របស់ គ.ជ.ប៕
