ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃបានថ្លែងថា លទ្ធផលសម្រេចបានក្នុងការប្រឆាំងការសម្អាតប្រាក់ ហិរញ្ញប្បទានភេវរកម្ម និងហិរញ្ញប្បទានដល់ការរីកសាយភាយអាវុធមហាប្រល័យ គឺជាបេសកកម្មដ៏មានសារៈសំខាន់បំផុតសម្រាប់ប្រទេសកម្ពុជា។
លោកលើកឡើងដូច្នេះក្នុងឱកាសលោកដឹកនាំកិច្ចប្រជុំលើកទី ៤ នៃគណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ និងហិរញ្ញប្បទានភេវរកម្ម និងហិរញ្ញប្បទានដល់ការរីកសាយភាយអាវុធមហាប្រល័យ (គ.ស.ហ) នៅទីស្ដីការក្រសួងមហាផ្ទៃនៅថ្ងៃនេះ។
លោកថែមទាំងបានចាត់ទុកលទ្ធផលទាំងនេះគឺជាការឆ្លើយតបអនុសាសន៍របស់អន្តរជាតិ ដើម្បីធានាប្រសិទ្ធភាពនៃការប្រយុទ្ធប្រឆាំងនឹងបទល្មើសទាំងនេះទៅតាមឆន្ទៈរបស់រាជរដ្ឋាភិបាល។
លោក ស ខេង បញ្ជាក់ថាក្នុងរយៈពេលកន្លងមកនេះ ទោះបីមានការប្រឈមនឹងវិធានការបង្ការទប់ស្កាត់ការឆ្លងរីករាលដាលជំងឺកូវីដ ១៩ និងមានការបោះឆ្នោតជ្រើសរើសក្រុមប្រឹក្សាឃុំ សង្កាត់ ក៏ដោយ ក៏ថ្នាក់ដឹកនាំ និងមន្ត្រីពាក់ព័ន្ធរបស់ គ.ស.ហ បានខិតខំបំពេញភារកិច្ចយ៉ាងសកម្ម។
កិច្ចប្រជុំនេះមានការចូលរួមពីលោក ជា ចាន់តូ ទេសាភិបាលធនាគារជាតិនៃកម្ពុជា លោក កើត រិទ្ធ រដ្ឋមន្ត្រីក្រសួងយុត្តិធម៌ និងថ្នាក់ដឹកនាំ និងមន្ត្រីពាក់ព័ន្ធមួយចំនួនទៀត៕