.jpg)
ភ្នំពេញៈ កាកបាទក្រហមកម្ពុជានៅថ្ងៃទី ២៤ ខែមិថុនានេះ បានធ្វើយុទ្ធនាការស្តីពី «ការចូលរួមលើកកម្ពស់សុវត្ថិភាពចរាចរណ៍ផ្លូវគោក និងបរិយាបន្ន» ដើម្បីចូលរួមអប់រំផ្សព្វផ្សាយ និងលើកទឹកចិត្តពលរដ្ឋឱ្យចូលរួមលើកកម្ពស់ និងពង្រឹងការអនុវត្តច្បាប់នៅកម្ពុជា។
គោលដៅនៃយុទ្ធនាការលើកកម្ពស់សុវត្ថិភាពចរាចរណ៍នេះ គឺត្រូវបានបែងចែកជា ៤ ក្រុមទៅតាមគោលដៅចំនួន ៤។ ក្នុងនោះរួមមានទីតាំងច្រមុះជ្រូកស្ទឹងមានជ័យ ទីតាំងរង្វង់មូលស្តុបនាងគង្ហីង ទីតាំងរង្វង់មូលគួចកាណុងស្ពានជ្រោយចង្វារ និងទីតាំងរង្វង់មូលស្តុបស្ពានព្រះមុនីវង្ស។ នៅតាមគោលដៅនីមួយៗ ក្រុមការងារបានបែងចែកជាក្រុមផ្សព្វផ្សាយជូនប្រជាពលរដ្ឋ និងមានក្រុមសម្របសម្រួលសំណួរចម្លើយ ហើយផ្តល់រង្វាន់ជូនប្រជាពលរដ្ឋដែលបានឆ្លើយសំណួរត្រឹមត្រូវផងដែរ។ នេះបើយោងតាមកាកបាទក្រហមកម្ពុជា។
លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជាបានថ្លែងក្នុងឱកាសបើកយុទ្ធនាការនេះថា បន្ទាប់ពីស្ថានភាពនៃជំងឺកូវីដ ១៩ នៅកម្ពុជាមានសភាពធូរស្រាល ដែលបើកឱកាសដល់ការធ្វើដំណើរតាមដងផ្លូវកាន់តែមមាញឹកនោះ គ្រោះថ្នាក់ចរាចរណ៍បានចាប់ផ្តើមកើនឡើងខ្លាំងនៅឆមាសទី១ ដើមឆ្នាំ ២០២២ នេះ។ នេះបាននិងកំពុងតែធ្វើឱ្យមានការព្រួយបារម្ភចំពោះសោកនាដកម្មនេះ ហើយមូលហេតុចម្បងដែលបង្កឱ្យមានគ្រោះថ្នាក់ធ្ងន់ធ្ងរនោះ គឺមកពីមនុស្សម្នាក់ៗដែលមិនគោរពច្បាប់ចរាចរណ៍។ ក្នុងនោះមានដូចជា ការបើកបរលើសល្បឿនកំណត់ ការមិនគោរពសិទ្ធិអាទិភាព មិនគោរពសញ្ញាចរាចរណ៍ មិនពាក់មួកសុវត្ថិភាពត្រឹមត្រូវ ការវ៉ាជែងក្នុងស្ថានភាពគ្រោះថ្នាក់ និងការបើកបរក្នុងពេលស្រវឹងជាដើម។
លោកស្រីបានបន្តថា ទន្ទឹមនឹងបញ្ហាគ្រោះថ្នាក់ចរាចរណ៍ ក៏ដូចជាបញ្ហាដែលបង្កឡើងដោយការប្រែប្រួលអាកាសធាតុ ក៏ជារឿងដែលត្រូវយកចិត្តទុកដាក់ក្នុងការដោះស្រាយទាំងអស់គ្នាដែរ។ ក៏ប៉ុន្តែបញ្ហាទាំងអស់នេះ គេអាចចូលរួមទប់ស្កាត់ កាត់បន្ថយ និងត្រៀមបង្ការបាន តាមរយៈការចូលរួមអនុវត្តច្បាប់របស់ពលរដ្ឋម្នាក់ៗ។
លោកស្រីបានបញ្ជាក់ថា៖ «ហេតុដូចនេះ ភារកិច្ចរបស់យើង គឺចុះអប់រំផ្សព្វផ្សាយលើកទឹកចិត្តឱ្យបងប្អូនប្រជាពលរដ្ឋយើងឱ្យចូលរួមអនុវត្តច្បាប់ចរាចរណ៍ផ្លូវគោកទាំងអស់គ្នា»៕
