អភិបាលខេត្តព្រះសីហនុលោក គួច ចំរើន បានលើកឡើងថា វិស័យផលិតកម្មផលិត និងកែច្នៃជាតម្រូវការស្តង់ដាសុវត្ថិភាពម្ហូបអាហារកម្ពុជា ដែលតម្រូវឱ្យរក្សា និងធានាសុវត្ថិភាពសម្រាប់ប្រជាពលរដ្ឋ ឬអ្នកទទួលទាន ដើម្បីសុខុមាលភាពប្រជាពលរដ្ឋក្នុងស្រុក និងលើកតម្កើងការប្រើប្រាស់ផលិតផលក្នុងស្រុកផងដែរ។
លោកបានថ្លែងដូចនេះនាថ្ងៃទី ២៤ ខែមិថុនា ក្នុងសិក្ខាសាលាបណ្តុះបណ្តាល និងពង្រឹងសមត្ថភាពអ្នកផលិតចំណីអាហារនៅតាមបណ្តាខេត្ត ក្រុង «សុខដុមនីយកម្មថាមវន្ត អភិវឌ្ឍ និងសហគមន៍» ដោយមានការចូលរួមពីសមាគមអ្នកផលិតចំណីអាហារកម្ពុជា និងម្ចាស់សហគ្រាសអាជីវកម្មក្នុងខេត្តព្រះសីហនុ។
លោក គួច ចំរើន មានប្រសាសន៍ថា៖ «សហគ្រាសខ្នាតតូច និងមធ្យមត្រូវពង្រឹងសមត្ថភាពផលិត និងខ្សែចង្វាក់ផលិតកម្មប្រកបដោយភាពទទួលខុសត្រូវខ្ពស់ និងគុណធម៌ជាអ្នកផលិត ការច្នៃផលិតផលម្ហូបអាហារ»។
លោកបានបន្ថែមថា ដោយត្រូវធ្វើការពង្រឹងកម្រិតយល់ដឹងលើបទប្បញ្ញត្តិពាក់ព័ន្ធនឹងវិធានអនាម័យសុវត្ថិភាពម្ហូបអាហារ ភូតគាមអនាម័យកសិផល និងកសិផលកែច្នៃរួមទាំងកាតព្វកិច្ចក្នុងនាមសហគ្រាសខ្នាតតូច និងមធ្យមពីសំណាក់ម្ចាស់សហគ្រាសលើដំណើរការចង្វាក់ផលិតកម្មផ្ទាល់កាន់តែមានប្រសិទ្ធភាពផងដែរ។
លោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជាក៏បានឱ្យដឹងដែរថា សិក្ខាសាលាបណ្ដុះបណ្ដាលនេះធ្វើឡើង ដើម្បីជួយជំរុញថាមវន្តសក្តានុពលខេត្ត ដើម្បីរួមគ្នាធ្វើឱ្យចរន្តសេដ្ឋកិច្ចឆ្ពោះទៅមុខកាន់តែរហ័សថែមទៀត។
លោកបានថ្លែងថា៖ «យើងត្រូវយល់ដឹងឱ្យបានច្បាស់ក្នុងនាមជាម្ចាស់សហគ្រាត្រូវត្រៀមខ្លួនចាប់ផ្ដើមដំណើរការសហគ្រាសអាជីវកម្ម ឬដំណើរការខ្សែចង្វាក់ផលិតកម្មផលិត និងការកែច្នៃរបស់ខ្លួនដោយអនុលោមតាមស្តង់ដាជាតិស្ដីពីម្ហូបអាហារ ស្តង់ដាបញ្ជា ឬស្តង់ដាស្ម័គ្រចិត្ត បទប្បញ្ញត្តិពាក់ព័ន្ធ និងវិធានការអនាម័យសុវត្ថិភាពម្ហូបអាហារ ភូតគាមអនាម័យ…ជាដើម»៕