.jpg)
កម្លាំងការិយាល័យប្រឆាំងគ្រឿងញៀនសហការជាមួយកម្លាំងមូលដ្ឋានកងរាជអាវុធហត្ថស្រុកសំរោង ក្រុងដូនកែវ និងស្រុកគីរីវង់ ខេត្តតាកែវ បានចុះកាប់បំផ្លាញដំណាំកញ្ឆាដែលត្រូវបានលួចដាំនៅតាមជួរភ្នំ ដោយបានបំផ្លាញដំណាំកញ្ឆាខុសច្បាប់ជាង ៨ ម៉ឺនដើម។
យោងតាមបញ្ជាការដ្ឋានកងរាជអាវុធហត្ថខេត្តតាកែវ នៅថ្ងៃទី ២៤ ខែមិថុនានេះ បានឱ្យដឹងថា ប្រតិបត្តិការកាប់បំផ្លាញដំណាំកញ្ឆានេះ ត្រូវបានធ្វើឡើងនាថ្ងៃទី ២៣ ដោយមានកម្លាំងការិយាល័យប្រឆាំងគ្រឿងញៀនសហការជាមួយកម្លាំងមូលដ្ឋានកងរាជអាវុធហត្ថស្រុកសំរោង ក្រុងដូនកែវ និងស្រុកគិរីវង់។
ប្រតិបត្តិការនេះ ដឹកនាំដោយលោក ង៉ែត ចាន់ធី មេបញ្ជាការរងនៃបញ្ជាការដ្ឋានកងរាជអាវុធហត្ថខេត្ត, អភិបាលរងខេត្ត អភិបាលស្រុក និងមន្រ្តីសមត្ថកិច្ចជាច្រើនរូបទៀត ក្រោមការបញ្ជាផ្ទាល់ដោយព្រះរាជអាជ្ញារងអមសាលាដំបូងខេត្តតាកែវ លោក ញ៉ាន បូរី។
សមត្ថកិច្ចបានរុករកទីតាំងដាំដំណាំកញ្ឆា និងបានដុតបំផ្លាញចោលនៅកន្លែងរកឃើញទាំង ០២ កន្លែងតែម្តង ដែលកន្លែងទី០១ នៅត្រង់ចំណុចខាងកាប់ថ្មជ្រោះទួងទូង ស្ថិតនៅភូមិស្លា ឃុំតាអូរ ស្រុកគីរីវង់ ដោយបានកាប់បំផ្លាញកញ្ឆាស្រស់ចោលចំនួន ៥ ៣៦០ ដើម, ផ្ទៃដី ២៥៩ ម៉ែត្រការ៉េ ស្មើចំនួន ០៦ ទីតាំង និងអាងស្តុបទឹកចំនួន ០៤ ផងដែរ។
ចំណែកកន្លែងទី០២ ស្ថិតត្រង់ចំណុចភ្នំថ្មត្រួត ស្ថិតនៅភូមិឈើទាលភ្លោះ ឃុំព្រៃអំពក ស្រុកគីរីវង់ ដោយបានកាប់កញ្ឆាស្រស់ចោលចំនួន ២ ៩៨៩ ដើម ស្មើ ០៦ ទីតាំងផ្ទៃដី ១ ១០០ ម៉ែត្រការ៉េ និងអាងស្តុកទឹកចំនួន ០៣៕
