The Phnom Penh Post Search

Search form




Logo of Phnom Penh Post newspaper Phnom Penh Post - ​លោកនាយក​រដ្ឋមន្ត្រី ហ៊ុន សែន អំពាវនាវ​ឱ្យ​ជនរួមជាតិ ត្រូវ​ចូលរួម​ប្រយុទ្ធប្រឆាំង​គ្រឿងញៀន​ខុសច្បាប់​

​លោកនាយក​រដ្ឋមន្ត្រី ហ៊ុន សែន អំពាវនាវ​ឱ្យ​ជនរួមជាតិ ត្រូវ​ចូលរួម​ប្រយុទ្ធប្រឆាំង​គ្រឿងញៀន​ខុសច្បាប់​

Content image - Phnom Penh Post
គ្រឿងញៀនជិត ២០០ គីឡូក្រាម ដែលសមត្ថកិច្ចបង្រ្កាបបានកាលពីឆ្នាំមុន។ រូបថត ហ្វេសប៊ុក

​លោកនាយក​រដ្ឋមន្ត្រី ហ៊ុន សែន អំពាវនាវ​ឱ្យ​ជនរួមជាតិ ត្រូវ​ចូលរួម​ប្រយុទ្ធប្រឆាំង​គ្រឿងញៀន​ខុសច្បាប់​

ប្រមុខ​រាជរដ្ឋាភិបាល​កម្ពុជា បាន​អំពាវនាវ​ដល់​គ្រប់​ក្រសួង ស្ថាប័ន អាជ្ញា​ធរមាន​សមត្ថកិច្ច កម្លាំងប្រដាប់អាវុធ​គ្រប់​ប្រភេទ វិស័យ​សាសនា វិស័យ​ឯកជន អង្គការ​ជាតិ អន្តរជាតិ និង​ជនរួមជាតិ​ទាំងអស់ ពិសេស​មាតាបិតា​និង​អាណាព្យាបាល ត្រូវ​ចូលរួម​ប្រយុទ្ធប្រឆាំង​គ្រឿងញៀន​ខុសច្បាប់​។​

​លោកនាយក​រដ្ឋមន្ត្រី ហ៊ុន សែន បានលើកឡើង​ដូចនេះ តាមរយៈ​សារលិខិត ក្នុងឱកាស​ប្រារព្ធ​ទិវា​អន្តរជាតិ​ប្រយុទ្ធប្រឆាំង​គ្រឿងញៀន​ថ្ងៃទី​២៦ ខែមិថុនា ឆ្នាំ​២០២២​ខាងមុខនេះ ដោយ​លោក​បានបង្ហាញ​ពី​ការគាំទ្រ​យ៉ាង​ពេញទំហឹង ចំពោះ​ការរៀបចំ​ទិវា​ដ៏​មាន​សារៈសំខាន់​នេះ​ជាមួយ​បណ្តា​ប្រទេស​នានា និង​ការិយាល័យ​អង្គការសហប្រជាជាតិ​សម្រាប់​ត្រួតពិនិត្យ​គ្រឿងញៀន​និង​បទឧក្រិដ្ឋ​។​

​សម្រាប់​ឆ្នាំ ២០២២​​ នេះ ការិយាល័យ​អង្គការសហប្រជាជាតិ​សម្រាប់​ត្រួតពិនិត្យ​គ្រឿងញៀន​និង​បទឧក្រិដ្ឋ (UNODC) បាន​ដាក់ចេញ​ប្រធានបទ «​ដោះស្រាយ​បញ្ហា​គ្រឿងញៀន​ក្នុង​វិបត្តិ​សុខភាព​និង​មនុស្សធម៌​» ដើម្បី​ជំរុញ​នូវ​ការលើកកម្ពស់​ប្រសិទ្ធភាព​នៃ​ការងារ​ប្រយុទ្ធប្រឆាំង​គ្រឿងញៀន នៅក្នុង​កាលៈទេសៈ​ដែល​ពិភពលោក​បាននិងកំពុង​ជួបប្រទះ​ទៅនឹង​បញ្ហា​ប្រឈម​ជាច្រើន ជាពិសេស​ក្នុង​បរិបទ​នៃ​វិបត្តិ​សុខភាព​និង​មនុស្សធម៌​។​

​លោក ហ៊ុន សែន បាន​លើកឡើងថា ៖ «​ជាក់ស្តែង ក្នុង​ឆ្នាំ​ ២០២២​ នេះ បើទោះបីជា​ប្រទេស​កម្ពុជា ក៏ដូចជា​ពិភពលោក​ទាំងមូល​បាន និងកំពុង​បន្ត​ទទួលរង​នូវ​បញ្ហា​ប្រឈម​ជាច្រើន ដែល​បង្កឡើង​ដោយ​ជំងឺ​កូ​វីដ​១៩ និង​បញ្ហា​សង្គ្រាម​នៅ​ប្រទេស​អ៊ុយ​ក្រែ​ន​ក្តី ក៏​រាជរដ្ឋាភិបាល​កម្ពុជា នៅតែ​បន្ត​ផ្តោត​ការយកចិត្តទុកដាក់ ដោយ​ចាត់ទុក​ការងារ​ប្រយុទ្ធប្រឆាំង​គ្រឿងញៀន នៅតែ​ជា​ការងារ​អាទិភាព​មួយ​ក្នុងចំណោម​ការងារ​អាទិ​ភាព​នានា​របស់​រាជរដ្ឋាភិបាល​»​។​

​ទោះបីជា​មានការ​ខិតខំ​ប្រឹងប្រែង​ទទួលបាន​លទ្ធផល​ជាច្រើន​ក៏ដោយ ប៉ុន្តែ​ដោយ​និន្នាការ​រួម​ជាស​កល កម្ពុជា​ក៏ដូចជា​បណ្តា​ប្រទេស​ដទៃទៀត នៅតែ​ប្រឈម​គួរឱ្យ​ព្រួយបារម្ភ​ពី​ការប៉ុនប៉ង ផលិត​កែច្នៃ រក្សាទុក ជួញដូរ និង​ប្រើប្រាស់​គ្រឿងញៀន​ទាំង​ក្នុងពេល​បច្ចុប្បន្ន​និង​ទៅ​អនាគត​។

​លោក ហ៊ុន សែន បានធ្វើ​ការណែនាំ​និង​សំណូមពរ បន្ថែម​ទៅលើ​បទបញ្ជា​គោលការណ៍​ណែនាំ ដែល​បាន​ដាក់ចេញ​កន្លងមក​មួយចំនួនទៀត​ដោយ​លោក​បាន​អំពាវនាវ​ដល់​បងប្អូន​កូនក្មួយ ព្រមទាំង​ចៅៗ​ជា​ជនរួមជាតិ​ទាំងអស់ ពិសេស​មាតាបិតា និង​អាណាព្យាបាល សូម​បន្ត​ចូលរួម និង​គាំទ្រ​ឱ្យបាន​កាន់តែ​សកម្ម​ថែមទៀត ដើម្បី​រួមគ្នា បង្ការ ទប់ស្កាត់ និង​ដោះស្រាយ​នូវ​រាល់​បញ្ហា​ដែល​អាច​កើតមាន​នៅក្នុង​សហគមន៍​។​

​លោក​បាន​បញ្ជាក់ថា ៖ «​ខ្ញុំ​ក៏​សូមឱ្យ​មាតាបិតា​និង​អាណាព្យាបាល បន្ត​យកចិត្តទុកដាក់​ថែទាំ និង​អប់រំ កូនចៅ​ឱ្យបាន​ល្អ ដើម្បីឱ្យ​ពួកគេ​លូតលាស់​ធំធាត់​ប្រកបដោយ​សុខភាព​និង​សុវត្ថិភាព ចៀស​ផុតពី​បញ្ហា​គ្រឿងញៀន បញ្ហា​អវិជ្ជមាន​ក្នុងសង្គម​ផ្សេងៗ​ទៀត ដើម្បី​អនាគត​កូនចៅ​យើង​»​។

​គ្រប់​ក្រសួង ស្ថាប័ន វិស័យ​ឯកជន និង​សាសនា ត្រូវ​បន្ត​លើកកម្ពស់​ការអនុវត្ត​សកម្មភាព​ផ្សព្វផ្សាយ​អប់រំ​ពី​ផលប៉ះពាល់​នៃ​គ្រឿងញៀន​ឱ្យបាន​ផុលផុស និង​គ្រប់​គោលដៅ​ប្រឈម​។

​លោក ហ៊ុន សែន បាន​បន្ថែមថា អាជ្ញាធរ​ជាតិ​ប្រយុទ្ធប្រឆាំង​គ្រឿងញៀន គណ​:​ក​ម្មា​ធិ​ការត្រួតពិនិត្យ​គ្រឿងញៀន រាជធានី​ខេត្ត ពិសេស​ក្រសួងសុខាភិបាល និង​ក្រសួង​សង្គមកិច្ច អតីតយុទ្ធជន និង​យុវនីតិសម្បទា ត្រូវ​បន្ត​ពង្រឹងគុណភាព​ប្រសិទ្ធភាព និង​ភាពជឿជាក់​នៃ​ការផ្តល់សេវា​ព្យាបាល​ស្តារនីតិសម្បទា​ទាំង​នៅក្នុង​មជ្ឈមណ្ឌល​ជាតិ មជ្ឈមណ្ឌល​បណ្តោះអាសន្ន របស់​រដ្ឋ​និង​ឯកជន​។​

​លោក​ថា ៖ «​មន្ទីរពេទ្យបង្អែក មណ្ឌល​សុខភាព​នានា ត្រូវ​ជួយ​សម្របសម្រួល គាំទ្រ លើកទឹកចិត្ត និង​ជំរុញ​ឱ្យ​អ្នក​ប្រើ​គ្រឿងញៀន​ឱ្យទៅ​ទទួលយក​សេវា​ព្យាបាល ស្តារនីតិសម្បទា ក្នុង​មូលដ្ឋាន​របស់ខ្លួន​»៕

អត្ថបទគួរចាប់អារម្មណ៍