ភ្នំពេញៈ លោក ប្រាក់ សុខុន រដ្ឋមន្ត្រីការបរទេសកម្ពុជាបញ្ជាក់ថា កម្ពុជាប្តេជ្ញាអនុវត្តរាល់ឯកសារ និងកិច្ចព្រមព្រៀងដែលថ្នាក់ដឹកនាំកម្ពុជា-វៀតណាមបានអនុម័តកន្លងមកឱ្យលេចចេញជាផ្លែផ្កាជាក់ស្តែង ដើម្បីផលប្រយោជន៍រួមរបស់ប្រជាជនប្រទេសទាំង ២ ក៏ដូចជារួមចំណែកដល់សន្តិភាព ស្ថិរភាព វិបុលភាព និងការអភិវឌ្ឍប្រកបដោយចីរភាពក្នុងសហគមន៍អាស៊ាន និងសកលលោក។
លោកលើកឡើងដូច្នេះកាលពីម្សិលមិញក្នុងបទសម្ភាសន៍ស្តីពីទំនាក់ទំនងការទូតកម្ពុជា-វៀតណាម ក្នុងឱកាសខួបលើកទី៥៥ នៃការបង្កើតទំនាក់ទំនងការទូតកម្ពុជា-វៀតណាម។
តាមរយៈបទសម្ភាសន៍ដែលផ្សព្វផ្សាយដោយក្រសួងការបរទេសកម្ពុជាកាលពីម្សិលមិញ លោក ប្រាក់ សុខុន ថ្លែងថា៖ «យើងក៏នឹងបន្តខិតខំរួមគ្នាដោះស្រាយបញ្ហាប្រឈមដែលអាចកើតមានឡើង ដោយផ្អែកលើគោលការណ៍ភាពជាអ្នកជិតខាងល្អ ការយោគយល់គ្នា និងកិច្ចសហប្រតិបត្តិការផ្តល់ផលប្រយោជន៍ទៅវិញទៅមក»។
លោកបន្តថា កម្ពុជានឹងបន្តជំរុញយន្តការដែលមានស្រាប់ជាមួយវៀតណាមឱ្យកាន់តែសកម្ម ដូចជា កិច្ចប្រជុំគណៈកម្មការចម្រុះកម្ពុជា-វៀតណាមស្តីពីកិច្ចសហប្រតិបត្តិការសេដ្ឋកិច្ច វប្បធម៌ វិទ្យាសាស្ត្រ និងបច្ចេកវិទ្យា (JC) កិច្ចប្រជុំស្តីពីកិច្ចសហប្រតិបត្តិការ និងការអភិវឌ្ឍបណ្តាខេត្តជាប់ព្រំដែនកម្ពុជា-វៀតណាម កិច្ចប្រជុំគណៈកម្មការចម្រុះព្រំដែនកម្ពុជា-វៀតណាម(JBC) ព្រមទាំងយន្តការទ្វេភាគីដទៃទៀត ដើម្បីពង្រីកឱ្យកាន់តែស៊ីជម្រៅ និងទូលំទូលាយថែមទៀតនូវកិច្ចសហប្រតិបត្តិការទ្វេភាគីរវាងប្រទេសទាំង២។
លោកបានថ្លែងថា៖ «ពិតណាស់យើងត្រូវរួមគ្នាបន្តពូនជ្រុំ ថែរក្សា និងពង្រឹងបន្ថែមទៀតនូវចំណងមិត្តភាពជាប្រពៃណី ទំនាក់ទំនងយូរអង្វែង និងកិច្ចសហប្រតិបត្តិការគ្រប់ជ្រុងជ្រោយរវាងកម្ពុជា និងវៀតណាម ដែលកំពុងរីកលូតលាស់ឥតឈប់ឈរ ក្រោមស្មារតីភាពជាអ្នកជិតខាងល្អ សាមគ្គីភាព ជំនឿជឿជាក់ និងការយោគយល់គ្នាទៅវិញទៅមក ដើម្បីផលប្រយោជន៍រួមរបស់ប្រជាជាតិ និងប្រជាជនយើងទាំង២»។
លោក ប្រាក់ សុខុន ថ្លែងថា ក្នុងរយៈពេល ៥៥ ឆ្នាំកន្លងទៅនេះ ទំនាក់ទំនងកម្ពុជា-វៀតណាម បានបង្ហាញឱ្យសកលលោកមើលឃើញយ៉ាងច្បាស់ថា គឺជាទំនាក់ទំនងដ៏រឹងមាំ ស៊ីជម្រៅ គ្រប់ជ្រុងជ្រោយ និងធន់ទៅនឹងសម្ពាធពីការប្រែប្រួលភូមិសាស្ត្រនយោបាយទាំងក្នុងតំបន់និងអន្តរជាតិ។
លោកបន្តថា កម្ពុជា-វៀតណាមអាចរក្សាបាននូវចំណងសាមគ្គីភាពដ៏ស្អិតល្មួត និងកិច្ចសហប្រតិបត្តិការលើគ្រប់វិស័យ និងក្នុងគ្រប់ក្របខ័ណ្ឌទាំងទ្វេភាគី និងពហុភាគី ឱ្យរីកចម្រើនលូតលាស់ជាលំដាប់ នៅគ្រប់ដំណាក់កាល ដើម្បីលើកកម្ពស់ជីវភាពរស់នៅល្អប្រសើររបស់ប្រជាជន និងផលប្រយោជន៍ទៅវិញទៅមកនៃប្រទេសទាំង ២៕