.jpg)
សិក្ខាសាលារួម កម្ពុជា-កូរ៉េ លើកទី២ ស្តីអំពីជំងឺត្រចៀក ច្រមុះ បំពង់ក ជាមួយក្រសួងសុខាភិបាល និងមន្ទីរពេទ្យព្រះអង្គឌួង នៅថ្ងៃនេះ នៅសណ្ឋាគារ ហៃយ៉ាតរីជិនស៊ី ភ្នំពេញ។
ភ្នំពេញៈ កម្ពុជា និងកូរ៉េខាងត្បូងចែករំលែក និងផ្លាស់ប្តូរបទពិសោធគ្នាទៅវិញទៅមក និងជំនាញនៅក្នុងវិស័យត្រចៀក ច្រមុះ និង បំពង់ក ដោយពង្រឹងប្រសិទ្ធភាពនៃការព្យាបាលរួមគ្នា ដោយប្រើវិធីសាស្ត្រពហុជំនាញ។
ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) និងមជ្ឈមណ្ឌលសាកលវិទ្យាល័យ វេជ្ជសាស្ត្រ ស៊ុនជុនយ៉ាង នៃសាធារណរដ្ឋកូរ៉េ បានរៀបចំសិក្ខាសាលារួម កម្ពុជា-កូរ៉េ លើកទី២ ស្តីអំពីជំងឺត្រចៀក ច្រមុះ បំពង់ក ជាមួយក្រសួងសុខាភិបាល និងមន្ទីរពេទ្យព្រះអង្គឌួង នៅថ្ងៃនេះ នៅសណ្ឋាគារ ហៃយ៉ាតរីជិនស៊ី ភ្នំពេញ។
លោក គីម ខ្វាងវុក ប្រធានតំណាងស្តីទីនៃ កយកា ប្រចាំការិយាល័យប្រទេសកម្ពុជា បានថ្លែងថា៖ «គោលបំណងនៃសិក្ខាសាលានេះ គឺដើម្បីចែករំលែកនិងផ្លាស់ប្តូរបទពិសោធគ្នាទៅវិញទៅមក និងជំនាញរបស់ប្រទេសនីមួយៗ (កម្ពុជា កូរ៉េ) នៅក្នុងវិស័យ ត្រចៀក ច្រមុះ និងបំពង់ក ជាពិសេស ក្នុងការពង្រឹងប្រសិទ្ធភាពនៃការព្យាបាលរួមគ្នា រវាងផ្នែក ត្រចៀក ច្រមុះ បំពង់ក ក្បាល និងក ដោយប្រើវិធីសាស្ត្រពហុជំនាញ»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងក្នុងសិក្ខាសាលានេះថា សាធារណរដ្ឋកូរ៉េកន្លងមកបានផ្តល់អគារថ្មី និងជំនួយបច្ចេកទេសសម្រាប់ជំងឺត្រចៀក ច្រមុះ និងបំពង់ក នៅមន្ទីរពេទ្យព្រះអង្គឌួង តាមរយៈ KOICA និងមជ្ឈមណ្ឌលសាកលវិទ្យាល័យវេជ្ជសាស្ត្រ ស៊ុនជុនយ៉ាង នៃសាធារណរដ្ឋកូរ៉េ។
KOICA បញ្ជាក់ក្នុងហ្វេសប៊ុកនាថ្ងៃនេះថា KOICA បានផ្តល់ជំនួយឥតសំណងក្នុងទឹកប្រាក់ចំនួន ៨ លានដុល្លារសហរដ្ឋអាមេរិក សម្រាប់ «គម្រោងការកសាងសមត្ថភាពសម្រាប់មជ្ឈមណ្ឌលត្រចៀក ច្រមុះ បំពង់ក (ENT) នៅមន្ទីរពេទ្យព្រះអង្គឌួង» ដែលបានអនុវត្តចាប់ពីឆ្នាំ២០១៨ រហូតដល់ឆ្នាំ ២០២២នេះ៕
