The Phnom Penh Post Search

Search form




Logo of Phnom Penh Post newspaper Phnom Penh Post - លោក ស ខេង៖ តាម​រយៈការ​បោះឆ្នោត​ជា​បន្ត​បន្ទាប់ ពិសេស​ការ​បោះឆ្នោត​លើក​ចុង​ក្រោយ​នេះ អាច​សន្និដ្ឋាន​ថា ប្រជាពលរដ្ឋ​កម្ពុជា មាន​ភាព​ចាស់​ទុំ អត់ធ្មត់

លោក ស ខេង៖ តាម​រយៈការ​បោះឆ្នោត​ជា​បន្ត​បន្ទាប់ ពិសេស​ការ​បោះឆ្នោត​លើក​ចុង​ក្រោយ​នេះ អាច​សន្និដ្ឋាន​ថា ប្រជាពលរដ្ឋ​កម្ពុជា មាន​ភាព​ចាស់​ទុំ អត់ធ្មត់

Content image - Phnom Penh Post
លោក​ឧបនាយក​រដ្ឋមន្ត្រី រដ្ឋមន្ត្រី​ក្រសួង​មហាផ្ទៃ ស ខេង ​ក្នុង​ពិធី​បុណ្យ​បញ្ចុះ​ខណ្ឌ​សីមា​ព្រះវិហារ​វត្ត​ខន្តី​រស្មី​ព្រហ្មសែន ស្ថិត​នៅ​ក្នុង​ភូមិ​អង្គរសរ ឃុំអង្គរសរ ស្រុក​មេសាង ខេត្ត​ព្រៃវែង នៅ​ថ្ងៃទី​២៥ ខែ​មិថុនា​នេះ។ ហ្វេសប៊ុក

លោក ស ខេង៖ តាម​រយៈការ​បោះឆ្នោត​ជា​បន្ត​បន្ទាប់ ពិសេស​ការ​បោះឆ្នោត​លើក​ចុង​ក្រោយ​នេះ អាច​សន្និដ្ឋាន​ថា ប្រជាពលរដ្ឋ​កម្ពុជា មាន​ភាព​ចាស់​ទុំ អត់ធ្មត់

ព្រៃវែងៈ លោក ស ខេង ឧបនាយករដ្ឋ​មន្ត្រី រដ្ឋមន្ត្រី​ក្រសួង​មហាផ្ទៃ បាន​ឱ្យ​ដឹង​ថា ប្រជាពលរដ្ឋ​ស្រុក​មេសាង មិន​ខុស​ពី​ស្រុក​ដទៃទៀត​នៃខេត្ត​ព្រៃវែង និង​ទូទាំង​ប្រទេស​ដែរ គឺ​បាន​ខិតខំ​ថែរក្សា​សន្តិសុខ​សណ្តាប់ធ្នាប់​សាធារណៈ​បាន​យ៉ាង​ល្អ​ប្រសើរ ពិសេស​ចូលរួម​ធ្វើ​ឱ្យ​ដំណើរការ​ការ​បោះឆ្នោត​ឃុំ សង្កាត់ ប្រព្រឹត្ត​ទៅ​ដោយ​សុវត្ថិភាព​ទាំង​ស្រុង គ្មាន​អំពើ​ហិង្សា និង​គ្មាន​ឃាតកម្ម​នយោបាយ។

ការ​ថ្លែង​របស់​លោក ស ខេង បែបនេះ​ធ្វើ​ឡើង​ក្នុង​ពិធី​បុណ្យ​បញ្ចុះ​ខណ្ឌ​សីមា​ព្រះវិហារ​វត្ត​ខន្តី​រស្មី​ព្រហ្មសែន ស្ថិត​នៅ​ក្នុង​ភូមិ​អង្គរសរ ឃុំអង្គរសរ ស្រុក​មេសាង ខេត្ត​ព្រៃវែង នៅ​ថ្ងៃទី​២៥ ខែ​មិថុនា​នេះ។

លោក​បញ្ជាក់​ថា៖«នេះ​គឺ​ម្យ៉ាង​ដោយសារ​សមត្ថកិច្ច​រដ្ឋបាល​ស្រុក​ឃើញ ប៉ុន្តែ​ទន្ទឹមនោះ​ក៏​មាន​ការ​គាំទ្រ​ពី​ប្រជាពលរដ្ឋ ពី​គណបក្សនយោបាយ​នានា​មិន​បង្ក​នូវ​បញ្ហា​នាំ​ឱ្យ​ប៉ះពាល់​ការ​បោះឆ្នោត»។

លោក​ឧបនាយក​រដ្ឋមន្ត្រី រដ្ឋមន្ត្រី​ក្រសួង​មហាផ្ទៃ បាន​ចាត់​ទុក​បរិយាកាស​នយោបាយ​នៃ​ការ​បោះឆ្នោត​ឃុំ សង្កាត់​នេះ​ថា ជា​វប្បធម៌​ថ្មី​មួយ នៃ​ជនជាតិ​កម្ពុជា​ដែល​ទើប​តែ​បាន​បញ្ចប់​សង្គ្រាម​រ៉ាំរ៉ៃ ការ​បែកបាក់​យ៉ាង​ធ្ងន់ធ្ងរ ប៉ុន្ដែ​គំនុំ​សងសឹក ត្រូវ​បាន​លុប​បំបាត់​ជា​បណ្តើរៗ តាម​រយៈការ​បោះឆ្នោត​ជា​បន្តបន្ទាប់ ពិសេស​ការ​បោះឆ្នោត​លើក​ចុង​ក្រោយ​នេះ អាច​សន្និដ្ឋាន​ថា ប្រជាពលរដ្ឋ​កម្ពុជា មាន​ភាព​ចាស់ទុំ អត់ធ្មត់ មិនមាន​គំនុំ​សងសឹក។

លោក​បន្ថែម​ថា កត្តា​សុខ​សន្តិភាព​ស្ថិរភាព​សព្វថ្ងៃ​ គឺ​ជា​ក្ដី​សង្ឃឹម​ដែល​បង្ហាញ​ពី​ជីវភាព​រស់នៅ​របស់​ប្រជាពលរដ្ឋ​ថា នឹង​កាន់​តែ​ល្អ​ប្រសើរ​នាពេល​អនាគត ពីព្រោះ​គណបក្ស​ប្រជាជន​កម្ពុជា និង​រាជរដ្ឋាភិបាល​ដែល​កំពុង​ដឹកនាំ​ប្រទេស​សព្វថ្ងៃ មាន​គោល​បំណង ធ្វើ​យ៉ាង​ណា​ឱ្យ​ប្រទេស​ជាតិ​មាន​សុខសន្តិភាព មាន​ស្ថិរភាព គ្មាន​សង្គ្រាម គ្មាន​កាប់​សម្លាប់ គ្មាន​តំបន់​អប្បគមន៍ ឬ​ក៏​មាន​កម្លាំង​ឧទ្ទាម​ក្រៅ​ច្បាប់ គឺ​មាន​តែគណបក្ស​នយោបាយ​ដែល​ប្រកួត​ប្រជែង​គ្នា​ដើម្បី​ឡើង​កាន់​អំណាច​តាម​បែប​ប្រជាធិបតេយ្យ។

លោកថ្លែងថា៖​«បោះឆ្នោត​ហើយ យើង​គោរព​ឆន្ទៈ​របស់​ប្រជាពលរដ្ឋ គោរព​ការ​សម្រេច​ចិត្ត​របស់​ពលរដ្ឋ​សំឡេង​ភាគច្រើន ដែល​បោះ​ឱ្យបក្ស​ណា​មួយ​ឈ្នះ​ឆ្នោត។ ឥឡូវ​គណបក្ស​យើង​ឈ្នះ​ឆ្នោត ឆន្ទៈ​ប្រជាពលរដ្ឋ​គាំទ្រ​គណបក្ស​យើង អ៊ីចឹង​អ្នក​ដែល​មិន​ឈ្នះ​ឆ្នោត ឬ​សំឡេងភាគ​តិច​ក្នុង​ក្រុមប្រឹក្សា​ត្រូវ​តែ​ឱ្យ​តម្លៃ ​គោរព​ឆន្ទៈ​ប្រជាពលរដ្ឋ។ ខ្ញុំ​សង្ឃឹម​ថា នៅ​ពេល​បោះឆ្នោត​ខាងមុខ​នេះ យើង​នឹង​ធ្វើ​បាន​ល្អ​ដូចការបោះឆ្នោត​ឃុំ សង្កាត់​ដែរ។ បើ​យើង​ធ្វើ​បាន​ដូច​ការ​បោះឆ្នោត​នេះ កិត្យានុភាព​លើ​ឆាក​អន្តរជាតិ​របស់​កម្ពុជា​យើង​នឹង​កាន់តែ​ត្រូវ​បាន​លើកកម្ពស់»៕

អត្ថបទគួរចាប់អារម្មណ៍