ភ្នំពេញៈ សហព័ន្ធកីឡាឈិនឡូនអាស៊ី បានសន្យាជួយគាំទ្រដល់សហព័ន្ធកីឡាសីដក់ និងឈិនឡូនកម្ពុជា ទាំងផ្នែកបច្ចេកទេស និងការហ្វឹកហាត់ ក្នុងដំណើរត្រៀមលក្ខខណៈរបស់ពួកគេ សម្រាប់ការប្រកួតប្រជែងដណ្តើមមេដាយ ក្នុងព្រឹត្តិការណ៍កីឡាស៊ីហ្គេម ឆ្នាំ ២០២៣ ដែលកម្ពុជា នឹងត្រូវធ្វើជាម្ចាស់ផ្ទះជាលើកដំបូង ក្នុងប្រវត្តិសាស្ត្ររបស់ខ្លួន។
ការសន្យាជួយគ្នាទៅវិញទៅមកនេះ ត្រូវបានធ្វើឡើង ក្រោយពីសហព័ន្ធកីឡាឈិនឡូនអាស៊ី និងសហព័ន្ធកីឡាសីដក់ និងឈិនឡូនកម្ពុជា បានឈានដល់កិច្ចព្រមព្រៀងលើអនុស្សរណៈយោគយល់គ្នា កាលពីថ្ងៃទី ២៤ ខែមិថុនា ឆ្នាំ ២០២២ នៅឯទីស្នាក់ការនៃគណៈកម្មាធិការជាតិអូឡាំពិកកម្ពុជា។
លោក U Soe Naing ប្រធានសហព័ន្ធកីឡាឈិនឡូនអាស៊ី និងជាប្រធានសហព័ន្ធកីឡាឈិនឡូនមីយ៉ាន់ម៉ា និងលោក មាស សារិន ប្រធានសហព័ន្ធកីឡាសីដក់ និងឈិនឡូនកម្ពុជា បានចុះហត្ថលេខាលើអនុស្សរណៈយោគយល់នេះ ក្រោមការចូលរួមជាសាក្សីពីលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងជាអគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី ៣២ ឆ្នាំ ២០២៣។
ការចុះអនុស្សរណៈនេះ មានន័យថា សហព័ន្ធកីឡាឈិនឡូអាស៊ី និងសហព័ន្ធឈិនឡូនមីយ៉ាន់ម៉ា នឹងទទួលខុសត្រូវ លើការហូបចុក ស្នាក់នៅ ការដឹកជញ្ជូន សម្រាប់គ្រូបង្វឹក កីឡាករ កីឡាការិនី និងមន្ត្រីអាជ្ញាកណ្តាលកម្ពុជា ក្នុងអំឡុងពេលពួកគេ ធ្វើដំណើរទៅហ្វឹកហាត់បំប៉នបច្ចេកទេស នៅប្រទេសមីយ៉ាន់ម៉ា រយៈពេលវែង រហូតដល់ស៊ីហ្គេម ឆ្នាំ ២០២៣ នៅកម្ពុជាតែម្តង។
ភ្នំពេញ ប៉ុស្តិ៍ មិនអាចសុំការបំភ្លឺបន្ថែម ពីលោកមាស សារិន ប្រធានសហព័ន្ធកីឡាសីដក់ និងឈិនឡូនកម្ពុជា ទាក់ទងនឹងសេចក្តីលម្អិតបន្ថែមលើការចុះកិច្ចព្រមព្រៀងនេះបានឡើយ។ ប៉ុន្តែ លោក វ៉ាត់ ចំរើន អគ្គលេខាធិការ នៃគណៈកម្មាធិការជាតិ រៀបចំព្រឹត្តិការណ៍ស៊ីហ្គេម ឆ្នាំ ២០២៣ បានបញ្ជាក់ថា កម្ពុជា គ្រោងបញ្ជូនអត្តពលិក គ្រូបង្វឹក និងមន្ត្រីអាជ្ញាកណ្តាលច្រើនជាង ១០ នាក់ ដើម្បីពង្រឹងសមត្ថភាពបច្ចេកទេសនៅមីយ៉ាន់ម៉ា ដែលជាម្ចាស់ដើមនៃកីឡាឈិនឡូននេះ។
លោកបានប្រាប់ភ្នំពេញ ប៉ុស្តិ៍ កាលពីថ្ងៃទី ២៦ ខែមិថុនា ថា៖ «នេះគឺជាការចុះកិច្ចព្រមព្រៀង ដើម្បីជួយគ្នាទៅវិញទៅមក លើវិញ្ញាសាជំនាញកីឡាឈិនឡូន ហើយខាងប្រធានសហព័ន្ធកីឡាឈិនឡូនអាស៊ី បានមកពិនិត្យលទ្ធភាព ក្នុងការជួយកម្ពុជា ទាំងលើជំនួយផ្នែកបច្ចេកទេស ការហ្វឹកហាត់ និងសម្ភារ ពីព្រោះកម្ពុជា ធ្លាប់បានឈ្នះមេដាយមាសស៊ីហ្គេមក្នុងកីឡាឈិនឡូននេះ»។
បើយោងតាមលោក វ៉ាត់ ចំរើន ដើម្បីត្រៀម និងពង្រឹងសមត្ថភាពឱ្យបានល្អសម្រាប់ព្រឹត្តិការណ៍កីឡាស៊ីហ្គេម ឆ្នាំ ២០២៣ នៅភ្នំពេញ កម្ពុជា ត្រៀមបញ្ជូនទាំងអត្តពលិក គ្រូបង្វឹក អាជ្ញាកណ្តាល និងចៅក្រម ទៅទទួលការបង្វឹក និងបណ្តុះបណ្តាលក្នុងទីក្រុង Naypyidaw ឬ Mandalay នៅចន្លោះពី៧ ទៅ ១០ ខែ មុននឹងវិលត្រឡប់មកមាតុប្រទេសវិញ។
លោកបានឱ្យដឹងថា៖ «យើងកំពុងតែរៀបចំក្រុមអត្តពលិកឈិនឡូន និងមន្ត្រីបច្ចេកទេស របស់យើង ហើយយើងជំរុញឱ្យមានការហ្វឹកហាត់ផង និងបណ្តុះបណ្តាលផង សម្រាប់អាជ្ញាកណ្តាល ចៅក្រម។ ហេតុនេះ យើងកំពុងតែត្រៀមលក្ខខណៈឱ្យបានល្អ ដើម្បីអាចហ្វឹកហាត់ឱ្យបានរយៈពេលយូរ និងទទួលបានជោគជ័យ ព្រោះនេះ គឺជាកីឡាប្រពៃណី និងមានប្រភពមកពីប្រទេសមីយ៉ាន់ម៉ា»។
ជាមួយគ្នានេះ លោក U Soe Naing បានសន្យាថា នឹងធ្វើបដិសណ្ឋារកិច្ច ទទួលខុសត្រូវទាំងស្រុង ដើម្បីជួយជំរុញធ្វើយ៉ាងណា ឱ្យអត្តពលិក និងមន្រ្តីបច្ចេកទេសកម្ពុជា ត្រឡប់មកចូលរួមស៊ីហ្គេមលើកទី៣២ ឆ្នាំ២០២៣ មានគុណភាពខ្ពស់ ដោយអាចរៀបចំព្រឹត្តិការណ៍បានល្អ និងប្រកួតដណ្តើមមេដាយបាន។
ក្រៅពីជួយហ្វឹកហាត់ និងបណ្តុះបណ្តាលដល់អត្តពលិក និងមន្ត្រីបច្ចេកទេស ប្រធានសហព័ន្ធកីឡាឈិនឡូនអាស៊ី និងជាសហព័ន្ធកីឡាឈិនឡូនមីយ៉ាន់ម៉ា ក៏សន្យាជួយលើផ្នែករៀបចំមន្ត្រីអាជ្ញាកណ្តាល និងចៅក្រម នៅពេលដែលកម្ពុជា ធ្វើជាម្ចាស់ផ្ទះរៀបចំកីឡាស៊ីហ្គេម នៅឆ្នាំក្រោយផងដែរ។
ប្រភេទកីឡាឈិនឡូននេះ មានវិញ្ញាសាសរុបចំនួន ១២ គឺផ្នែកបុរស ៤ នារី ៤ និងវិញ្ញាសាចម្រុះ ៤ ។
លោកវ៉ាត់ ចំរើន បានថ្លែងអំណរគុណដល់លោក U Soe Naing ប្រធានសហព័ន្ធឈិនឡូអាស៊ី ដែលបានយកចិត្តទុកដាក់ ក្នុងការជួយអភិវឌ្ឍធនធានកីឡារបស់កម្ពុជា ដើម្បីឆ្លើយតបនឹងគោលដៅឆ្ពោះទៅធ្វើម្ចាស់ផ្ទះ ស៊ីហ្គេម ឆ្នាំ ២០២៣ នៅកម្ពុជា ៕
អ៊ិន សុផេង