ភ្នំពេញៈ អាជ្ញាធរជាតិប្រយុទ្ធប្រឆាំងគ្រឿងញៀនបានដុតបំផ្លាញគ្រឿងញៀនជាង ៦ តោន ក្នុងចំណោមគ្រឿងញៀនដែលរឹបអូសបានជាង ៩០ តោន ដើម្បីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀនថ្ងៃទី ២៦ មិថុនា នៅក្បែរអគារមជ្ឈមណ្ឌលសន្និបាត និងពិព័រណ៍កោះពេជ្រ។
ចំណែកសល់ពីនោះនឹងបន្សាប និងបំផ្លាញចោលតាមលក្ខណៈបច្ចេកទេសនាពេលក្រោយ។
លោក ច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញបានឱ្យដឹងថា គ្រឿងញៀនដែលត្រូវដុតកម្ទេចនេះគណៈកម្មការបានរៀបចំតាមលក្ខណៈបច្ចេកទេស និងសុវត្ថិភាព។ នៅចំពោះមុខអង្គពិធីគឺសាលាដំបូងរាជធានីភ្នំពេញបានចេញសេចក្តីសម្រេចរឹបអូសបំផ្លាញចោលមានចំនួន ៥៥ សំណុំរឿងព្រហ្មទណ្ឌដែលមានទម្ងន់សរុប ៩០ តោន ៨០ គីឡូក្រាម និង ៦៦៤,៣០ ក្រាមដែលសមត្ថកិច្ចបង្ក្រាបក្នុងឆ្នាំ ២០២១-២០២២។
លោកបញ្ជាក់ថា គណៈកម្មការដុតបំផ្លាញគ្រឿងញៀន និងមន្ទីរពិសោធន៍នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានសម្រេចបំផ្លាញគ្រឿងញៀន ដោយវិធីសាស្ត្រដុតនូវសារធាតុញៀន និងសារធាតុគីមីទម្ងន់ ៦ តោន ២៥៩ គីឡូក្រាម និង ៥៣០,៣២ ក្រាមប៉ុណ្ណោះ។ រីឯសារធាតុញៀន សារធាតុគីមី និងសារធាតុគីមីផ្សំទម្ងន់ ៨៣ តោន ៨២១ គីឡូក្រាម និង ១៣៣,៩៨ ក្រាម ដែលជាសារធាតុរំលាយ ហើរ ជាអាស៊ីត និងគីមីពុលឆាបឆេះខ្លាំងមិនអាចបំផ្លាញតាមការដុតបាន គឺគណៈកម្មការសម្រេចប្រគល់ជូនអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីបន្សាប និងបំផ្លាញចោលតាមលក្ខណៈបច្ចេកទេសនាពេលក្រោយ។
លោកបានថ្លែងថា៖ «បរិមាណគ្រឿងញៀនដ៏ច្រើននេះ ប្រសិនបើសមត្ថកិច្ចយើងបង្ក្រាបមិនទាន់ពេលនោះទេវានឹងបង្កផលប៉ះពាល់យ៉ាងធ្ងន់ធ្ងរដល់សុខភាពប្រជាពលរដ្ឋ ជាពិសេសអនាគតយុវវ័យ ដែលជាទំពាំងស្នងឫស្សីរាប់ពាន់ម៉ឺននាក់ជាក់ជាមិនខាន។ នោះគឺជាមហាសោកនាដកម្មសម្រាប់មនុស្សជាតិគ្រប់រូប»។
ថ្លែងក្នុងពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀននាថ្ងៃទី ២៦ មិថុនានៅក្នុងមជ្ឈមណ្ឌលសន្និបាត និងពិព័រណ៍កោះពេជ្រនេះ លោក ឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានឱ្យដឹងថាពេលមានវិបត្តិជំងឺកូវីដ ១៩ ការដណ្តើមភូមិសាស្ត្រនយោបាយ សេដ្ឋកិច្ចរបស់មហាអំណាចធំៗ និងវិបត្តិនៃសង្គ្រាមនៅអ៊ុយក្រែនជាដើម គេតែងបំភ្លេច ឬចាត់ទុកការងារប្រយុទ្ធប្រឆាំងគ្រឿងញៀនឱ្យនៅដោយឡែក ប៉ុន្តែកម្ពុជាមិនត្រឹមតែមិនបំភ្លេចទេ តែថែមទាំងបង្កើនការយកចិត្តទុកដាក់ទៀតផង។
ជាក់ស្តែងក្នុងពេលមានឆ្លងរាលដាលជំងឺកូវីដ ១៩ ខ្លាំងគឺឆ្នាំ ២០២០ និងឆ្នាំ ២០២១ សមត្ថកិច្ចស្រាវជ្រាវរកឃើញ និងបង្ក្រាបបានគ្រឿងញៀន ១០ ៤៦១ ករណី ដោយរឹបអូសគ្រឿងញៀនគ្រប់ប្រភេទចំនួន ៣ តោន ៨៧៥ គីឡូក្រាម និង ៨៩៨ ក្រាមក្នុងឆ្នាំ ២០២០ និងឃាត់ខ្លួន ជនសង្ស័យបាន ២១ ៥៦៦ នាក់ និងក្នុងឆ្នាំ ២០២១ បង្ក្រាបបាន ៦ ៣០៨ ករណី រឹបអូសគ្រឿងញៀនបាន ៤ តោន ៦៨៩ គីឡូក្រាម ៦១១ ៤៧ ក្រាម និងបានឃាត់ខ្លួន មនុស្សចំនួន ១៣ ៩៧៩ នាក់។
លោក ស ខេង បន្តថា បរិមាណគ្រឿងញៀនដែលរឹបអូសបានក្នុងឆ្នាំ ២០២០ និង ២០២១ មានការកើនឡើងគួរឱ្យកត់សម្គាល់ បើប្រៀបធៀបនឹងមុនមានកូវីដក្នុងឆ្នាំ ២០១៨ និងឆ្នាំ ២០១៩។ ជាមួយគ្នានោះ ការងារអប់រំផ្សព្វផ្សាយ បើទោះបីជាជួបឧបសគ្គមួយចំនួន ដូចជាការមិនអនុញ្ញាតឱ្យមានការជួបជុំមិនឱ្យមានការរៀបចំពិធីប្រមូលផ្តុំជាដើម ក៏កម្ពុជានៅតែអាចផ្សព្វផ្សាយតាមវិទ្យុ ទូរទស្សន៍ ទូរស័ព្ទ និងតាមបណ្តាញទំនាក់ទំនងសង្គមផ្សេង ដើម្បីអប់រំពីផលប៉ះពាល់ និងគ្រោះថ្នាក់នៃគ្រឿងញៀនឱ្យបានដល់គោលដៅក្នុងសង្គម។
បន្ថែមលើនោះទៀត ក្រសួង ស្ថាប័ន អង្គភាពជាសមាជិកក៏ដូចជា ក្រសួង ស្ថាប័ន អង្គភាពពាក់ព័ន្ធ អង្គការ សមាគមជាតិអន្តរជាតិ វិស័យសាសនា វិស័យឯកជន ក៏បានខិតខំចូលរួមតាមគ្រប់លទ្ធភាព ដោយបានបញ្ជ្រាបការអប់រំផ្សព្វផ្សាយពីផលប៉ះពាល់ និងគ្រោះថ្នាក់នៃគ្រឿងញៀនទៅក្នុងសកម្មភាពស្នូលរបស់ខ្លួន។
ចំណែកការព្យាបាល និងស្តារនីតិសម្បទាអ្នកញៀនគ្រឿងញៀនក៏បានបង្កើនការយកចិត្តទុកដាក់ខ្លាំងផងដែរក្នុង នោះក្រៅពីការពង្រឹងសមត្ថភាព និងគុណភាពនៃការផ្តល់សេវាព្យាបាល និងស្តារនីតិសម្បទាក៏បានចាត់វិធានការ ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ ១៩ ក្នុងចំណោមអ្នកញៀនគ្រឿងញៀន ជាពិសេសអ្នកដែលទទួលការព្យាបាល និងស្តារនីតិសម្បទាទទួលបានជោគជ័យគួរឱ្យកត់សម្គាល់។
លោក ស ខេង បានបញ្ជាក់ថា បើទោះបីជាកម្ពុជាសម្រេចបានលទ្ធផលល្អក៏ដោយ ក៏ស្ថានភាព និងនិន្នាការនៃការផលិត ការចរាចរ និងការប្រើគ្រឿងញៀនក្នុងតំបន់ និងនៅលើសកលលោកនៅតែគ្មានការថយចុះ ហើយថែមទាំងមានការកើនឡើងគួរឱ្យព្រួយបារម្ភ ពិសេសពេលមានវិបត្តិជំងឺកូវីដ ១៩ និងវិបត្តិនៃសង្គ្រាមនៅអ៊ុយក្រែននាពេលបច្ចុប្បន្ននេះ។
លោកថ្លែងថា៖ «យើងនៅតែបន្តទទួលរងឥទ្ធិពល និងផលវិបាកនៃវិបត្តិទាំងនេះផងដែរ ដោយកន្លងមក ក៏ដូចជា ក្នុងពេលថ្មីៗនេះ ក្រុមឧក្រិដ្ឋគ្រឿងញៀនមិនត្រឹមតែព្យាយាមលួចលាក់ចរាចរណ៍គ្រឿងញៀនឆ្លងកាត់ និងចូលមកកម្ពុជាប៉ុណ្ណោះទេ ពួកនេះបានព្យាយាមម្តងហើយម្តងទៀតក្នុងការប្រើប្រាស់ទឹកដីកម្ពុជា ធ្វើជាទីតាំងផលិតគ្រឿងញៀន»។
ទាក់ទងនឹងបញ្ហាគ្រឿងញៀននេះដែរ តាមរយៈសារលិខិតក្នុងឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀននេះលោកនាយករដ្ឋមន្ត្រី ហ៊ុន សែន បានបន្តណែនាំក្រសួងស្ថាប័ន អង្គភាព និងគណៈកម្មាធិការត្រួតពិនិត្យគ្រឿងញៀនរាជធានី-ខេត្ត ដែលជាសមាជិក អាជ្ញាធរជាតិប្រយុទ្ធប្រឆាំងគ្រឿងញៀន ក៏ដូចជា ក្រសួង ស្ថាប័ន និងអង្គភាពពាក់ព័ន្ធព្រមទាំងអំពាវនាវឱ្យមានការចូលរួមពីវិស័យសាសនា វិស័យឯកជន សប្បុរសជន អង្គការសមាគមជាតិ-អន្តរជាតិជាដៃគូពាក់ព័ន្ធផ្សេងទៀត បន្តយកចិត្តទុកដាក់ចូលរួមឱ្យកាន់តែសកម្មថែមទៀត លើការប្រយុទ្ធប្រឆាំងគ្រឿងញៀន។
លោក ហ៊ុន សែន បញ្ជាក់ថា៖ «សូមអំពាវនាវដល់បងប្អូនកូន-ក្មួយ ព្រមទាំងចៅៗជាជនរួមជាតិទាំងអស់ ពិសេសមាតាបិតា និងអាណាព្យាបាលសូមបន្តចូលរួម និងគាំទ្រឱ្យបានកាន់តែសកម្មថែមទៀត ដើម្បីរួមគ្នាបង្ការ ទប់ស្កាត់ និងដោះស្រាយនូវរាល់បញ្ហាដែលអាចកើតមាននៅក្នុងសហគមន៍»។
លោក ឃួង ស្រេង អភិបាលរាជធានីភ្នំពេញបានឱ្យដឹងថា ៣ ខែ ដើមឆ្នាំនេះ គណៈកម្មាធិការត្រួតពិនិត្យគ្រឿងញៀនរាជធានី-ភ្នំពេញបានចុះអប់រំផ្សាយតាមមូលដ្ឋានបាន ១២៩ លើក ដោយមានអ្នកចូលរួមសរុប ៣ ៧៤៦ នាក់។ ជាមួយគ្នានោះបានចុះអនុវត្តវិធានការរដ្ឋបាល និងទប់ល្មើសគ្រឿងញៀនតាមគោលដៅងាយរងគ្រោះ ដោយបានអប់រំណែនាំ និងធ្វើកិច្ចសន្យាជាមួយម្ចាស់ទីតាំងក្នុងមូលដ្ឋាន ៦០ លើកស្មើនឹង ៦៦ គោលដៅដែលភាគច្រើននៅតំបន់ស្មុគស្មាញ៕