ភ្នំពេញៈ ក្រសួងសង្គមកិច្ច អតីតយុទ្ធជន និងយុវនីតិសម្បទា បានដាក់ចេញនូវផែនការ ៣ ចំណុចសំខាន់ៗ ដើម្បីជួយដល់ប្រជាពលរដ្ឋដែលរងគ្រោះ ដោយសារទឹកជំនន់ឆ្នាំ ២០២២ ដោយក្នុងវិធានការនោះផ្តល់ជាជំនួយសង្គមទាំង មុនពេលទឹកជំនន់ អំឡុងពេល និងក្រោយទឹកជំនន់ជាដើម។
វិធានការទាំងនោះត្រូវបានលើកឡើង អំឡុងពេលដែលក្រសួងសង្គមកិច្ច អតីតយុទ្ធជន និងយុវនីតិសម្បទា បានរៀនចំសិក្ខាសាលាពិគ្រោះយោបល់ស្តីពី “ផែនការត្រៀមបម្រុងឆ្លើយតបទៅនឹង គ្រោះមហន្តរាយទឹកជំនន់ឆ្នាំ ២០២២” ក្នុងគោលបំណងប្រមូលធាតុចូលបន្ថែម ដើម្បីបំពេញក្នុងផែនការ និងដើម្បីជួយដល់ប្រជាពលរដ្ឋជាអ្នកងាយរងគ្រោះដោយសារគ្រោះទឹកជំនន់ កាលពីថ្ងៃទី ២៧ ខែមិថុនា។
រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាលោក វង សូត បានថ្លែងថា សិក្ខាសាលានេះ រៀបចំឡើងក្នុងគោលបំណង ដើម្បីផ្សព្វផ្សាយផែនការគ្រប់គ្រងគ្រោះទឹកជំនន់ដល់រាជធានី ខេត្តគោលដៅ និងការស្វែងរកធាតុចូលបន្ថែមក្នុងការកសាងនូវផែនការយុទ្ធសាស្ត្រឆ្លើយតប និងត្រៀមបម្រុងក្នុងក្របខណ្ឌជំនួយសង្គម ក្នុងវិស័យសង្គមកិច្ច ស្របតាមច្បាប់ស្តីពីការគ្រប់គ្រងគ្រោះមហន្តរាយ និងក្របខណ្ឌការងារ ស្តីពីការកាត់បន្ថយហានិភ័យនៃគ្រោះមហន្តរាយជាសកល ២០១៥-២០៣០។
លោកថា៖ «លើសពីនេះទៀត ការរៀបចំនូវឯកសារផែនការយុទ្ធសាស្ត្រឆ្លើយតប និងត្រៀមបម្រុងក្នុងក្របខណ្ឌជំនួយសង្គមក្នុងវិស័យសង្គមកិច្ចនេះ ក៏អនុលោមទៅតាមច្បាប់ស្តីពី ការគ្រប់គ្រងគ្រោះមហន្តរាយ ដែលបានតម្រូវឱ្យក្រសួង ស្ថាប័ន បង្កើតយន្តការគ្រប់គ្រងគ្រោះមហន្តរាយតាមវិស័យរបស់ខ្លួន ដើម្បីត្រៀមបង្ការ កាត់បន្ថយហានិភ័យគ្រោះមហន្តរាយ និងឆ្លើយតបទាន់ពេលវេលាប្រកបដោយប្រសិទ្ធភាពខ្ពស់ និងបំពេញបាននូវតម្រូវការជាមូលដ្ឋានរបស់ជនរងគ្រោះ និងងាយរងគ្រោះ»។
លោកគូសបញ្ជាក់ថា ជាទិដ្ឋភាពរួមគោលនយោបាយចម្បងរបស់រាជរដ្ឋាភិបាលគឺរក្សាសុខសន្តិភាព ស្ថិរភាពនយោបាយ និងសន្តិសុខជាតិ ដែលជាបុរេលក្ខខណ្ឌដ៏ចាំបាច់ដើម្បីសម្រេចបាននូវកំណើនសេដ្ឋកិច្ច កាត់បន្ថយភាពក្រីក្រ ការលើកកម្ពស់ជីវភាពរស់នៅ និងសេចក្តីថ្លៃថ្នូររបស់ប្រជាជន ដោយផ្តោតការយកចិត្តទុកដាក់យ៉ាងខ្លាំងទៅលើសកម្មភាពគាំពារសង្គមនានា។
លោក ឈួរ សុបញ្ញា ប្រធាននាយកដ្ឋានសុខុមាលភាពសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា ថ្លែងថា ផែនការត្រៀមបម្រុងឆ្លើយតបទៅនឹង គ្រោះមហន្តរាយទឹកជំនន់ឆ្នាំ ២០២២ ជាពិសេសគ្រោះទឹកជំនន់នេះ គឺជាផែនការដំបូងដែលក្រសួងសង្គមកិច្ចរៀបចំឡើងក្នងក្របខណ្ឌជំនួយសង្គម។
លោកបន្តថា ក្នុងផែនការនេះ ក្រុមការងារបានធ្វើការដកស្រង់ពិសោធន៍កាលពីឆ្នាំកន្លងមកពាក់ព័ន្ធ បញ្ហាប្រឈម និងដំណោះស្រាយ ថាតើភាគីពាក់ព័ន្ធណាខ្លះបានចូលរួម នៅពេលដែលមានគ្រោះមហន្តរាយកើតឡើងដោយទឹកជំនន់។ លោកបានគូសបញ្ជាក់ថា ជាក់ស្តែងគ្រប់ភាគីបានចូលរួមជួយសង្គ្រោះប្រជាពលរដ្ឋយ៉ាងសកម្ម ប៉ុន្តែគ្រាន់តែមិនស៊ីចង្វាក់គ្នា ខណៈដែលការបែងចែកភារកិច្ចនៅមិនទាន់ច្បាស់លាស់នៅឡើយ។
លោកថា៖ «ទោះបីមានការអន្តរាគមន៍ពីគ្រប់ភាគី ប៉ុន្តែនៅមានភារកិច្ចខ្លះមានការជាន់គ្នាអ៊ី ចឹងបានជាយើងរៀបចំសិក្ខាសាលា ដើម្បីប្រមូលធាតុចូលបន្ថែម ថាតើនៅពេលមានទឹកជំនន់ឆ្នាំ ២០២២ ខាងមុខ តើភាគីនិមួយៗត្រូវធ្វើអ្វីខ្លះ។ អ៊ីចឹងការគ្រោងថវិកាកម្រិតណានោះ គឺយើងមិនទាន់ប្រាប់បានទេ ហើយកន្លងយើងអត់ទាន់មានផែនការត្រៀមបម្រុងឆ្លើយតបចឹងដែរ ចឹងបានជាឆ្នាំនេះ ពេលរៀបចំផែនការនេះ យើងចាប់ផ្តើមផ្គូផ្គងពីតួនាទី និងភារកិច្ច ហើយអាចដឹងអំពីខ្ទង់ចំណាយថវិកាបាន»។
យ៉ាងណាមិញលោក សុបញ្ញា បានថ្លែងថា ក្នុងការផែនការលើកដំបូងនេះ ក្រសួងបាន រៀបចំនូវផែនការ ៣ ចំណុច ទី ១ គឺផែនការត្រៀមបម្រុងមុនពេលទឹកជំនន់កើតឡើង ដែលជាការរៀបចំអំពីការបំប៉នសមត្ថភាព ក្នុងការឆ្លើយតបទៅតាមរាជធានី ខេត្ត និងឃុំសង្កាត់នីមួយៗ ជាមួយនឹងការពិនិត្យមើលលើបទពិសោធដែលបានកើតឡើងក្នុងឆ្នាំកន្លងមកថាអ្វីជាបញ្ហា ហើយយកយន្តការទាំងនោះទៅធ្វើជាកម្មវត្ថុដើម្បីធ្វើការពិភាក្សា ស្វែងរកដំណោះស្រាយ ដើម្បីត្រៀមឆ្លើយតបឆ្នាំ ២០២២។
ទី ២ ឆ្លើយតបនៅពេលដែលមានទឹកជំនន់តែម្តង គឺអំឡុងពេលទឹកជំនន់ក្រសួងបានត្រៀមនូវស្ថានភាពមួយចំនួនដូចជា អំពីតួនាទីភារកិច្ចរបស់ក្រសួងស្ថាប័ន ជាមួយនឹងភាគីពាក់ព័ន្ធ ពិសេសមូលនិធិសង្គ្រោះ។ « ថាតើតួនាទីយើងនៅកន្លែងណា? ហើយយើងធ្វើអ្វី យើងរៀបចំក្នុងការឆ្លើយតបឱ្យទាន់ពេលវេលារបៀបម៉េច អ្វីដែលជាកត្តាចម្បងសំខាន់មុនគេនោះគឺការផ្តល់នូវជំនួយសង្គ្រោះបន្ទាន់ជាមុនសិន ក្រោយពីផ្តល់ជំនួយបន្ទាន់ យើងចាប់ផ្តើមរៀបចំបន្តទៀតនូវការផ្តល់យន្តការសម្រាប់ ការផ្តល់នូវកម្មវិធីជំនួយសង្គម ដូចជាការផ្ទេរសាច់ប្រាក់ជាដើម»។
លោកបន្តទៀត ចំណុច ទី ៣ ក្រោយពេលគ្រោះមហន្តរាយ ក្រសួងរៀបចំជាផែនការក្នុងការឆ្លើយតប ក្នុងក្របខណ្ឌជំនួយសង្គម ដោយធ្វើយ៉ាងណាឱ្យពួកគាត់រក្សាបាននូវតុល្យភាពនៃជីវិតរបស់គាត់ដូចមុនពេលទឹកជំនន់មិនទាន់កើតឡើង។
លោកថា៖ «ដូច្នេះដើម្បីបញ្ចៀសបញ្ហាទាំងអស់នេះ ក្នុងនាមក្របខណ្ឌរដ្ឋាភិបាលជាក្របខណ្ឌគាំពារសង្គមគឺយើងមើលទៅលើផ្នែកទាំងអស់នេះ ដើម្បីផ្តល់ជំនួយដល់ពលរដ្ឋរងគ្រោះជាចាំបាច់»៕