.jpg)
លោក ប្រាក់ សុខុន (ស្ដាំ) ពេលជួបជាមួយលោក Christian Berger ឯកអគ្គរដ្ឋទូតអាល្លឺម៉ង់ទើបចប់អាណត្តិកាលពីថ្ងៃទី ២៧ មិថុនា ។ រូបថត ក្រសួងការបរេស
លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្ដរជាតិបានឱ្យដឹងថា លោក ប្រាក់ សុខុន រដ្ឋមន្ត្រីការបរទេសនិងលោក Christian Berger ឯកអគ្គរដ្ឋទូតអាល្លឺម៉ង់ប្រចាំកម្ពុជា ដែលចប់អាណត្តិ បានសម្តែងការពេញចិត្តចំពោះទំនាក់ទំនងនិងកិច្ចសហប្រតិបត្តិការ «ប្រកបដោយផ្លែផ្កា» រវាងប្រទេសទាំង២។
ក្នុងជំនួបកាលពីថ្ងៃទី ២៧ ខែមិថុនា ភាគីទាំង ២ បានចាត់ទុកការចុះហត្ថលេខាលើសេចក្តីថ្លែងការណ៍រួមស្តីពីការបង្កើតកិច្ចពិគ្រោះយោបល់ទ្វេភាគីរវាងក្រសួងការបរទេសទាំង ២ និងការរៀបចំកិច្ចពិភាក្សាពិគ្រោះយោបល់
ទ្វេភាគីលើកទី ១ នៅរាជធានីភ្នំពេញកាលពីដើមឆ្នាំនេះ គឺជាសញ្ញាជំរុញទឹកចិត្តក្នុងទិសដៅនេះ។
លោក ជុំ សុន្ទរី បានបញ្ជាក់ក្នុងសេចក្តីប្រកាសព័ត៌មានកាលពីថ្ងៃទី ២៧ ខែមិថុនា ថា៖ «ឯកឧត្តមឧបនាយករដ្ឋមន្ត្រី និងឯកឧត្តមឯកអគ្គរដ្ឋទូត បានបង្ហាញក្តីសង្ឃឹមថា ទំនាក់ទំនងដ៏ល្អនេះនឹងត្រូវបានរក្សានិងពង្រឹងបន្ថែមទៀត»។
ដោយទទួលស្គាល់នូវបេសកកម្មដ៏ចំណាន និងប្រកបដោយកិត្តិយសរបស់លោក Christian Berger ជាឯកអគ្គរដ្ឋទូតវិសាមញ្ញ និងពេញសមត្ថភាពរបស់អាល្លឺម៉ង់ប្រចាំកម្ពុជា និងក្នុងនាមរាជរដ្ឋាភិបាលកម្ពុជា លោក ប្រាក់ សុខុន បានបំពាក់មេដាយសហមេត្រី ថ្នាក់មហាសេរីវឌ្ឍន៍ ដល់លោក Christian Berger ដែលជាគ្រឿងឥស្សរិយយសខ្ពស់បំផុតសម្រាប់ឥស្សរជនបរទេសនៅក្នុងជំនួបនេះ។
លោក ជុំ សុន្ទរី បានថ្លែងថា លោក Christian Berger បានសម្តែងនូវមោទនភាព និងសេចក្តីសោមនស្សរីករាយជាខ្លាំងចំពោះការទទួលបានមេដាយសហមេត្រី និងបានកោតសរសើរចំពោះទំនាក់ទំនងដ៏ល្អដែលមានស្រាប់រវាងប្រទេសទាំង ២។
លោក ប្រាក់ សុខុន បានថ្លែងអំណរគុណចំពោះរដ្ឋាភិបាលអាល្លឺម៉ង់ ដែលបានបន្តផ្តល់ជំនួយមកកាន់កម្ពុជា និងបានកោតសរសើរចំពោះសមិទ្ធផលនានា សម្រាប់ប្រយោជន៍នៃទំនាក់ទំនងទ្វេភាគី ដែលសម្រេចបានក្នុងអាណត្តិរបស់លោក Christian Berger នៅកម្ពុជា។
កាលពីខែកុម្ភៈ ឆ្នាំនេះ លោកបានបំពេញទស្សនកិច្ចទៅកាន់ប្រទេសអាល្លឺម៉ង់រយៈពេល ២ ថ្ងៃ ដោយមានជំនួបជាមួយលោកស្រី Annalena Baerbock រដ្ឋមន្ត្រីការបរទេសអាល្លឺម៉ង់។ ភាគីទាំង ២ បានពិភាក្សាអំពីទំនាក់ទំនងទ្វេភាគី បញ្ហាតំបន់ និងបញ្ហាអន្តរជាតិមួយចំនួន ដែលមានផលប្រយោជន៍រួមគ្នា។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព ថ្លែងថាកន្លងមកអាល្លឺម៉ង់ក៏ធ្លាប់បានជួយកម្ពុជាលើផ្នែកអភិបាលកិច្ចល្អ ការជួយបណ្តុះបណ្តាលផ្នែកទំនាក់ទំនងសាធារណៈដល់មន្ត្រីកម្ពុជា ការកសាងហេរចនាសម្ព័ន្ធ ដំណើរការគាំទ្រដល់មជ្ឈមណ្ឌលស្រាវជ្រាវ និងបណ្តុះបណ្តាលផ្នែកកម្មន្តសាល ជាដើម។
លោកថ្លែងថា៖ «អ៊ីចឹងយើងឃើញថាមានរឿងជាច្រើនទៀតដែលអាល្លឺម៉ង់បានជួយដល់កម្ពុជានៅក្នុងការអភិវឌ្ឍប្រទេស។ ជាមួយគ្នានេះ ទំនាក់ទំនងរវាងកម្ពុជា និងអាល្លឺម៉ង់នេះយើងឃើញមិនទាន់មានរឿងអីដែលមានការល្អក់កករជាមួយគ្នាទេ ហើយឃើញមានដំណើរការនៃការសហការហ្នឹងបានល្អជាមួយគ្នា»។
លោក យង់ គិមអេង បន្តថា ទោះជាយ៉ាងណា អាល្លឺម៉ង់ក៏ជាផ្នែកមួយនៃសហភាពអឺរ៉ុប ហើយអឺរ៉ុបក៏មានជំហរ និងលក្ខខណ្ឌមួយចំនួននៅក្នុងការស្ដារប្រជាធិបតេយ្យនៅកម្ពុជា។ បើទោះជាអាល្លឺម៉ង់បានរក្សាទំនាក់ទំនងល្អជាមួយកម្ពុជាក៏ដោយ ក៏អាល្លឺម៉ង់នៅតែមិនអាចងាកចេញពីជំហររួមរបស់សហភាពអឺរ៉ុប ក្នុងការធ្វើយ៉ាងណាឲ្យកម្ពុជាដើរទៅរកគន្លងប្រជាធិបតេយ្យក៏ដូចជាការធ្វើឱ្យមានប្រក្រតីភាពនៃប្រជាធិបតេយ្យ និងអភិបាលកិច្ចល្អ។
លោកថ្លែងថា៖ «ជុំវិញបញ្ហានៃទំនាក់ទំនងនេះ ប្រសិនបើយើងអាចនឹងធ្វើឱ្យមានភាពល្អប្រសើរនូវប្រជាធិបតេយ្យសិទ្ធិមនុស្សជាហូរហែ គឺវាជាកត្តាជំរុញនៃទំនាក់ទំនងជាមួយនឹងបណ្តាប្រទេសអឺរ៉ុបមួយនេះកាន់តែល្អប្រសើរថែមទៀត ព្រោះចង់មិនចង់ ក៏អឺរ៉ុបគេឈរនៅលើជំហររួមរបស់គេដែរ»។
ជាមួយគ្នានេះផងដែរ ក្នុងជំនួបជាមួយលោកស្រី Ayda Ünlü ឯកអគ្គរដ្ឋទូតតួកគីប្រចាំកម្ពុជា ដែលចប់អាណត្តិនៅថ្ងៃទី ២៧ ខែមិថុនា នេះផងដែរ លោក ប្រាក់ សុខុន បានកោតសរសើរលោកស្រីដែលបានរួមចំណែកធ្វើឱ្យរីកចម្រើននូវទំនាក់ទំនងកម្ពុជានិងតួកគី។ លោកស្រីបានទទួលមេដាយសហមេត្រី ថ្នាក់មហាសេរីវឌ្ឍន៍ ដែលជាគ្រឿងឥស្សរិយយសខ្ពស់បំផុត សម្រាប់ឥស្សរជនបរទេសពីលោកនាយករដ្ឋមន្ត្រី ហ៊ុន សែន។
រដ្ឋាភិបាលតួគីកន្លងមក បានផ្តល់ជំនួយអភិវឌ្ឍន៍ដល់កម្ពុជា រួមទាំងគម្រោងសាងសង់លំនៅឋាននៅស្រុកស្អាង ខេត្តកណ្តាល។ បើតាមលោក ជុំ សុន្ទរី លោកស្រី Ayda Ünlü បញ្ជាក់ថា ឯកអគ្គរដ្ឋទូតតួកគីប្រចាំកម្ពុជាថ្មីនឹងបន្តជំនួយ សម្រាប់គម្រោងនានាដែលទាក់ទងនឹងហេដ្ឋារចនាសម្ព័ន្ធផ្លូវថ្នល់ លំនៅឋាន និងសាលារៀនជាដើម៕
