ភ្នំពេញៈ រដ្ឋបាលរាជធានីភ្នំពេញ ណែនាំជាថ្មីដល់អតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ បញ្ឈប់ការប្រើប្រាស់ដងផ្លូវសាធារណៈសម្រាប់ការប្រមូលផ្តុំនិងដង្ហែក្បួន ដោយចាត់ទុកជាសកម្មភាពខុសច្បាប់ ដែលប៉ះពាល់ដល់សណ្តាប់ធ្នាប់សាធារណៈ ខណៈក្រុមកូដករថា ពួកគេកំពុងប្រើសិទ្ធិដើម្បីជំរុញទៅក្រុមហ៊ុនចេញមុខដោះស្រាយប៉ុណ្ណោះ។
ក្នុងសេចក្តីប្រកាសព័ត៌មានរបស់រដ្ឋបាលរាជធានីភ្នំពេញ ចុះថ្ងៃទី ២៧ មិថុនា លើកឡើងថា នៅថ្ងៃដដែលនេះ មានក្រុមបាតុករជាអតីតបុគ្គលិក និងបុគ្គលិកក្រុមហ៊ុនណាហ្គាវើលដ៏ ប្រមាណជាង ៧០ នាក់ បានបន្តមកប្រមូលផ្តុំគ្នាធ្វើបាតុកម្មខុសច្បាប់នៅកណ្តាលមហាវិថីសម្តេចសុធារស ដោយដើរលើទ្រូងផ្លូវ ចាប់ពីមុខចំណុចផ្សារទំនើបអ៊ីអន ១ មកដល់ស្តុបនាគបាញ់ទឹក។
សេចក្តីប្រកាសបញ្ជាក់ថា៖ «អ្វីដែលគួរឱ្យកត់សម្គាល់នោះ គឺលើកនេះក្រុមបាតុករបាននាំគ្នាចងក្រណាត់ពណ៌ខៀវរុំក្បាលភ្ជាប់នូវពាក្យស្លោកដូចៗគ្នាថា«កុំយកលុយទិញសិទ្ធិ» ដែលនេះបង្ហាញថា ក្រុមនេះបានត្រៀមលក្ខណៈរួចជាស្រេច ក្រោមការរៀបចំផែនការទុកជាមុន របស់មនុស្សមួយក្តាប់តូច ដើម្បីបង្កើតព្រឹត្តិការណ៍មិនល្អមកលើអាជ្ញាធរមានសមត្ថកិច្ច»។
សេចក្តីប្រកាសបន្តថា៖ «និងបង្កការប៉ះពាល់ដល់សណ្តាប់ធ្នាប់ និងរបៀបរៀបរយសាធារណៈ រហូតឈានដល់ការប្រើអំពើហិង្សាមកលើសមត្ថកិច្ច បណ្តាលឱ្យសមត្ថកិច្ចមួយចំនួនរងរបួសស្រាលព្រមទាំងបាត់បង់វិទ្យុទាក់ទងចំនួន៥គ្រឿង និងនាឡិកាដៃចំនួន១គ្រឿងផងដែរ»។
បើតាមសេចក្តីប្រកាស កន្លងមក រដ្ឋបាលរាជធានីភ្នំពេញធ្លាប់បានចេញសេចក្តីជូនដំណឹងជាច្រើនលើកច្រើនសាមិនអនុញ្ញាតឱ្យក្រុមបាតុករដែលជាអតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ ប្រមូលផ្តុំគ្នាធ្វើបាតុកម្មខុសច្បាប់នៅតាមដងផ្លូវសាធារណៈ ចិញ្ចើមផ្លូវ សួនច្បារសាធារណៈ និងទីសាធារណៈផ្សេងទៀត ហើយក៏បានប្រើប្រាស់វិធានការអប់រំជាបន្តបន្ទាប់ទៅលើក្រុមបាតុករដើម្បីបញ្ឈប់នូវសកម្មភាពខុសច្បាប់បន្តទៀត។
តាមរយៈសេចក្តីប្រកាសនេះ រដ្ឋបាលរាជធានីភ្នំពេញ បានណែនាំសាជាថ្មីដល់ក្រុមបាតុករ ក្នុងករណីមានបំណងធ្វើការសម្តែងមតិជាសាធារណៈ ត្រូវអនុវត្តតាមនីតិវិធីដែលមានចែងក្នុងច្បាប់ស្តីពីការធ្វើបាតុកម្ម ដោយសន្តិវិធី ដោយត្រូវជូនដំណឹងជាលាយលក្ខណ៍អក្សរមកអាជ្ញាធររាជធានីភ្នំពេញ និងគោរពតាមការណែនាំផ្សេងៗ ព្រមទាំងធ្វើសកម្មភាពសម្ដែងមតិនៅទីលានប្រជាធិបតេយ្យ។
កូដករណាហ្គាវើលដ៍ដែលបានចូលរួមនោះ ថ្លែងសុំមិនបញ្ចេញឈ្មោះថា ការលើកបដា និងធ្វើកូដកម្មនេះ គឺជាការទាមទារសិទ្ធិរបស់សហជីពនៅកន្លែងធ្វើការ ហើយថាក្រុមហ៊ុនបានបញ្ឈប់ពួកគាត់ដោយអយុត្តិធម៌។
អ្នកស្រីបញ្ជាក់ថា៖ «ខ្ញុំនៅរក្សាជំហរធ្វើកូដកម្មរហូតមានដំណោះស្រាយ ព្រោះប្រជាពលរដ្ឋខ្មែរមានសិទ្ធិក្នុងការបញ្ចេញមតិ។ តែហេតុអីពួកខ្ញុំជាបុគ្គលិកនៅក្រុមហ៊ុនណាហ្គាវើលដ៍អត់មានសិទ្ធិបញ្ចេញមតិ សូម្បីតែពួកខ្ញុំធ្វើកូដកម្មនៅណាហ្គា ហេតុអ្វីបានជាអាជ្ញាធរបំបិទសិទ្ធិពួកខ្ញុំ ហើយមកចោទខ្ញុំជាអ្នកបិទផ្លូវសាធារណៈ»។
ភ្នំពេញ ប៉ុស្តិ៍ មិនទាន់អាចសុំអត្ថាធិប្បាយបន្ថែមពីប្រធានសហជីពណាហ្គាវើលដ៍ កញ្ញា ឈឹម ស៊ីថរ បាននៅឡើយទេ នាថ្ងៃទី ២៨ មិថុនា។
ប៉ុន្តែក្នុងសេចក្តីថ្លែងការណ៍របស់សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ចេញផ្សាយកាលពីថ្ងៃទី ២៤ មិថុនា លើកឡើងថា ការធ្វើកូដកម្មនេះជាវិវាទការងារ រវាងកម្មករនិយោជិតនៃក្រុមហ៊ុនណាហ្គាវើលដ៍ជាមួយថៅកែក្រុមហ៊ុនតែប៉ុណ្ណោះ ប៉ុន្តែហេតុអ្វីបានជាសាលាក្រុងចេញមុខរារាំងគំរាមកំហែង។
ប៉ុន្តែសេចក្តីប្រកាសរបស់សាលារាជធានីភ្នំពេញដដែលបញ្ជាក់ថា៖ «ក្រុមបាតុករ មិនត្រូវប្រើប្រាស់ដងផ្លូវសាធារណៈសម្រាប់ធ្វើការជួបជុំគ្នា ប្រមូលផ្តុំ ឬដង្ហែក្បួនដោយខុសច្បាប់ ហើយមិនត្រូវធ្វើការបិទផ្លូវសាធារណៈ ដែលនាំឱ្យប៉ះពាល់ដល់សិទ្ធិអ្នកដទៃ ពិសេសប៉ះពាល់ដល់សន្តិសុខ សណ្តាប់ធ្នាប់ របៀបរៀបរយ និងបង្កការកកស្ទះចរាចរណ៍ ព្រមទាំងបង្កការរំខានដល់ការប្រកបរបរអាជីវកម្ម កិច្ចការប្រចាំថ្ងៃ និងការធ្វើដំណើររបស់ប្រជាពលរដ្ឋដទៃទៀត»។
ពាក់ព័ន្ធកិច្ចចរចា រកដំណោះស្រាយក្នុងវិវាទនេះដែរ ក្រសួងការងារ និងបណ្តុះបណ្តាលវិជ្ជាជីវៈ បានធ្វើការកោះអញ្ជើញភាគីទាំង២ចូលរួមរកដំណោះស្រាយចំនួន ១៤ លើករួចមកហើយ ប៉ុន្តែភាគីទាំង២មិនទាន់រកចំណុចរួមនោះទេ។ ក្រុមកូដករស្នើថៅកែទទួលយកអតីតបុគ្គលិកជិត ២០០ នាក់ចូលធ្វើការវិញ រីឯតំណាងក្រុមហ៊ុនអះអាងថា មិនអាចទទួលយកបានទេ ដោយសារលើសតម្រូវការជាក់ស្តែង៕