បាត់ដំបងៈ សិស្សសាលាប្រុស-ស្រី ៦ នាក់បានដួលសន្លប់ បង្កការភ្ញាក់ផ្អើលពេញក្នុងសាលា បន្ទាប់ពីមានករណីរន្ទះបាញ់ ៣ គ្រាប់ផ្ទួនៗគ្នាទៅលើដើមឈើមួយដើម ដែលដុះនៅមុខបន្ទប់រៀនរបស់ពួកគេចម្ងាយប្រមាណ ២០ ម៉ែត្រ នៅអនុវិទ្យាល័យរតនមណ្ឌលនៃខេត្តបាត់ដំបង កាលពីថ្ងៃទី ២៧ ខែ មិថុនា ឆ្នាំ ២០២២។ នេះបើតាមការប្រាប់ឱ្យដឹងពីលោកគ្រូ អ្នកគ្រូ និងអាជ្ញាធរមូលដ្ឋាន។
លោក សន និល អធិការស្រុករតនមណ្ឌល បានប្រាប់ ភ្នំពេញ ប៉ុស្តិ៍ថា សិស្សដែលរងគ្រោះក្នុងឧបទ្ទវហេតុរន្ទះបាញ់ខាងលើនេះ មានអាយុចន្លោះពី ១២ ដល់ ១៥ ឆ្នាំ ក្នុងនោះមានសិស្សប្រុសម្នាក់ឈ្មោះ ឈុន រស្មី អាយុ ១៤ រងរបួសស្រាល ខណៈសិស្សស្រីម្នាក់ក្នុងចំណោម ៥ នាក់ ដែលរៀនថ្នាក់ជាមួយគ្នាឈ្មោះឡូត មិនា អាយុ ១៥ រងរបួសធ្ងន់ និងកំពុងសម្រាកព្យាបាលក្នុងមន្ទីរពេទ្យខេត្តបាត់ដំបង។
លោកថ្លែងថា៖ «ក្រោយពីមានករណីរន្ទះបាញ់កើតឡើងនៅក្នុងសាលារៀននោះ សមត្ថកិច្ចនគរបាលយើង និងលោកគ្រូ-អ្នកគ្រូ នាយកសាលា បានជួយអន្តរាគមន៍ដឹកនាំកុមាររងគ្រោះទាំងនោះទៅកាន់មន្ទីរពេទ្យបង្អែកស្រុករតនមណ្ឌលភ្លាមៗ ដើម្បីពិនិត្យព្យាបាល។ ប៉ុន្តែសិស្សស្រីម្នាក់ក្នុងចំណោមពួកគេ ត្រូវក្រុមគ្រូពេទ្យជំនាញបញ្ជូនបន្តទៅកាន់មន្ទីរពេទ្យខេត្តបាត់ដំបងដោយសារតែមានស្ថានភាពធ្ងន់ធ្ងរជាងគេ »។
ចំណែកអ្នកស្រី ឈួន សោភា គ្រូបង្រៀនមុខវិជ្ជាភាសាអង់គ្លេសនៃអនុវិទ្យាល័យរតនមណ្ឌល ដែលស្ថិតនៅក្នុងហេតុការណ៍នោះផ្ទាល់បានប្រាប់ ភ្នំពេញ ប៉ុស្តិ៍ថា ដោយសារដំបូលអគារសាលារៀនប្រក់សង្ក័សី ដូច្នេះនៅពេលមានភ្លៀងខ្លាំង ការបង្រៀនត្រូវអាក់ខានដោយសារខ្ទរសំឡេងទឹកភ្លៀងធ្លាក់លើដំបូល។
ប៉ុន្តែសិស្សទាំងអស់មិនអនុញ្ញាតឱ្យចេញទៅផ្ទះទេ ព្រោះមិនទាន់ដល់ម៉ោងចេញ និងមេឃកំពុងធ្លាក់ភ្លៀងខ្លាំង។
អ្នកគ្រូ សោភា បានបន្តថា ក្មេងមួយចំនួនបាននាំគ្នាអង្គុយលេងហ្គេមបំពេញពាក្យចន្លោះដែលបាត់ ហើយខ្លះទៀតបានទៅឈរលេងនៅមាត់ទ្វារបន្ទប់រៀន និងលេងត្រងទឹកភ្លៀងដែលស្រក់ពីដំបូលសាលា បញ្ចូលក្នុងដប។
មួយរំពេចនោះ ក៏ស្រាប់តែមានផ្កាភ្លើងព្រាកៗ ហើយក៏មានរន្ទះបាញ់ដើមឈើមួយដើម នៅមុខបន្ទប់រៀនចំនួន៣ដងដែលមានសំឡេងដូចជាគ្រាប់ផ្លោង ហើយសិស្សដែលឈរលេងនៅខាងមុខទ្វារបន្ទប់សាលាទាំងនោះ បានដួលសន្លប់លើគ្នាតែម្ដង។
អ្នកគ្រូ សោភា បានបញ្ជាក់ថា៖ «មុនដំបូងខ្ញុំឃើញផ្កាភ្លើងបែកព្រាកៗចេញពីគល់ដើមឈើ ដែលមានចម្ងាយប្រមាណ ២០ ម៉ែត្រពីមុខបន្ទប់រៀនរបស់ខ្ញុំ បន្ទាប់មកក៏ឮសំឡេងផ្ទុះផាំង ផាំង ផាំង! ចំនួន ៣ ដង ដូចជាគ្រាប់ផ្លោងហើយ សិស្សរបស់ខ្ញុំដែលឈរលេងនៅមុខទ្វារបន្ទប់រៀនក៏ទន់ដៃទន់ជើងដួលសន្លប់គរលើគ្នាតែម្ដង។ ចំណែកសិស្សផ្សេងទៀតបានភ័យខ្លាច ស្រែកយំពេញបន្ទប់ ឃើញដូច្នោះខ្ញុំក៏ប្រញាប់ទូរស័ព្ទប្រាប់លោកនាយកសាលាមកជួយអន្តរាគមន៍ ដើម្បីនាំពួកគេទៅកាន់មន្ទីរពេទ្យ»។
យ៉ាងណាក៏ដោយ នៅវេលាម៉ោង ១០:៣០ នាទីព្រឹក ថ្ងៃទី ២៨ ខែ មិថុនា ឆ្នាំ ២០២២ សិស្សរងគ្រោះក្នុងករណីរន្ទះបាញ់ទាំងនោះបានធូរស្រាល និងបានចេញពីមន្ទីរពេទ្យបង្អែកស្រុករតនមណ្ឌលអស់ហើយ លើកលែងតែសិស្សស្រីម្នាក់ឈ្មោះ ឡូត មិនា ដែលធ្ងន់ធ្ងរជាងគេកំពុងបន្តសម្រាកព្យាបាលនៅមន្ទីរពេទ្យខេត្តបាត់ដំបង។ នេះបើតាម លោក ភឹង វុទ្ធី នាយកអនុវិទ្យាល័យរតនមណ្ឌលដែលបានចុះទៅសួរសុខទុកកុមារីរងគ្រោះដល់មន្ទីរពេទ្យ។
លោក វុទ្ធី បានបញ្ជាក់ថា៖«ពិនិត្យទៅលើអាការរបស់នាង [កុមារី ឡូត មិនា] នៅពេលនេះ គឺនៅមានសភាពធ្ងន់ធ្ងរនៅឡើយ គឺនាងបានបាត់ការចងចាំអ្វីទាំងអស់ សូម្បីតែបងស្រីនាងក៏នាងមិនចាំដែរ។ យើងពិតជាអាសូរដល់នាងខ្លាំងណាស់»។
ជុំវិញករណីនេះ បងស្រីរបស់កុមារីរងគ្រោះ គឺកញ្ញា ឡូត សុខណា បានប្រាប់ ភ្នំពេញ ប៉ុស្តិ៍ថា មិនា ធ្លាប់មានបញ្ហាជំងឺរលាកស្រោមខួរម្ដងរួចមកហើយកាលពីអាយុ ៧ ឆ្នាំ ហើយនាងត្រូវបានក្រុមគ្រូពេទ្យជំនាញនៅមន្ទីរពេទ្យគន្ធបុប្ផា ខេត្តសៀមរាប ធ្វើការវះកាត់បានជាសះស្បើយរហូតដល់សព្វថ្ងៃ ប៉ុន្តែក្រុមគ្រូពេទ្យក៏បានប្រាប់ឱ្យឪពុកម្ដាយនិងរូបនាងដែលជាបងៗឱ្យមានចិត្តសន្ដោសប្រណីចំពោះនាងឱ្យបានច្រើន ដោយកុំស្ដីបន្ទោស ឬធ្វើអ្វីមួយដែលធ្វើឱ្យនាងភ័យខ្លាច។
កញ្ញា សុខណា បាននិយាយថា៖ «នៅពេលនេះឪពុកម្ដាយខ្ញុំទៅធ្វើការនៅប្រទេសថៃ នៅផ្ទះមានតែខ្ញុំ និងបងស្រីម្នាក់ដែលនៅមើលថែទាំងប្អូន៧នាក់ ជំនួសឪពុកម្ដាយ។ ជាអ្វីដែលខ្ញុំនិងបងស្រី បារម្ភតាំងពីយូរមកហើយនោះ វាបានមកដល់ហើយ។ គឺប្អូនស្រីខ្ញុំ មីនា កំពុងក្លាយជាមនុស្សវិបល្លាស់ស្មារតី ដោយសារករណីរន្ទះបាញ់ ធ្វើឱ្យជំងឺចាស់របស់នាងរើឡើងវិញ»។
នាងបាននិយាយទាំងខ្សឹកខ្សួលទៀតថា៖ «នៅពេលនេះ នាងមិនស្គាល់ពួកខ្ញុំជាបងៗនិងមិនចាំទាំងឈ្មោះនាងឈ្មោះអ្វីផង។ នាងគិតតែយំ ហើយស្រែកថា ឃើញនេះ ឃើញនោះ ហើយក៏សើចតាមតែចិត្តនាងចង់។ ប៉ុន្តែគ្រូពេទ្យប្រាប់ថា នឹងខំប្រឹងប្រែងព្យាបាលនាងឱ្យអស់លទ្ធភាព»។
ករណីរន្ទះបាញ់នេះដែរ កាលពីរសៀលថ្ងៃទី ២៦ ខែ មិថុនា ឆ្នាំ ២០២២ ស្ត្រីមានផ្ទៃពោះ ៨ ខែម្នាក់ ឈ្មោះបាន លី អាយុ ៤៤ ឆ្នាំ មានលំនៅក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ ត្រូវបានរន្ទះបាញ់ ខណៈកំពុងដើររើសខ្យងតាមវាលស្រែពេលមេឃជិតភ្លៀងបណ្ដាលឱ្យដួលសន្លប់ ហើយបានស្លាប់ទាំងកូនក្នុងផ្ទៃពោះ ក្នុងពេលបញ្ជូនទៅកាន់មណ្ឌលសុខភាពទួលពង្រ ។ នេះបើតាមសម្ដី លោក ស្ដុក លីម បេក្ខជនមេឃុំទួលពង្រ មកពីគណបក្សប្រជាជនកម្ពុជា ។
បាតុភូតរន្ទះបាញ់ នៅតែបន្តកើតមានច្រើនថែមទៀតនៅក្នុងសប្ដាហ៍នេះ ជាពិសេសនៅក្នុងតំបន់វាលទំនាបកណ្ដាលនិងតំបន់ខ្ពង់រាប។នេះបើយោងតាមការព្យាករអាកាសធាតុរបស់ក្រសួងធនធានទឹក និងឧតុនិយមដែលបានចេញផ្សាយនៅព្រឹកថ្ងៃទី ២៨ ខែ មិថុនា ឆ្នាំ ២០២២។ ក្រៅពីបាតុភូតរន្ទះបាញ់ក្រសួងធនធានទឹកនៅបានព្យាករថា នឹងមានភ្លៀងធ្លាក់រាយប៉ាយគ្របដណ្ដប់លើផ្ទៃប្រទេសក្នុងកម្រិតពីមធ្យមទៅច្រើនលាយឡំនឹងខ្យល់កន្ត្រាក់បក់បោកខ្លាំង ជាពិសេសនៅតំបន់មាត់សមុទ្រ។
ការព្យាករនេះបានធ្វើឡើងក្រោយពីក្រុមមន្ត្រីជំនាញផ្នែកអាកាសធាតុបានពិនិត្យឃើញថាចាប់ពីថ្ងៃទី ២៩ ខែមិថុនា ដល់ថ្ងៃទី ៥ ខែ កក្កដា ឆ្នាំ ២០២២ ប្រទេសកម្ពុជា នឹងទទួលរងឥទ្ធិពលពីជ្រលងនៃប្រព័ន្ធសម្ពាធទាបដែលអូសបន្លាយលើភាគខាងជើងប្រទេសថៃ ឡាវ និង វៀតណាម ដោយភ្ជាប់ទៅនឹងសម្ពាធទាបមួយនៅសមុទ្រចិនខាងត្បូង។ សម្ពាធទាបនេះនឹងវិវត្តខ្លួនជាបន្តបន្ទាប់ទៅជាព្យុះទី៣ ដោយមានដំណើរឆ្ពោះទៅកាន់កោះហៃណាំ៕