.jpg)
ពលរដ្ឋទទួលបានកូនឈើ ដែលអាជ្ញាធរជាតិអប្សរាផ្តល់ជូន នៅខេត្តសៀមរាប។ រូបថត អាជ្ញាធរជាតិអប្សរា
សៀមរាបៈ អាជ្ញាធរជាតិអប្សរាបានប្រគេន ចែកជូន ដើមឈើប្រណីត ដើមផ្កាព្រៃ និងឈើហូបផ្លែផ្សេងៗ ជាង ១ ម៉ឺនដើម ចាប់ពីថ្ងៃទី ១-២៤ ខែមិថុនា និងកំពុងបន្តចែកជូនបន្ថែមទៀត រហូតដល់ជាង ១០ ម៉ឺនដើម ក្នុងឆ្នាំ ២០២២ នេះ ដើម្បីបង្កើតគម្របព្រៃឈើនៅតំបន់អង្គរនិង ក្រៅតំបន់អង្គរផងដែរ។
លោកឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរាប្រាប់ ភ្នំពេញ ប៉ុស្តិ៍ នៅថ្ងៃទី ២៨ មិថុនាថា ដើមឈើជាង ១ ម៉ឺនដើមនេះ ត្រូវបានអាជ្ញាធរធ្វើការចែកជូនជាបន្តបន្ទាប់ ចាប់ពីថ្ងៃទី ១ ដល់ថ្ងៃទី ២៤ ខែមិថុនា និងកំពុងបន្តចែកជូនបន្ថែមទៀតផងដែរ ដែលអាចចែករហូតដល់ជាង ១០ ម៉ឺនដើម ក្នុងឆ្នាំ ២០២២ នេះ។
លោកបញ្ជាក់ថា នៅខែមុនៗ អាជ្ញាធរជាតិអប្សរា ក៏បានធ្វើការប្រគេនចែកជូនដើមឈើទៅតាមវត្តអារាម សាលារៀន ប្រជាពលរដ្ឋផងដែរ ប៉ុន្តែមិនអាចកំណត់ចំនួនបានទេ ដោយសារមិនទាន់ធ្វើការបូកសរុបរួមនៅឡើយ។
លោកថ្លែងថា៖ «គេយកទៅដាំនៅតាមវត្តអារាម សាលារៀន មន្ទីរពេទ្យ និងទៅតាមដីឯកជនរបស់គេ។ អ្វីដែលសំខាន់ គឺយើងចង់បង្កើតគម្របព្រៃឈើ ទោះបីជាគាត់យកទៅដាំលើដីផ្ទាល់ខ្លួនរបស់គាត់ក៏ដោយ»។
អ្នកនាំពាក្យអាជ្ញាធរជាតិអប្សរាឱ្យដឹងថា ការចែកជូនដើមឈើនេះទៀតសោត អាជ្ញាធរជាតិអប្សរា ក៏ត្រូវធ្វើការចុះទៅពិនិត្យមើលទីតាំង និងតាមដានចំពោះការទទួលខុសត្រូវរបស់អ្នកដាំទាំងអស់ និងឱ្យពួកគាត់មានការទទួលខុសត្រូវធ្វើរបាយការណ៍ត្រឡប់មកវិញដើម្បីអាជ្ញាធរជាតិអប្សរាអាចដឹងថា ដើមឈើទាំងនោះដុះលូតលាស់បានល្អ ឬមួយយ៉ាងណា។ ការផ្តល់ជូនដើមឈើនេះមិនត្រឹមតែដើម្បីបង្កើតគម្របព្រៃឈើនៅតំបន់អង្គរនោះទេ គឺថែមទាំងដើម្បីប្រយោជន៍ប្រជាពលរដ្ឋ ក្នុងការអាស្រ័យផល អាចរកចំណូលបន្ថែមបាន ពីអនុផលព្រៃឈើផ្សេងៗ ផងដែរ។
លោកថ្លែងថា៖ «នៅតាមរដូវកាលយើងឃើញមានបងប្អូនប្រជាពលរដ្ឋយើងលក់ផ្លែឈើតាមរដូវកាល មានសេមាន់ មានគុយ ផ្លែភ្ញៀវ។ល។ និង។ល។ អ៊ីចឹងគាត់ប្រមូលអនុផលពីដើមឈើទាំងនោះនៅក្នុងព្រៃ យកមកលក់ជូនបងប្អូនយើងជាភ្ញៀវទេសចរ ដែលធ្វើដំណើរហ្នឹងទៅ។ នេះជាយុទ្ធសាស្ត្រមួយដែលយើងប្រើ គឺ យកស្លឹកត្នោតខ្ចប់ស្ករត្នោត»។
លោក ឡុង កុសល បញ្ជា់ថា យុទ្ធសាស្ត្រយកស្លឹកត្នោត ខ្ចប់ស្ករត្នោត នៅទីនេះ មានន័យថា ឱ្យប្រជាពលរដ្ឋចេះទៅរកអនុផលព្រៃឈើទាំងនោះដោយខ្លួនឯង ដើម្បីជាប្រាក់ចំណូល។ បន្ទាប់ពីពួកគាត់បានទទួលប្រាក់ចំណូលចេញពីប្រភពនោះហើយ គាត់នឹងចេះជួយថែរក្សាការពារផងដែរ។
ជាមួយគ្នានោះលោកបានអំពាវនាវឱ្យមានការចូលរួមថែរក្សាការពារព្រៃឈើនៅតំបន់អង្គរទាំងអស់គ្នា ព្រោះព្រៃឈើមានគុណប្រយោជន៍ច្រើន ហើយថែមទាំងជួយដល់ការកាត់បន្ថយខ្យល់កុំឱ្យមានការប៉ះពាល់ខ្លាំងទៅលើប្រាង្គប្រាសាទផងដែរ។
លោកថ្លែងថា៖ «សូមឱ្យបងប្អូនយើងចេះស្រឡាញ់ថែរក្សាព្រៃឈើ កុំទៅបំផ្លិចបំផ្លាញព្រៃឈើធ្វើអី ព្រោះព្រៃឈើវាជាផ្នែកមួយនៃរមណីយដ្ឋានអង្គរ។ ព្រៃឈើក៏ជួយជាប្រភពទាក់ទាញនូវទឹក ហើយក៏ជួយកាត់បន្ថយខ្យល់កុំឱ្យប៉ះពាល់ប្រាសាទផងដែរ»។
អាជ្ញាធរជាតិអប្សរាឱ្យដឹងថា ក្នុងរយៈពេលចុងក្រោយនេះបានប្រគេនកូនឈើដល់ព្រះសង្ឃបារហេ ឆោម សារិន ព្រះចៅអធិការវត្តសុវណ្ណារាម ហៅវត្តតាម៉ូតមានជ័យ ចំនួន ១ ០០០ ដើម ដើម្បីយកទៅដាំលម្អក្នុងបរិវេណវត្តសុវណ្ណារាម និងសាលាបឋមសិក្សាតាម៉ូតមានជ័យ ស្ថិតក្នុងភូមិតាម៉ូតមានជ័យ ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ។ កូនឈើទាំងនោះរួមមាន គ្រញូង ២០០ ដើម ធ្នង់ ៣០០ ដើម បេង ២០០ ដើម គគីរ ២០០ ដើម និងក្ងោកធំ ១០០ ដើម។
ជាមួយគ្នានោះក៏បានផ្តល់កូនឈើជូនលោក ឈិន តៃឈាង នាយកវិទ្យាល័យសម្តេចឪ ចំនួន ៥៤០ ដើម ដើម្បីយកទៅដាំលម្អក្នុងបរិវេណវិទ្យាល័យនេះ ស្ថិតនៅភូមិថ្នល់ សង្កាត់ស្រងែ ក្រុងសៀមរាប ខេត្តសៀមរាប។ កូនឈើទាំងនោះរួមមាន ថ្កុល ១០០ ដើម ត្របែកព្រៃ ៦០ ដើម ឥន្ទនេល ៦០ ដើម ក្ងោកតូច ១០០ ដើម ក្ងោកធំ ១០០ ដើម ជើងគោ ៦០ ដើម និងស្រឡៅ ៦០ ដើម។
បន្ថែមលើនោះ ក៏មានការផ្តល់កូនឈើជូនលោកហឿង ហួត នាយកសាលាបឋមសិក្សា សៀង ណាំ សណ្តាន់ ចំនួន ៥៥០ ដើម ដើម្បីយកទៅដាំលម្អក្នុងបរិវេណសាលារៀននេះ ស្ថិតនៅភូមិសណ្តាន់ សង្កាត់ទឹកវិល ក្រុងសៀមរាប ខេត្តសៀមរាប។ កូនឈើទាំងនោះ រួមមាន គ្រញូង ១៥០ ដើម ធ្នង់ ១៥០ ដើម បេង ១០០ ដើម ជើងគោ ៥០ ដើម និងរំដួល ១០០ ដើមផងដែរ៕
