.jpg)
កម្មករចេញពីធ្វើការនៅរោងចក្រកាត់ដេរក្នុងខណ្ឌពោធិ៍សែនជ័យ កាលពីខែមីនា ឆ្នាំ ២០២១។ ហេង ជីវ័ន
ភ្នំពេញៈ ការចរចាប្រាក់ឈ្នួលអប្បបរមាសម្រាប់ឆ្នាំ ២០២៣ ផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប នឹងចាប់ផ្តើមធ្វើពីខែកក្កដាតទៅ ដោយភាគីសហជីពនិងកម្មកររំពឹងថា ប្រាក់ឈ្នួលសម្រាប់ឆ្នាំក្រោយ នឹងទទួលបានចំនួនច្រើនជាងឆ្នាំ ២០២២ នេះ ខណៈទំនិញនិងការចំណាយផ្សេងៗកំពុងហក់ឡើងថ្លៃខ្ពស់។
ក្រសួងការងារនិងបណ្តុះបណ្តាលវិជ្ជាជីវៈ បានជូនដំណឹងកំណត់ពីកាលបរិច្ឆេទនៃដំណើរការចាប់ផ្តើមការចរចាប្រាក់ឈ្នួលអប្បបរមា សម្រាប់ឆ្នាំ ២០២៣ ដោយត្រូវចាប់ផ្តើមនៅក្នុងខែកក្កដា ដែលជាការចាប់ផ្តើមពិភាក្សា ជាលក្ខណៈផ្ទៃក្នុង របស់ភាគីនីមួយៗ។
នៅក្នុងខែសីហា ជាការចាប់ផ្តើមពិភាក្សា ជាលក្ខណៈទ្វេភាគី និងត្រីភាគី ហើយខែកញ្ញា នឹងធ្វើការបើកកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា ដើម្បីសម្រេចប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប សម្រាប់ឆ្នាំ ២០២៣។
ក្រសួងបានបញ្ជាក់ថា៖ «នៅថ្ងៃទី ១ ខែ មករា ឆ្នាំ ២០២៣ ក្រសួងការងារ នឹងដាក់ជាកាលបរិច្ឆេទចូលជាធរមានប្រាក់ឈ្នួលអប្បបរមាសម្រាប់កម្មករ និយោជិត ផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប»។
លោក អាត់ ធន់ ប្រធានសហភាពការងារកម្ពុជា បានប្រាប់ ភ្នំពេញ ប៉ុស្តិ៍ថា សហជីពរបស់លោកនឹងធ្វើការប្រជុំផ្សព្វផ្សាយពីលទ្ធផលនៃការសិក្សាស្រាវជ្រាវពីតម្រូវការរស់នៅរបស់កម្មករនៅថ្ងៃទី ៣០ ខែមិថុនា រួចនឹងធ្វើការបូកជាមួយនឹងលក្ខណៈវិនិច្ឆ័យចំនួន ៧ ចំណុចបន្ថែមទៀត ដើម្បីសរុបធ្វើសំណើលើការចរចាប្រាក់ឈ្នួលនេះ។ សហភាពការងារកម្ពុជា ក៏នឹងធ្វើការប្រជុំជាមួយនឹងដៃគូ អង្គការ សហជីពនៅថ្ងៃបន្តបន្ទាប់ក្នុងខែកក្កដាផងដែរ។
លោក អាត់ ធន់ ថ្លែងថា ឆ្នាំនេះការចរចាប្រាក់ឈ្នួល នឹងមានឱកាសច្រើនជាងឆ្នាំមុនៗដោយសារតែកូវីដមិនមានបញ្ហាធ្ងន់ធ្ងរ ការនាំចេញសម្ភារ-អីវ៉ាន់ឆ្នាំនេះមានច្រើនជាងឆ្នាំ ២០១៩ ទៅទៀត ដោយមិននិយាយពីឆ្នាំ ២០២០ និង ២០២១ ដែលមានតិចបំផុត។
លោកបានបញ្ជាក់ទៀតថា៖ «ជារួម ចំណុចសំខាន់ៗដែលខ្ញុំគិតថា ប្រាក់ឈ្នួលអប្បរមារបស់កម្មករសម្រាប់ឆ្នាំ ២០២៣ ទទួលបានច្រើន គឺទី១ វិស័យនេះមានសក្តានុពល ទី២ជាឆ្នាំនៃការបោះឆ្នោតជាតិ ចូលមកដល់ដែលអាចធ្វើឱ្យអ្នកនយោបាយ មានការគិតគូរដល់កម្មករ ហើយចំណុចទី៣ គឺការចំណាយរបស់កម្មករពេលនេះខ្ពស់ ដោយសារទំនិញលើទីផ្សារកើនឡើងខ្ពស់»។
លោក អាត់ ធន់ បានបញ្ជាក់ថា បើយោងតាមការស្រាវជ្រាវជាបឋម ការចំណាយរបស់កម្មករជាមធ្យមចន្លោះពី ២៥០ ដុល្លារ ទៅ ៣០០ ដុល្លារ ក្នុង ១ ខែ។ ដូចនេះ តួលេខដែលសហជីពអាចនឹងស្នើសម្រាប់ធ្វើការដំឡើងជូនកម្មករផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប សម្រាប់ឆ្នាំ ២០២៣ គឺអាចក្នុងរង្វង់ ២០ ដុល្លារ។
ចំណែកលោក ហ្វា សាលី ប្រធានសម្ព័ន្ធសហជីពជាតិ ក៏បានលើកឡើងដែរថា ក្រុមសហជីពមិនទាន់កំណត់ពេលវេលាច្បាស់លាស់ណាមួយ ដើម្បីធ្វើការជួបជុំពិភាក្សានៅឡើយទេ ប៉ុន្តែលោកសង្ឃឹមថា ភាគីសហជីពនឹងមានការជួបគ្នាក្នុងពេលឆាប់ៗនេះ យ៉ាងហោចណាស់ពិភាក្សាគ្នាឱ្យបាន២ដងដែរក្នុងការចាប់ផ្តើមដំបូងនេះ។
លោកបានថ្លែងថា៖ «សម្រាប់ការរំពឹងរបស់យើង គឺយើងមានសុទិដ្ឋិនិយមថា ប្រាក់ឈ្នួលឆ្នាំ ២០២៣ នឹងមានការដំឡើងខ្ពស់ដោយសារអតិផរណានិងកំណើនសេដ្ឋកិច្ចរបស់យើង ក៏នឹងកើនខ្ពស់។ អ៊ីចឹង ខ្ញុំយល់ថា វានឹងល្អប្រសើរ សម្រាប់កម្មករផងដែរ ក្នុងការទទួលបានប្រាក់ឈ្នួលខ្ពស់ជាងឆ្នាំ ២០២២»។
សម្រាប់លោក ហ្វា សាលី មានការរំពឹងថា ប្រាក់ឈ្នួលអប្បរមារបស់កម្មករផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប នៅឆ្នាំ ២០២៣ នឹងដំឡើងមិនតិចជាង១០ដុល្លារឬលើសនេះ។
យោងតាមក្រសួងការងារ គ្រប់ភាគីទាំងអស់តម្រូវឱ្យប្រើប្រាស់ទិន្នន័យផ្លូវការស្របច្បាប់ និងការស្រាវជ្រាវបែបវិទ្យាសាស្ត្រ ដោយយោងលើលក្ខណៈវិនិច្ឆ័យបែបសង្គម និងលក្ខណៈវិនិច្ឆ័យ បែបសេដ្ឋកិច្ច។
លក្ខណៈវិនិច្ឆ័យបែបសង្គម រួមមាន ស្ថានភាពគ្រួសារ អាត្រាអតិផរណា និងការចំណាយក្នុងការរស់នៅ។ ចំណែកលក្ខណៈវិនិច្ឆ័យ បែបសេដ្ឋកិច្ច មានផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យឯកជន ដូចមានកំណត់ក្នុងមាត្រា ៥ នៃច្បាប់ស្តីពីប្រាក់ឈ្នួលអប្បបរមា ដើម្បីធ្វើជាមូលដ្ឋានក្នុងការពិភាក្សា សម្របសម្រួលផ្ទៃក្នុង និងទទួលបានគោលជំហររួមមួយ។
លោក សំ ចិន្តា កម្មកររោងចក្រយូលី ក្នុងខេត្តស្វាយរៀងបានប្រាប់ថា បច្ចុប្បន្នប្រាក់ឈ្នួលកម្មករនៅមានកម្រិតទាប ដែលធ្វើឱ្យកម្មករនៅមានការពិបាក ក្នុងជីវភាពប្រចាំថ្ងៃ ខណៈដែលតម្លៃទំនិញលើទីផ្សារកាន់តែកើនឡើងខ្ពស់។
លោកថា សម្រាប់ប្រាក់ឈ្នួលឆ្នាំ ២០២៣ របស់កម្មករ នឹងមានការកើនឡើងជាងឆ្នាំ ២០២២ ដោយលោកសង្ឃឹមថា ទាំងរាជរដ្ឋាភិបាល ក្រសួងការងារ និយោជក សហជីព រួមនឹងអង្គការពាក់ព័ន្ធនឹងយល់ពីបញ្ហារបស់កម្មករ។
លោក សំ ចិន្តា បានប្រាប់ថា៖ «ខ្ញុំចង់បានឱ្យមានការដំឡើង ២០ ដុល្លារបន្ថែមទៀត ទើបអាចជួយយើងឱ្យការរស់នៅស្រួលជាងនេះ និងអាចទប់ទល់តម្លៃទំនិញនិងថ្លៃបន្ទប់ជួលបាន»។
ចំណែក អ្នកស្រី ប៊ូ សុគន្ធាវី កម្មការិនីនៅរោងចក្រស៊ីនយីងវៃ នៅក្នុងស្រុកពញាឮ ខេត្តកណ្តាល ក៏មានការរំពឹងថា ប្រាក់ឈ្នួលនឹងអាចកើនឡើងខ្ពស់ជាងឆ្នាំ ២០២២ ផងដែរ។
អ្នកស្រីថា៖ «ខ្ញុំចង់បានច្រើន តែមិនទាន់ហ៊ានថាប៉ុន្មានទេ ចាំមើលការចរចា និងការសម្រេចរបស់ភាគីកម្មករដែលជាក្រុមសហជីពធ្វើការលើរឿងនេះ ដោយសារពួកគាត់តែងតែទាមទារនូវចំនួនច្រើនសម្រាប់ពួកយើងជាកម្មករ»។
គួររំឭកផងដែរថា ប្រាក់ឈ្នួលផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ក្នុងឆ្នាំ ២០២២ ត្រូវបានដំឡើងចំនួន ២ ដុល្លារ និងមានការជួយបន្ថែមពីរាជរដ្ឋាភិបាលចំនួន ២ ដុល្លារទៀត ដែលធ្វើឱ្យប្រាក់ឈ្នួលគោលទាបបំផុតរបស់កម្មករនិយោជិត ឡើងដល់ ១៩៤ ដុល្លារ ក្នុង ១ ខែ៕
