.jpg)
លោក កឹម សុខា លើកដៃទៅកាន់អ្នកគាំទ្រ ពេលចាកចេញពីសាលាដំបូងរាជធានីភ្នំពេញ កាលពីខែមីនា ឆ្នាំ ២០២២។ ហុង មិនា
ភ្នំពេញៈ ក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញបានសម្រេចមិនធ្វើការចាប់ឃុំលោក កឹម សុខា នៅពន្ធនាគារទៅតាមការស្នើសុំរបស់តំណាងអយ្យការនោះឡើយ ប៉ុន្តែក្រុមប្រឹក្សាជំនុំជម្រះបានធ្វើការព្រមានប្រធានអតីតគណបក្សសង្គ្រោះជាតិរូបនេះ កុំឱ្យធ្វើការជួបជុំជាមួយប្រជាពលរដ្ឋ ឬអ្នកគាំទ្រជាបន្តទៀត ពីព្រោះតុលាការចាត់ទុកការជួបជាមួយប្រជាពលរដ្ឋ និងអ្នកគាំទ្ររបស់លោក កឹម សុខា ថា ជាសកម្មភាពនយោបាយ។
ការសម្រេចនេះបានធ្វើឡើងនៅក្នុងសវនាការលើកទី ៤៦ នៅព្រឹកថ្ងៃទី ២៩ ខែមិថុនា។
លោក ផែង ហេង សហមេធាវី លោក កឹម សុខា ប្រាប់ក្រុមអ្នកសារព័ត៌មាននៅខាងមុខសាលាដំបូងរាជធានីភ្នំពេញ ក្រោយបញ្ចប់សវនាការនៅថ្ងៃទី ២៩ មិថុនា ថា ក្រុមប្រឹក្សាជំនុំជម្រះ ក្រោយពីជំនុំគ្នាអស់រយៈពេលប្រមាណ ២០ នាទីបានសម្រេច បដិសេធសំណើរបស់តំណាងអយ្យការ ដែលបានស្នើសុំឱ្យក្រុមប្រឹក្សាសម្រេចចាប់ខ្លួនលោក កឹម សុខា បញ្ជូនទៅឃុំខ្លួននៅពន្ធនាគារវិញ ដោយយល់ថា សកម្មភាព រូបថត និងខ្សែអាត់សំឡេងរបស់លោក កឹម សុខា ដែលបានជួបជាមួយប្រជាពលរដ្ឋ និងអ្នកគាំទ្រអតីតគណបក្សសង្គ្រោះជាតិជាបន្តបន្ទាប់នាពេលកន្លងមក ជាសកម្មភាពនយោបាយ ដែលបំពានដីកាសម្រេចរបស់តុលាការ។
លោក ផែង ហេង បញ្ជាក់ថា សហមេធាវីរបស់លោក កឹម សុខា បានធ្វើសេចក្តីសន្និដ្ឋានថា ទាំងនោះមិនមែនជារឿងបំពានដីកាសម្រេចរបស់តុលាការ ឬក៏សាលដីការបស់តុលាការកំពូលនោះទេ។ សកម្មភាពលោក កឹម សុខា គ្រាន់តែទៅធ្វើបុណ្យទាន ថ្វាយបង្គំព្រះសង្ឃ ជួបប្រជាពលរដ្ឋ ឬក៏ជួបអតីតសកម្មជនគណបក្សពី ៤ ទៅ ១០ ឬ ២០ នាក់ ជាការនឹករឭក និងពេលខ្លះទៅហូបបាយនៅផ្ទះរបស់ប្រជាពលរដ្ឋជារឿងធម្មតាប៉ុណ្ណោះ។
លោកបន្តថា ជាមួយគ្នានេះ លោក កឹម សុខា ប្រាប់ថា លោកក៏គ្មានសិទ្ធិធ្វើនយោបាយទេ និងប្រាប់ទៅប្រជាពលរដ្ឋ និងអ្នកគាំទ្ររបស់លោកថា អ្វីដែលលោកចុះមកនេះគ្រាន់តែធ្វើសកម្មភាពបុណ្យទាន និងសង្គមកិច្ចប៉ុណ្ណោះ។ ដូច្នេះបានចុងក្រោយ តុលាការមិនសម្រេចតាមការស្នើសុំឃុំខ្លួនរបស់តំណាងអយ្យការនោះទេ ហើយទទួលយកសំណើរបស់សហមេធាវីរបស់លោក កឹម សុខា។ លោកបញ្ជាក់ថា៖ «ជាមួយគ្នានេះ តុលាការបានចេញសេចក្តីសម្រេចក្នុងនេះដែរ ត្រឹមកម្រិតព្រមានដោយឱ្យក្រឡាបញ្ជីចុះក្នុងសៀវភៅកំណត់ហេតុនៃសវនាការមិនឱ្យឯកឧត្តម កឹម សុខា ធ្វើសកម្មភាពដទៃទៀតដែលនាំឱ្យបំពានទៅលើដីកាសម្រេចរបស់តុលាការ។ តុលាការយល់ថា សកម្មភាពមួយចំនួនរបស់ឯកឧត្តម កឹម សុខា អាចជារូបភាពសកម្មភាពនយោបាយ»។
បើតាមលោក ផែង ហេង ទោះជាសេចក្តីសម្រេចរបស់តុលាការនេះក្រុមសហមេធាវីរបស់លោក មិនពេញចិត្តក្តី ប៉ុន្តែត្រូវតែគោរពហើយការដាក់កម្រិតត្រឹមព្រមាននេះក៏ជាការសាកល្បងមួយដែរ។
លោក យី សុខសាន្ត មន្ត្រីសមាគមការពារសិទ្ធិមនុស្សអាដហុកប្រាប់ក្រុមអ្នកសារព័ត៌មាននៅថ្ងៃទី ២៩ ខែមិថុនា ថា តាមការកត់សម្គាល់របស់លោកក្នុងនាមអង្គការសង្គមស៊ីវិល ដែលបានចូលរួមឃ្លាំមើលសវនាការលោក កឹម សុខា នេះបានចាត់ទុកថា នេះគឺជាលើកទី ១ ដែលតុលាការបានសម្រេចព្រមានលោក កឹម សុខា ពាក់ព័ន្ធទៅនឹងការមិនអនុវត្តតាមបម្រាមរបស់តុលាការ។
លោកថ្លែងថា៖ «ចៅក្រមជំនុំជម្រះសម្រេចថា សកម្មភាពលោក កឹម សុខា ទាំងអស់គឺជាសកម្មភាពនយោបាយ ក៏ប៉ុន្តែការសម្រេចនេះហាក់ប្រថុចញ៉ុចពេក គ្មានទុកពេលឱ្យសហមេធាវីសិក្សាទៅលើសំណុំរឿងបម្រាមនេះទេ»។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់ភ្នំពេញប៉ុស្តិ៍នៅថ្ងៃទី ២៩ ខែមិថុនា ក្រោយបញ្ចប់សវនាការថា តុលាការបានសម្រេចព្រមានលោក កឹម សុខា ជំនួសដោយការចាប់ខ្លួនបញ្ជូនទៅឃុំនៅក្នុងពន្ធនាគារត្រូវបានធ្វើឡើងក្នុងបន្ទប់សវនាការ និងបានចុះកំណត់ហេតុដោយមិនអនុញ្ញាតឱ្យធ្វើសកម្មភាពជួបអ្នកគាំទ្របន្តទៀតនោះទេ។
លោកថ្លែងថា៖ «តុលាការមិនអនុញ្ញាតឱ្យធ្វើសកម្មភាពបែបនេះ (ជួបអ្នកគាំទ្រ) តទៅទៀតទេ ប្រសិនបើនៅតែបន្តនឹងអនុវត្តតាមផ្លូវច្បាប់»៕
វីដេអូ៖
