ភ្នំពេញៈ ក្រសួងការងារបណ្តុះបណ្តាលវិជ្ជាជីវៈ និងក្រសួងសេដ្ឋកិច្ច និងហិរញ្ញវត្ថុ បានសម្រេចដាក់ឱ្យអនុវត្ត របបសន្តិសុខសង្គម ផ្នែកប្រាក់សោធន ចាប់ពីថ្ងៃទី ០១ ខែកក្កដា ឆ្នាំ ២០២២ តទៅសម្រាប់បុគ្គលទាំងឡាយណា ដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ។
សេចក្តីសម្រេចដាក់ឱ្យអនុវត្តនេះ ត្រូវបានចុះហត្ថលេខាដោយលោក អុិត សំហេង រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ និងលោកអូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នាថ្ងៃទី ២៨ ខែ មិថុនា ឆ្នាំ ២០២២។
ក្រសួងទាំងពីរបានបញ្ជាក់ថា៖ «ការអនុវត្តរបបសន្តិសុខសង្គមផ្នែកប្រាក់សោធន សម្រាប់បុគ្គលទាំងឡាយដែលស្ថិតក្រោមបទប្បញ្ញត្តិនៃច្បាប់ស្តីពីការងារ ដូចមានចែងក្នុងមាត្រា ៣៩ ចុះថ្ងៃទី ៤ ខែ មីនា ឆ្នាំ ២០២១ កន្លងមក»។
គួររំឭកថា លោកនាយករដ្ឋមន្ត្រី ហ៊ុន សែន បានចុះហត្ថលេខាលើអនុក្រឹត្យថ្មីដែលមាន ១០ ជំពូក និង ៤០ មាត្រាកាលពីដើមខែមីនា ក្នុងការផ្តល់ប្រាក់សោធន សម្រាប់បុគ្គលទាំងឡាយ ដែលស្ថិតក្រោមបទប្បញ្ញត្តិនៃច្បាប់ស្តីពីការងារ ដោយនាំឱ្យបុគ្គលិកក្នុងវិស័យឯកជន អាចទទួលបានអត្ថប្រយោជន៍នេះ ដូចនឹងបុគ្គលិកក្នុងវិស័យរដ្ឋដែរ។
អនុក្រឹត្យដដែលបានបញ្ជាក់ថា អនុក្រឹត្យនេះ មានវិសាលភាព អនុវត្តចំពោះបុគ្គលទាំងឡាយណា ដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ដោយរាប់បញ្ចូលទាំងបុគ្គលដែលធ្វើការចាប់ពី២ កន្លែងឡើងទៅ។
បេឡាជាតិសន្តិសុខសង្គមដែលហៅថា ប ស ស គឺជាស្ថាប័នប្រតិបត្តិករតែមួយគត់ ដែលមានសមត្ថកិច្ចក្នុងការគ្រប់គ្រង និងចាត់ចែងរបបសន្តិសុខសង្គមផ្នែកប្រាក់សោធន ដូចមានចែងក្នុងអនុក្រឹត្យនេះ។
បើយោងតាមអនុក្រឹត្យនេះ សម្រាប់រយៈពេល ៥ ឆ្នាំដំបូង ភាគទាននេះ ត្រូវកំណត់ក្នុងអត្រាស្មើនឹង ៤ភាគរយ នៃប្រាក់ឈ្នួលជាប់ភាគទាន។ ក្នុងនោះ ២ភាគរយ ជាបន្ទុកនិយោជក និង ២ភាគរយ ជាបន្ទុកកម្មករនិយោជិត។ ការបង់ភាគទានផ្នែកប្រាក់សោធនត្រូវធ្វើជាប្រចាំខែ។
អ្នកនាំពាក្យក្រសួងការងារ លោក ហេង សួរ ធ្លាប់បានប្រាប់ភ្នំពេញប៉ុស្តិ៍ នាពេលកន្លងមកថា អ្នកដែលស្ថិតក្នុងវិសាលភាពនៃច្បាប់ស្តីពីការងារទាំងអស់ នឹងត្រូវជាប់កាតព្វកិច្ចបង់ភាគទាន និងទទួលបានអត្ថប្រយោជន៍នេះ។
ទាក់ទងនឹងការសម្រេចដាក់ឱ្យអនុវត្តរបបសន្តិសុខសង្គមផ្នែកប្រាក់សោធននេះ លោក ហ្វា សាលី ប្រធានសម្ព័ន្ធសហជីពជាតិ បានថ្លែងថា លោកមិនទាន់ទទួលបានព័ត៌មានជាក់លាក់នៅឡើយទេ ថាតើការអនុវត្តនេះកម្មករនឹងទទួលបានអត្ថប្រយោជន៍កម្រិតណានោះ៕