The Phnom Penh Post Search

Search form




Logo of Phnom Penh Post newspaper Phnom Penh Post - វ៉ាក់សាំង​កូវីដ ​១៩​​ ដែល​​រដ្ឋាភិបាល​​ចិនផ្តល់​ជូន​ដល់អា​ស៊ាន​ចំនួន ​២ លាន​ដូស​​ នឹង​ត្រូវ​​ចាក់ជូន​ប្រជា​ពលរដ្ឋ​ក្នុង​ប្រទេស​មីយ៉ាន់​ម៉ា

វ៉ាក់សាំង​កូវីដ ​១៩​​ ដែល​​រដ្ឋាភិបាល​​ចិនផ្តល់​ជូន​ដល់អា​ស៊ាន​ចំនួន ​២ លាន​ដូស​​ នឹង​ត្រូវ​​ចាក់ជូន​ប្រជា​ពលរដ្ឋ​ក្នុង​ប្រទេស​មីយ៉ាន់​ម៉ា

Content image - Phnom Penh Post
លោក ប្រាក់ សុខុន (កណ្តាល) ​ក្នុង​ពេល​ទទួល​វ៉ាក់សាំង​ ២ លាន​ដូស ​នៅ​ទីក្រុង​យ៉ាំងហ្គោន នៅ​ថ្ងៃទី ៣០ ​ខែមិថុនា។ រូបថត ក្រសួងការបរទេស​

វ៉ាក់សាំង​កូវីដ ​១៩​​ ដែល​​រដ្ឋាភិបាល​​ចិនផ្តល់​ជូន​ដល់អា​ស៊ាន​ចំនួន ​២ លាន​ដូស​​ នឹង​ត្រូវ​​ចាក់ជូន​ប្រជា​ពលរដ្ឋ​ក្នុង​ប្រទេស​មីយ៉ាន់​ម៉ា

ភ្នំពេញៈ វ៉ាក់សាំង​កូវីដ ​១៩ ​​ដែល​​រដ្ឋាភិបាល​​ចិនផ្តល់​ជូន​ដល់អាស៊ាន​ចំនួន​ ២ លាន​ដូស​​ សម្រាប់​មីយ៉ាន់ម៉ា​​ នាទីក្រុង​យ៉ាំងហ្គោន នឹង​ត្រូវ​ធ្វើការ​ចាក់​ជូន​ប្រជា​ពលរដ្ឋ​ក្នុង​ប្រទេស​មីយ៉ាន់​ម៉ា ជាពិសេស​នៅ​តំបន់​ដែល​ពិបាក​ទៅ​ដល់ ក្រោម​យន្ត​ការ ៥០:៥០ នៃ​ក្របខ័ណ្ឌ​ចាក់​វ៉ាក់​សាំង​រួម​គ្នា របស់​ក្រសួង​សុខាភិបាល និង​ដៃគូ​ដែល​ត្រូវ​បាន​ផ្តួច​ផ្តើម​ឡើង​ដោយ​កម្ពុជា។​

​យោង​តាម​សេចក្តី​ប្រកាស​ព័ត៌​មាន​របស់​អាស៊ា​នបាន​ឱ្យ​ដឹង​ថា នៅថ្ងៃ​ទី ​៣០ ខែ​មិថុនា នៅ​ក្រោម​ផ្នែក​មួយ​នៃការ​អនុវត្ត​កិច្ច​ព្រម​ព្រៀង​ជាឯកច្ឆន្ទ​ ៥ ចំណុច​របស់​អាស៊ាន ដែល​បាន​អនុម័ត​ក្នុង​កិច្ច​ប្រជុំ​ប្រមុខ​ដឹក​នាំអា​ស៊ាន ​បាន​ប្រគល់​អំណោ​យ​វ៉ាក់​សាំង​បង្ការ​ជំងឺ​កូវីដ​ ១៩ របស់​រដ្ឋាភិបាល​ចិន ជូន​ដល់​អាស៊ាន​សម្រាប់​មីយ៉ាន់​ម៉ា ជូន​ដល់​ភាគីមី​យ៉ាន់ម៉ា នៅ​ទីក្រុង យ៉ាំងហ្គោន។

ពិធី​ប្រគល់​វ៉ាក់សាំង​នេះ មាន​ការ​ចូល​រួម​ពី លោក ប្រាក់ សុខុន ឧប​នាយក​រដ្ឋ​មន្ត្រី រដ្ឋមន្ត្រី​ក្រសួង​ការប​រទេស និង​សហ​ប្រតិ​បត្តិការ​អន្តរ​ជាតិ​ និង​ជា​ប្រេសិត​ពិសេស​ ប្រធាន​អាស៊ាន​ លោក ឯក​ផាប់ ផាន់​ថា​វង្ស អគ្គលេខា​ធិការ​រង​អាស៊ាន​ទទួល​បន្ទុក​សហគមន៍​សង្គម-វប្បធម៌​អាស៊ាន ​(ASCC) ​ព្រម​ទាំង លោក ឆិន ហៃ ឯក​អគ្គរដ្ឋ​ទូត​វិសា​មញ្ញ និង​ពេញ​សមត្ថ​ភាព​នៃសា​ធារណរដ្ឋ​ប្រជាមានិត​ចិន​ប្រចាំមី​យ៉ាន់​ម៉ា​។

សេចក្តី​ប្រកាស​ព័ត៌មាន​បាន​បញ្ជាក់​ថា៖ «វ៉ាក់​សាំង​ចំនួន ២ ​លាន​ដូស នឹង​ត្រូវ​ចាក់​ជូន​ប្រជាជន​ក្នុង​ប្រទេស​មីយ៉ាន់​ម៉ា ជាពិសេស​នៅ​តំបន់​ដែល​ពិបាក​ទៅ​ដល់ ក្រោម​យន្ត​ការ ៥០:៥០ នៃ​ក្របខ័ណ្ឌ​ចាក់វ៉ាក់​សាំងរួម​គ្នា របស់​ក្រសួង សុខា​ភិបាល និង​ដៃគូ​ដែល​ត្រូវ​បាន​ផ្តួច​ផ្តើម​ឡើង​ដោយ​កម្ពុជា ព្រម​ទាំង​ត្រូវ​បាន​អនុម័ត​នៅក្នុង​កិច្ច​ពិគ្រោះ​យោ​បល់ ស្តីពី​ជំនួយ​មនុស្សធម៌​របស់​អាស៊ាន​ដល់​មីយ៉ាន់​ម៉ា កាល​ពីថ្ងៃទី​ ៦ ខែ ​ឧសភា ឆ្នាំ​ ២០២២ នៅ​ភ្នំពេញ​»។

ទាក់​ទង​នឹង​​សេចក្តី​លម្អិត នៃការ​ផ្តល់​និងការ​គ្រប់​គ្រង​វ៉ាក់​សាំង​នេះនឹង​ត្រូវ​បាន​កំណត់​នៅពេល​ក្រោយ ដោយ​មជ្ឈ​មណ្ឌល​សម្រប​សម្រួល​អាស៊ាន សម្រាប់​ជំនួយ​មនុស្ស​ធម៌​និងការគ្រ​ប់គ្រង​គ្រោះម​ហន្តរាយ (AHA Centre) នៃ​លេខា​ធិការ​ដ្ឋាន អាស៊ាន ក្រសួង​សុខា​ភិបាល​មីយ៉ាន់​ម៉ា រដ្ឋាភិបាល​ចិន និង​ដៃគូពាក់​ព័ន្ធ ដោយ​គ្មាន​ភាព​លម្អៀង ព្រម​ជាមួយ​នឹង​គោល​បំណង​តែ ១ ​គត់​គឺ «មិន​ទុក​នរណា​ម្នាក់​នៅ​មីយ៉ាន់​ម៉ាចោល​នោះ​ទេ»។

នៅ​ក្នុងពិ​ធីនេះ លោក ប្រាក់ សុខុន បាន​លើក​ឡើង​ថា៖ «ជំនួយ​មនុស្សធម៌​មិន​គួរ​ត្រូវ​បាន​លាបពណ៌​អ្វីឡើយ​។ ភាគី​ពា​ក់​ព័ន្ធ​ទាំង​អស់ រួម​ទាំង​ដៃគូខាង​ក្រៅ គួរ​តែទុក​មួយ​ឡែក​នូវ​ការ​ខ្វែង​គំនិត​ផ្នែក​នយោ​បាយ ហើយ​ប្រមូល​ផ្តុំគ្នានៅ​ក្រោម​ឆត្រ​មនុស្សធម៌ ដើម្បី​កែលម្អ​ស្ថានភាព​ជាក់ស្តែ​ងបន្តិច​ម្តងៗ​»។

លោក ប្រាក់ សុខុន បាន​បន្ថែម​ថា មិន​ថា ផ្នែក​ណាមួយ​ នៃ​ប្រទេស​មីយ៉ាន់​ម៉ា នោះ​ទេ គឺសុទ្ធ​តែមាន​សារៈ​សំខាន់ ទាំង​អស់ ហើយ​អ្វី​ដែល​សំខាន់​បំផុត​ជាង​គេនោះ​គឺថា ត្រូវ​តែបោះ​ជំហាន​ដំបូង​ទៅមុខ​។

ពិធី​ប្រគល់​ជំនួយ​ជាវ៉ាក់​សាំង​នេះ គឺជា​សក្ខី​ភាពនៃ​ការ​ប្តេជ្ញាចិត្ត​រួម​របស់​អាស៊ាន​ ក្នុង​ការអនុវ​ត្តកិច្ចព្រម​ព្រៀង​ជាឯក​ច្ឆន្ទ ៥ ​ចំណុច ដោយ​មាន​ការ​គាំទ្រ​ពីដៃ​គូសន្ទនា ដូច​ជាប្រទេស​ចិន និង​ដៃគូខាង​ក្រៅដទៃ​ទៀត ដើម្បី​លើក​កម្ពស់​មជ្ឈភាព របស់​អាស៊ាន​ក្នុង​ការ​ដោះស្រាយ​បញ្ហាដែល​ជាកង្វល់​រួម​នៅក្នុង​តំបន់។ នេះ​បើតាម​ ​សេចក្តី​ប្រកាសព័ត៌​មានអា​ស៊ាន​។

គួរ​បញ្ជាក់​ថា ​មជ្ឈ​មណ្ឌល AHA និង​ក្រសួង​សុខាភិបាល​មីយ៉ាន់​ម៉ា បាន​ព្រម​ព្រៀង​គ្នាអ​នុវត្ត​ក្របខ័ណ្ឌ​ចាក់វ៉ាក់​សាំង​រួម​គ្នា​រវាង​ក្រសួង​សុខា​ភិបាល​មីយ៉ាន់ម៉ា​និង​ដៃគូ នៅតំបន់​ដែល​ពិបាក​ទៅ​ដល់។ នៅក្រោម​ក្រប​ខ័​ណ្ឌ​នេះ ក្រុម​ការងារ​ប្រតិ​បត្តិ​ដែល​មាន ៥០ ភាគ​រយ​ មក​ពីក្រសួង​សុខា​ភិបាល​មីយ៉ាន់​ម៉ា និង ៥០ ភាគ​រយ​ទៀត​មក​ពីដៃ​គូប្រតិ​បត្តិ នឹង​ត្រូវ​បញ្ជូន​ទៅ​ផ្តល់​វ៉ាក់សាំង​នៅស​ហគមន៍​ដែល​ត្រូវ​ការ​ចាំបាច់​។

លោក យង់ ពៅ អគ្គ​លេខាធិការ​រាជ​បណ្ឌិត្យ​សភា​កម្ពុជា បាន​ប្រាប់ ភ្នំ​ពេញ ​ប៉ុស្តិ៍​ នៅ​ថ្ងៃទី​ ៣០ ខែ​មិថុនា​ថា ការ​បំពេញ​ទស្សន​កិច្ច​របស់​ប្រេសិត​ពិសេស​អាស៊ាន​នាពេល​នេះ ជាការ​បង្ហាញ​នូវ​កិច្ច​ខិតខំ​ប្រឹងប្រែង​នូវការ​ព្រម​ព្រៀង​ជាឯក​ច្ឆន្ទ ៥​ ចំណុច​របស់​ថ្នាក់ដឹក​នាំអាស៊ាន​ផង​ដែរ​។

លោក​បាន​ថ្លែងថា៖ «ការនាំ​យកវ៉ាក់​សាំង​ចាក់ជូន​ប្រជាពលរដ្ឋ​ក្នុង​ប្រទេស​ភូមា ដោយ​មិន​មាន​ការ​ប្រកា​ន់នូវ​និន្នា​ការ គឺជា​ចំណុច​ល្អមួយ ​សម្រាប់​ប្រជា​ជនភូមា​ ក្នុង​ការ​ទប់​ស្កាត់​នូវបញ្ហា​កូវីដ​នេះ​ ហើយ​ចំណុច​សំខាន់​មួយ​ទៀត ​គឺការ​អនុវត្ត​នូវ​កិច្ច​ខិតខំ​ប្រឹង​ប្រែង នូវ​ការ​ឯក​ភាព​ជាឯក​ច្ឆន្ទ ​៥ ​ចំណុច ​របស់​ថ្នាក់​ដឹកនាំ​អាស៊ាន​»។

លោក យង់ ពៅ បាន​បញ្ជាក់​ថា កម្ពុ​ជាមាន​បទ​ពិសោធ​ក្នុង​ការ​ចាក់វ៉ាក់​សាំង​កូវីដ​ ១៩​ ដែល​ដំបូង​គេ គឺ​ការចាក់​វ៉ាក់​សាំង​របស់​សាធា​រណរ​ដ្ឋប្រជាមានិ​តចិន​នេះ​តែម្តង ដែល​ដំបូង​ក៏មាន​ការ​រិះគន់​ផង​ដែរ ប៉ុន្តែ​កម្ពុជាបានជម្នះ​រហូត​ធ្វើ​ឱ្យ​កម្ពុជា​អាច​គ្រប់គ្រង​បាននូវ​ការ​ចាក់វ៉ាក់​សាំង​ ហើយ​អាចធ្វើ​ឱ្យ​កម្ពុជា​វិល​ត្រឡប់​មក​រក​ប្រក្រតី​ភាព​វិញ។

លោក​បញ្ជាក់​ថា៖ «ជារួម ខ្ញុំ​អបអរ​សាទរ នូវ​ការ​សម្រេច​ចិត្ត​របស់​ថ្នាក់​ដឹកនាំ​អាស៊ាន​ ដែល​បាន​ផ្តល់​នូវ​វ៉ាក់សាំង​ជូន​ប្រជាពលរដ្ឋ​ក្នុង​ប្រទេស​ភូមានេះ​»។​

គួរ​បញ្ជាក់​ផង​ដែរ​ថា លោក ប្រាក់ សុខុន និង​ប្រតិភូ​ជាន់ខ្ពស់ អម​ដំណើរ​ដោយ លោក ឯ​ក​ផាប់ ផាន់​ថាវង់ អគ្គ​លេខា​ធិការ​រង​អាស៊ាន ទទួល​បន្ទុក​សហគ​មន៍ សង្គម​វប្បធម៌​អាស៊ាន បានចាកចេញ​ពី​កម្ពុជា​នៅ​ថ្ងៃទី ​២៩ ខែមិថុនា ដើម្បី​បំពេញ​ទស្សនកិច្ច​លើក​ទី​២ នៅ​មីយ៉ាន់ម៉ា​រយៈពេល​ ៥​ ថ្ងៃ ពីថ្ងៃ​ទី​ ២៩ ​ខែមិថុនា​ដល់​ថ្ងៃទី​ ៣ ខែកក្កដា​។​

​ដំណើរ​ទស្សនកិច្ច​លើក​ទី​២ របស់​ប្រេសិត​ពិសេស​​របស់​ប្រធានអាស៊ាន​ទៅកាន់​មីយ៉ាន់​ម៉ា មាន​គោលបំណង​តាមដាន​វឌ្ឍនភាព​នៃ​ការអនុវត្ត​កិច្ច​ព្រម​ព្រៀង​ជា​ឯកច្ឆន្ទ​ ៥ ​ចំណុច​៕

អត្ថបទគួរចាប់អារម្មណ៍