The Phnom Penh Post Search

Search form




Logo of Phnom Penh Post newspaper Phnom Penh Post - អុកស្វាម​ និង​មជ្ឈមណ្ឌល​បុប្ផាណា​រួមគ្នា​ផលិតភាព​យន្ត​ខ្នាត​ខ្លី​ ៥ ​រឿង​ពាក់ព័ន្ធ​ខ្សែជីវិត​អំឡុង​កូវីដ

អុកស្វាម​ និង​មជ្ឈមណ្ឌល​បុប្ផាណា​រួមគ្នា​ផលិតភាព​យន្ត​ខ្នាត​ខ្លី​ ៥ ​រឿង​ពាក់ព័ន្ធ​ខ្សែជីវិត​អំឡុង​កូវីដ

Content image - Phnom Penh Post
អ្នកចូលរួម​កំពុង​ទស្សនា​ភាពយន្ត​ខ្នាត​ខ្លី​ពី​ជីវិត​អ្នក​ធ្វើការ​ក្រៅ​ប្រព័ន្ធ​អំឡុង​កូវីដ​។ ​រូប សាមាន

អុកស្វាម​ និង​មជ្ឈមណ្ឌល​បុប្ផាណា​រួមគ្នា​ផលិតភាព​យន្ត​ខ្នាត​ខ្លី​ ៥ ​រឿង​ពាក់ព័ន្ធ​ខ្សែជីវិត​អំឡុង​កូវីដ

ភ្នំពេញៈ អង្គការ​អុកស្វាម និង​មជ្ឈមណ្ឌល​បុប្ផាណា សហការ ផលិត និង​សម្ពោធ​ចាក់​បញ្ចាំង​ខ្សែភាពយន្ត​ខ្នាត​ខ្លី​ចំនួន​ ៥ ​រឿង​ពាក់ព័ន្ធ​ខ្សែជីវិត​ពិត​របស់​អ្នក​រកស៊ី​សេដ្ឋកិច្ច​ក្រៅ​ប្រព័ន្ធ ដែល​រងគ្រោះ​ក្នុង​អំឡុងពេល​រីករាលដាល​នៃ​ជំងឺ​កូវីដ​ ១៩ ដើម្បី​បញ្ជ្រាប​ការយល់ដឹង​បន្ថែម​ពី​សារៈសំខាន់​នៃ​របប​កិច្ច​គាំពារ​សង្គម​ក្នុងប្រទេស​កម្ពុជា​។

កម្មវិធី​សម្ពោធ​ខ្សែភាពយន្ត​ត្រូវបាន​ធ្វើឡើង​កាលពី​រសៀល​ថ្ងៃទី ​២៩ មិថុនា នៅ​មជ្ឈមណ្ឌល​បុប្ផាណា រាជធានី​ភ្នំពេញ ក្រោម​ប្រធានបទ​ “​ការបន្លឺឡើង​នូវ​សារៈសំខាន់​នៃ​កិច្ចគាំពារ​សង្គម សម្រាប់​ក្រុម​ងាយ​រងគ្រោះ​តាមរយៈ​ពហុប្រព័ន្ធ​ផ្សព្វផ្សាយ​ថ្មី​”​ ដោយ​មាន​ការចូលរួម​ពី​ជន​ងាយ​រងគ្រោះ​ និង​ភាគី​ពាក់ព័ន្ធ​ប្រមាណ​ ៥០ ​នាក់​។

តំណាង​អង្គការ​អុកស្វាម កញ្ញា ​ស្រី សុខា ថ្លែងថា គម្រោង​នេះ​មាន​គោលបំណង​បង្កើន​ការយល់ដឹង​របស់​សាធារណជន​អំពី​សារៈសំខាន់​នៃ​របប​កិច្ចគាំពារ​សង្គម​ក្នុងប្រទេស​កម្ពុជា សម្រាប់​ក្រុមងាយ​រងគ្រោះ​បំផុត ដោយ​រំលេច​នូវ​រឿងរ៉ាវ ដែល​មាន​ឥទ្ធិពល និង​អាច​នាំឱ្យមាន​ការផ្លាស់ប្តូរ តាមរយៈ​ពហុប្រព័ន្ធ​ផ្សព្វផ្សាយ និង​ភាពយន្ត​ឯកសារ ដើម្បី​ចូលរួម​គាំទ្រ​នូវ​សកម្មភាព និង​គោលនយោបាយ​លើ​កិច្ច​គាំពារ​សង្គម​។

កញ្ញា​រំពឹងថា តាមរយៈ​គម្រោង​នេះ​នឹង​ត្រូវបាន​ផ្សព្វផ្សាយ​បន្ថែម​ ដើម្បី​បង្កើន​ការយល់ដឹង​ដល់​សាធារណជន ជាពិសេស​បង្ហាញ​ពី​សំឡេង​របស់​ជន​ងាយ​រងគ្រោះ ដែល​ធ្វើការ​នៅ​សេដ្ឋកិច្ច​ក្រៅ​ប្រព័ន្ធ អ្នកធ្វើការ​តាម​ផ្ទះ អ្នកធ្វើការ​ក្នុង​វិស័យ​សេវា​កម្សាន្ត និស្សិត​/​យុវជន ជន​មាន​ពិការភាព និង​មនុស្ស​វ័យចាស់​ទៅ​ដល់​សាធារណជន​ដល់​ក្រសួង និង​អ្នកពាក់ព័ន្ធ​នានា​។

ជាមួយ​គ្នា​នេះ កញ្ញា​ចូលរួម​ និង​គាំទ្រ​ដល់​កិច្ចខិតខំ​ប្រឹងប្រែង​របស់​រាជរដ្ឋាភិបាល ក្នុង​អំឡុង​កូវីដ​ ១៩ ដែល​បាន​បញ្ចេញ​កញ្ចប់​សាច់ប្រាក់​ដោះស្រាយ​បញ្ហា​នានា​ជួយ​ជនរងគ្រោះ​។ កញ្ញា​ សុខា បន្ត​ជំរុញ​សកម្មភាព​ល្អ​បែបនេះ​ឱ្យ​ដំណើរការ​ទៅមុខទៀត​។

លោកស្រី​ថ្លែងថា​៖ «​ហើយ​អ្វី​ដែលជា​សំណូមពរ​ចង់ឃើញ​រដ្ឋាភិបាល​បញ្ចេញ​កញ្ចប់​ថវិកា​បន្ត​គាំទ្រ​ដល់​ក្រុម​ងាយ​រងគ្រោះ ទោះបីជា​កូវីដ​ធូរស្បើយ ប៉ុន្តែ​អត់​ទាន់​អាច​ត្រឡប់​ទៅ​ដូច​កាលពីមុន​នៅ​ឡើយ​ទេ​។ អ៊ីចឹង​ចង់ឃើញ​សកម្មភាព​ក្របខ័ណ្ឌ​កិច្ចគាំពារ​សង្គម​ដែល​រដ្ឋាភិបាល​បានធ្វើ​កន្លងមក​នៅតែ​បន្ត​»​។

ពលរដ្ឋ​រស់នៅ​ខេត្តរតនគិរី អ្នកស្រី​ វ៉ាន់ ផល្លា អាយុ​ ២២ ​ឆ្នាំ ដែល​បាន​ចូលរួម​ក្នុង​កម្មវិធី​នោះ​និយាយថា អំឡុង​កូវីដ​ ១៩ ពិតជា​បាន​ធ្វើឱ្យ​ប៉ះពាល់​ដល់​ជីវភាព​គ្រួសារ​ខ្លាំង​។ ប៉ុន្តែ​ដោយសារ​មាន​បណ្ណ​សមធម៌​ជា​ជំនួយ​ពី​រាជរដ្ឋាភិបាល​បាន​ជួយ​ដល់​គាត់​ក្នុង​ការដោះស្រាយ​ជីវភាព​ប្រចាំថ្ងៃ​។

អ្នកស្រី​និយាយ​ថា​៖ «​គ្រួសារ​ខ្ញុំ​ជា​កសិករ មាន​កូន​ ២ អំឡុង​កូវីដ​ ១៩​។ ខ្ញុំ​បានទទួល​ជំនួយ​ពី​រដ្ឋាភិបាល​មាន​បណ្ណ​សមធម៌ ១ ​ខែ ទទួលបាន​ប្រាក់​ ១៧​ ម៉ឺន​រៀល​។ ខ្ញុំ​អរគុណ​ដល់​រដ្ឋាភិបាល ដែល​បាន​គិតគូរ​ដល់​ពលរដ្ឋ​ និង​សំណូមពរ​ជួយ​បន្តទៀត ព្រោះ​ជា​ផ្នែក​មួយ​ជួយ​ទ្រទ្រង់​ជីវភាព ធ្វើឱ្យ​ខ្ញុំ​មាន​ឱកាស​បញ្ជូន​កូន​ទៅ​សិក្សា​»​។

ពលរដ្ឋ​ម្នាក់ទៀត​មាន​ស្រុកកំណើត​នៅ​ខេត្តស្វាយរៀង ប៉ុន្តែ​ប្រកបរបរ​លក់​នំគូឆាយ​នៅ​តាមផ្លូវ​នៅ​រាជធានី​ភ្នំពេញ លោកពូ ពយ មានកូន​ ៤ ​នាក់​បានឱ្យ​ដឹងថា មុន​កូវីដ​ ១៩ លក់​នំ​បាន​ ១​ ថ្ងៃ ២០០​ នំ ក្នុង​ ១ ​នំ តម្លៃ​ ១​ ពាន់​រៀល​។ ប៉ុន្តែ​ពេល​ចាប់ផ្តើម​មាន​កូវីដ លោក​បាន​ផ្អាក​លក់​រយៈពេល​ប្រមាណ ​១​ ឆ្នាំ ហើយ​វិល​ទៅ​រស់​នៅឯ​ស្រុក​បណ្តោះអាសន្ន​។ លោក​ថា អំឡុងពេល​ផ្អាក​លក់​នំ​នោះ លោក​មិន​ទទួល​បាន​ជំនួយ​សង្គម​នោះទេ ដោយសារ​មិនមាន​បណ្ណសមធម៌ ដោយ​លោក​ថា​មិនបាន​ដឹង​អ្វី​ទៅជា​បណ្ណ​សមធម៌ ហើយ​គេ​ធ្វើ​របៀប​ណា​នោះទេ​។

លោក​ អាត់ ធន់ ប្រធាន​សហភាព​ការងារ​កម្ពុជា​ថ្លែងថា បច្ចុប្បន្ន​លោក​កំពុង​សហការ​ជាមួយ​អង្គការ​សង្គម​ស៊ីវិល​ និង​ស្ថាប័ន​រដ្ឋាភិបាល​ក្នុង​ការ​ពង្រឹង​ផ្នែក​សន្តិសុខ​សង្គម សម្រាប់​ប្រទេស​កម្ពុជា ដើម្បី​ជួយ​ជំរុញ​ឱ្យមាន​ការលើក​កម្ពស់​សិទ្ធិ​ទៅដល់​កម្មករ​និយោជិត ក៏ដូចជា​ប្រជាពលរដ្ឋ​ និង​អ្នករកស៊ី ក្រៅ​ប្រព័ន្ធ ដើម្បី​ទទួលបាន​ទាំង​មូលនិធិ​សមធម៌​ និង​របប​សន្តិសុខ​សង្គម​។ ទោះ​យ៉ាងណា លោក​ថា​ក្នុង​រយៈពេល​ ៦​ ឆ្នាំ​ចុងក្រោយ​នេះ រដ្ឋាភិបាល​កម្ពុជា​មាន​ការវិវឌ្ឍ​ច្រើន​ទៅលើ​ផ្នែក​សន្តិសុខ​សង្គម​។

លោក​បាន​បញ្ជាក់ថា​៖ «​សម្រាប់​រយៈពេល​ ៥ ទៅ ៦ ​ឆ្នាំ​ចុងក្រោយ​នេះ​ឃើញ​រដ្ឋាភិបាល​បាន​យកចិត្ត​ទុកដាក់​ផ្នែក​សន្តិសុខ​សង្គម​ច្រើន​។ បើ​ប្រៀបធៀប ​២០​ ឆ្នាំមុន យើង​សឹងតែ​ស្មើ​សូន្យ ប៉ុន្តែ​រយៈល​ចុងក្រោយ​នេះ មាន​ការវិវឌ្ឍ​ច្រើន​»​។

រដ្ឋមន្ត្រី​ក្រសួង​សង្គមកិច្ច អតីតយុទ្ធជន និង​យុវនីតិសម្បទា លោក​ វង សូត ធ្លាប់បាន​ឱ្យ​ដឹងថា ឆ្លើយតប​នឹង «​ក្របខ័ណ្ឌ​គោលនយោបាយ​ជាតិ​គាំពារ​សង្គម ២០១៦-២០២៥» ក៏ដូចជា​បរិការណ៍​ពិភពលោក​នៃ​ការរីករាលដាល​នៃ​ជំងឺ​កូវីដ​ ១៩ ប្រទេស​កម្ពុជា​ក៏បាន​ទទួល​រង​ផលប៉ះពាល់​ដល់​វិស័យ​មួយ​ចំនួន​ផងដែរ​។

លោក​បាន​បញ្ជាក់ថា​៖ «​ដូច្នេះ​ហើយ រាជរដ្ឋាភិបាល​បាន​សម្រេច​ដាក់ចេញ​នូវ​កម្មវិធី​ឧបត្ថម្ភ​សាច់ប្រាក់​ចំនួន​ ៣ ជូន​ប្រជាជន​ក្នុង​គោលបំណង​លើកកម្ពស់​សុខុមាលភាព​មាតា និង​ទារក​ក្នុង​គ្រួសារ​ក្រីក្រ និង​រក្សា​លំនឹង​ជីវភាព​របស់​បងប្អូន​ប្រជាពលរដ្ឋ​ក្នុងអំឡុងពេល​ដ៏លំបាក​នេះ​។

លោក​ឱ្យដឹងថា កម្មវិធី​ឧបត្ថម្ភ​សាច់ប្រាក់​ចំនួន​ ៣ ​នោះ រួមមាន ទី​ ១ កម្មវិធី​ឧបត្ថម្ភ​សាច់ប្រាក់​ជូន​ស្ត្រី​មាន​ផ្ទៃពោះ និង​កុមារ ក្រោម​អាយុ​ ២​ ឆ្នាំ​ក្នុង​គ្រួសារ​ក្រីក្រ​។ ទី​ ២ កម្មវិធី​ឧបត្ថម្ភ​សាច់ប្រាក់​ជូន​គ្រួសារ​ក្រីក្រ និង​ងាយ​រងគ្រោះ​ក្នុង​អំឡុងពេល​ប្រយុទ្ធ​នឹង​ជំងឺ​កូវីដ​ ១៩ និង​ទី​ ៣ កម្មវិធី​ជំនួយ​សង្គម​ជា​សាច់ប្រាក់ ក្រោយពេល​បិទខ្ទប់​សម្រាប់​ប្រជាពលរដ្ឋ​ និង​គ្រួសារ​ប្រជាពលរដ្ឋ​មាន​ការលំបាក​ផ្នែក​ជីវភាព និង​គ្រួសារ​ដែលមាន​អ្នក​ឆ្លង​ជំងឺ និង​ស្លាប់ ដោយសារ​កូវីដ​ ១៩៕

អត្ថបទគួរចាប់អារម្មណ៍