.jpg)
មន្ត្រីពិនិត្យបន្លែដែលត្រូវបានដាក់តាំងនៅក្នុងពិធីថ្ងៃ ៣០ មិថុនា។ ហេង ជីវ័ន
ភ្នំពេញៈ រាជរដ្ឋាភិបាលបានដាក់ចេញនូវចក្ខុវិស័យស្តីពីប្រព័ន្ធស្បៀងប្រកបដោយចីរភាពនៅត្រឹមឆ្នាំ ២០៣០ ហើយប្រជាពលរដ្ឋកម្ពុជានឹងទទួលបានរបបអាហារសុខភាព និងអាហារប្រកបដោយសុវត្ថិភាព ដោយមានការយកចិត្តទុកដាក់ជាចម្បងលើស្ត្រី និងកុមារ។
នេះបើតាមលោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារ អភិវឌ្ឍន៍វិស័យកសិកម្ម និងជនបទ ថ្លែងក្នុងពិធីបើកទិវាសុវត្ថិភាពស្បៀងអាហារពិភពលោក ក្រោមប្រធានបទ«អាហារកាន់តែមានសុវត្ថិភាព សុខភាពកាន់តែល្អប្រសើរ» កាលពីថ្ងៃទី ៣០ មិថុនា នៅសណ្ឋាគារសូហ្វីតែលភូគីត្រាភ្នំពេញ។
លោកថ្លែងថា រាជរដ្ឋាភិបាលបានទទួលស្គាល់ថា សន្តិសុខស្បៀង និងអាហារូបត្ថម្ភ គឺជាសិទ្ធិមូលដ្ឋានរបស់បុគ្គលម្នាក់ៗ នៅក្នុងសង្គម ដូចមានចែងនៅក្នុងសេចក្តីថ្លែងការណ៍ជាសកលស្តីពីសិទ្ធិមនុស្ស និងសន្ធិសញ្ញាអន្តរជាតិស្តីពីសេដ្ឋកិច្ច សង្គម និងវប្បធម៌ ដែលកម្ពុជា បានផ្តល់សច្ចាប័ន។
លោកបន្តថា៖ «រដ្ឋាភិបាលកម្ពុជា បានដាក់ចេញនូវចក្ខុវិស័យ ស្តីពីប្រព័ន្ធស្បៀងប្រកបដោយចីរភាពនៅកម្ពុជាត្រឹមឆ្នាំ ២០៣០។ ប្រជាពលរដ្ឋកម្ពុជានឹងទទួលបានរបបអាហារសុខភាព និងអាហារប្រកបដោយសុវត្ថិភាព ដោយមានការយកចិត្តទុកដាក់ជាចម្បងលើស្ត្រី និងកុមារដើម្បីបំបែកវដ្តអន្តរជំនាន់នៃបញ្ហាអាហារូបត្ថម្ភ និងឆ្លើយតបទៅនឹងដំណើរការប្រែប្រួលអាហារូបត្ថម្ភ»។
លោក យឹម ឆៃលី បានឱ្យដឹងថា រាជរដ្ឋាភិបាលបានផ្តល់អាទិភាពខ្ពស់ និងចាត់ទុកវិស័យសន្តិសុខស្បៀង និងអាហារូបត្ថម្ភ ជាបញ្ហាអន្តរវិស័យមួយដ៏មានសារៈសំខាន់ ក្នុងការចូលរួមចំណែក ដល់ការអភិវឌ្ឍធនធានមនុស្ស សេដ្ឋកិច្ច ភាពចម្រុងចម្រើននៃសង្គមជាតិ និងសមធម៌សង្គម។
លោកថ្លែងថា៖ «សន្តិសុខស្បៀង សុវត្ថិភាពស្បៀងអាហារ និងប្រព័ន្ធស្បៀងអាហារ គឺជាបញ្ហាពហុវិស័យតម្រូវឱ្យមានកិច្ចសហការល្អ ការសម្របសម្រួល ការអន្តរាគមន៍ និងការវិនិយោគនៅក្នុងវិស័យកសិកម្ម សុខាភិបាល អប់រំ ទឹកស្អាត និងអនាម័យ គ្រប់គ្រងធនធានទឹក គាំពារសង្គម និងវិស័យពាក់ព័ន្ធនានា»។
ការសហការពីគ្រប់ភាគីពាក់ព័ន្ធទាំងស្ថាប័នរដ្ឋ ដៃគូអភិវឌ្ឍន៍ សង្គមស៊ីវិល វិស័យឯកជន សហគមន៍ យុវជន និងអ្នកសារព័ត៌មាន ដើម្បីអនុវត្តគោលនយោបាយ និងយុទ្ធសាស្ត្រតាមវិស័យ និងពហុវិស័យខាងលើ គឺជាកត្តាចាំបាច់ ដើម្បីដោះស្រាយភាពស្មុគស្មាញនៃឫសគល់បញ្ហាអាហារូបត្ថម្ភគ្រប់ទម្រង់។
បើតាមលោក យឹម ឆៃលី កន្លងមកដោយមើលឃើញពីសារៈសំខាន់ គុណតម្លៃ និងភាពចាំបាច់ក្នុងការលើកកម្ពស់សន្តិសុខស្បៀង សុវត្ថិភាពស្បៀង និងប្រព័ន្ធស្បៀងទើបរាជរដ្ឋាភិបាលតាមរយៈក្រុមប្រឹក្សាស្តារ អភិវឌ្ឍន៍វិស័យកសិកម្ម និងជនបទបានដាក់ចេញយុទ្ធសាស្ត្រជាតិស្ដីពីសន្តិសុខស្បៀង និងអាហារូបត្ថម្ភលើកទី២ ឆ្នាំ២០១៩-២០២៣ និងផែនទីបង្ហាញផ្លូវសម្រាប់ប្រព័ន្ធស្បៀងប្រកបដោយចីរភាពឆ្នាំ ២០៣០។
ក្រៅពីនេះរាជរដ្ឋាភិបាលក៏បានរៀបចំផែនការសកម្មភាព និងយុទ្ឋសាស្ត្រតាមវិស័យនានា ក្នុងគោលបំណងធ្វើការអន្តរាគមន៍ ដើម្បី «បញ្ចប់ភាពអត់ឃ្លាន សម្រេចឱ្យបានសន្តិសុខស្បៀង ធ្វើឱ្យប្រសើរឡើងស្ថានភាពអាហារូបត្ថម្ភ និងលើកកម្ពស់កសិកម្មប្រកបដោយចីរភាព» សំដៅលើកកម្ពស់មូលធនមនុស្សបង្កើនផលិតភាពការងារ និងជំរុញកំណើនសេដ្ឋកិច្ច។
លោកបញ្ជាក់ថា ការរៀបចំប្រារព្ធ ទិវាសុវត្ថិភាពស្បៀងអាហារពិភពលោកនៅថ្ងៃនេះ ធ្វើឡើងក្រោមប្រធានបទ «អាហារកាន់តែមានសុវត្ថិភាព សុខភាពកាន់តែល្អប្រសើរ» គឺស្របពេលដែលព្រះមហាក្សត្រ បានប្រកាសដាក់ឱ្យប្រើប្រាស់ ច្បាប់ស្តីពីសុវត្ថិភាពម្ហូបអាហារ កាលពីថ្ងៃទី ៨ ខែ មិថុនា ឆ្នាំ ២០២២ និងស្របតាមការប្តេជ្ញារបស់រាជរដ្ឋាភិបាល នៅក្នុងកិច្ចប្រជុំកំពូលស្តីពីអាហារូបត្ថម្ភ ដើម្បីការលូតលាស់ និងកំណើន និងក្នុងឱកាសប្រារព្ធទិវាជាតិអាហារូបត្ថម្ភឆ្នាំ ២០២១។
យោងតាមសេចក្តីប្រកាសព័ត៌មានរួម ស្ដីពីការប្រារព្ធទិវាសុវត្ថិភាពស្បៀងអាហារពិភពលោកនៅកម្ពុជា នៅថ្ងៃទី ៣០ ខែ មិថុនា ឆ្នាំ ២០២២ បានឱ្យដឹងថា ដូចគ្នានឹងមេរោគអេដស៍ ឬជំងឺគ្រុនចាញ់ដែរ ជំងឺបណ្តាលមកពីអាហារ គឺជាបញ្ហាប្រឈមសុខភាពសាធារណៈដ៏ធ្ងន់ធ្ងរមួយរបស់ពិភពលោក។ ជំងឺជាង ២០០ ប្រភេទផ្សេងគ្នា មានទំនាក់ទំនងផ្ទាល់ជាមួយការបរិភោគចំណីអាហារដែលមានផ្ទុកបាក់តេរី វីរុស ប៉ារ៉ាស៊ីត និងសារធាតុគីមីជាដើម។
កញ្ញា Rebekah Bell តំណាងអង្គការ FAO ប្រចាំកម្ពុជា បានបញ្ជាក់ថា បើអាហារគ្មានសុវត្ថិភាពទេ នោះមិនមែនជាអាហារឡើយ។ កញ្ញាបានថ្លែងថា៖ «យើងត្រូវការកិច្ចខិតខំប្រឹងប្រែងរួមមួយ ការប្ដេជ្ញាចិត្ត និងការវិនិយោគ ដើម្បីធ្វើឱ្យអាហារមានសុវត្ថិភាព និងជារបបអាហារសុខភាព មានតម្លៃសមរម្យ ដែលគ្រប់ៗគ្នាអាចទទួលបាន សម្រាប់បរិភោគ»។
កញ្ញាបន្តថា ដើម្បីសម្រេចបាននូវគោលបំណងនេះ ស្ថាប័ន្ធពាក់ព័ន្ធត្រូវរួមគ្នាធ្វើឱ្យប្រព័ន្ធស្បៀងអាហារកាន់តែមានប្រសិទ្ធភាព មានភាពធន់ និងនិរន្តរភាព នៅគ្រប់ដំណាក់កាលទាំងអស់នៃខ្សែចង្វាក់ស្បៀងអាហារ គឺចាប់ពីការផលិត និងការកែច្នៃ រហូតដល់ទីផ្សារ ការដឹកជញ្ជូន និងការចែកចាយ និងកន្លែងបរិភោគ។
លោកស្រីវេជ្ជបណ្ឌិត Asheena Khalakdina ប្រធានក្រុមកម្មវិធីគ្រោះអាសន្នសុខភាពសាធារណៈនៃអង្គការ សុខភាពពិភពលោកប្រចាំកម្ពុជា លើកឡើងថា សុវត្ថិភាពចំណីអាហារ គឺជាការទទួលខុសត្រូវរួមគ្នា។
លោកស្រីថ្លែងថា៖ «កម្ពុជានៅតែមានតម្រូវការចាំបាច់ ចំពោះការអប់រំ និងការបណ្តុះបណ្តាលស្តីពីការការពារជំងឺបង្កឡើងដោយចំណីអាហារ ក្នុងចំណោមអ្នកផលិតម្ហូបអាហារ អ្នកផ្គត់ផ្គង់ អ្នករៀបចំទុកដាក់ និងសាធារណជនទូទៅ»។
លោកស្រី Carmen Moreno ឯកអគ្គរដ្ឋទូត ប្រតិភូសហភាពអឺរ៉ុបប្រចាំនៅកម្ពុជាបានថ្លែងថា សុវត្ថិភាពស្បៀងអាហារ គឺជាគន្លឹះដើម្បីធានាបាននូវប្រព័ន្ធស្បៀងប្រកបដោយនិរន្តរភាព ហើយកិច្ចការនេះ គឺជាការងារអាទិភាព ក្នុងកិច្ចព្រមព្រៀងបៃតងអឺរ៉ុប និងយុទ្ធសាស្ត្រពីកសិដ្ឋានរហូតដល់តុអាហារ។
លោកស្រីថ្លែងថា៖ «សហភាពអឺរ៉ុបប្តេជ្ញាយ៉ាងមុតមាំ ធ្វើការជាមួយប្រទេសជាដៃគូក្នុងកិច្ចខិតខំប្រឹងប្រែងនេះ មិនសម្រាប់តែការអភិវឌ្ឍមូលធនមនុស្សប៉ុណ្ណោះទេ ប៉ុន្តែសម្រាប់ទស្សនវិស័យនៃការអភិវឌ្ឍសេដ្ឋកិច្ច ដែលសុវត្ថិភាពស្បៀងអាហារអាចជួយប្រទេសនានា ដូចជាកម្ពុជាដើម្បីបើកឱកាសពាណិជ្ជកម្មកាន់តែច្រើននៅក្នុងទីផ្សារតំបន់ និងពិភពលោក»៕
