លោកនាយករដ្ឋមន្ត្រីបានធ្វើការព្រមាន និងដាក់បទបញ្ជាឱ្យសមត្ថកិច្ចចាប់ខ្លួនដល់អ្នកទាំងឡាយណាដែលធ្វើការបំពុលសង្គមទាក់ទងនឹងករណីកូវីដ ១៩ ដោយសារវាមិនមែនបញ្ហាដែលត្រូវយកមកលេងសើចនោះឡើយ ប៉ុន្តែវាជារឿងដែលត្រូវយកចិត្តទុកដាក់និងការពារពីការរាលដាលនៃមេរោគនេះ។
លោកបានថ្លែងដូចនេះនាព្រឹកថ្ងៃទី ០១ ខែកក្កដា នេះក្នុងពិធីមច្ឆជាតិ ០១ កក្កដា ២០២២ នៅអាងត្រពាំងថ្ម ស្រុកភ្នំស្រុក ខេត្តបន្ទាយមានជ័យ ដោយលោកបានបញ្ជាក់ថា មនុស្សម្នាក់ត្រូវបានចាប់ខ្លួន បន្ទាប់ពីបុរសរូបនេះបានបង្ហោះព័ត៌មានមិនពិតទាក់ទងនឹងករណីកូវីដ ១៩។
លោកមានប្រសាសន៍ថា៖ «សុំកុំជឿលើការបំពុលទាក់ទងនឹងការចាក់វ៉ាក់សាំង ហើយយើងក៏បានចាប់ខ្លួនបានហើយដែលបានបំពុលតាមប្រព័ន្ធ Tik-Tok ដោយយករូបភាពមនុស្សស្លាប់នៅកោះកុងថាមានស្លាប់ដោយសារចាក់វ៉ាក់សាំង»។
បើតាមការលើកឡើងរបស់លោក ហ៊ុន សែន ជនដែលត្រូវបានចាប់ខ្លួននេះរស់នៅក្នុងខេត្តត្បូងឃ្មុំ ហើយបានយកករណីដែលកើតឡើងនៅក្នុងខេត្តកោះកុងមកបង្ហោះថាមានអ្នកស្លាប់ដោយសារការចាក់វ៉ាក់សាំង ខណៈដែលខេត្តកោះកុងមិនមានករណីនេះកើតឡើងឡើយ។
លោកបានថ្លែងថា៖ «វាជារឿងមិនមែនជាការលេងសើចទេ។ ខេត្តកោះកុងមិនមានអ្នកស្លាប់ដោយសារកូវីដតាំងពីខែមេសា។ ខ្ញុំសុំព្រមានទុកជាមុន អ្នកណាក៏ដោយ ដែលយករឿងកូវីដ១៩ជាការលេងសើច នឹងត្រូវចាប់ខ្លួន ដោយសារវាមិនមែនជារឿងលេងសើចទេ។ វាជាការបំពុលសង្គម»។
លោកនាយករដ្ឋមន្ត្រី ក៏បានថ្លែងផងដែរថា កម្ពុជាមិនមានអ្នកជំងឺសូម្បីតែ ០១ នាក់ ក្នុងមន្ទីរពេទ្យនៅទូទាំងប្រទេស។
លោកថា៖ «បើយើងមិនចាប់ខ្លួន មានន័យថាយើងមិនអនុវត្តច្បាប់។ ពិភពលោកកំពុងប្រឆាំងនឹងព័ត៌មានក្លែងក្លាយ ហេតុអីបានជាកម្ពុជាអនុវត្តមិនបាន។ តើវាមានប្រយោជន៍អីដែលត្រូវធ្វើដូចនេះ? បើអ្នកឯងមិនបំពុល មិនបំភ័យ មិនមួលបង្កាច់ គ្មានអ្នកណាទៅចាប់ខ្លួននោះទេ»។
លោកក៏បានបញ្ជាក់បន្ថែមថា មនុស្សចំនួន ៣ នាក់បន្ថែមទៀត ត្រូវបានរកឃើញមានវិជ្ជមានកូវីដ ១៩ នៅថ្ងៃទី ៣០ ខែមិថុនា និង ៥ នាក់នៅថ្ងៃទី ០១ ខែកក្កដា ក្នុងពិធីមច្ឆជាតិនាថ្ងៃនេះផងដែរ។
ទន្ទឹមនឹងនេះដែរ លោកនាយករដ្ឋមន្ត្រី ហ៊ុន សែន ក៏បានអំពាវនាវឱ្យប្រជាពលរដ្ឋទាំងអស់បន្តការការពារខ្លួន និងត្រូវនាំគ្នាទៅចាក់វ៉ាក់សាំងកូវីដ ១៩ ឱ្យបានគ្រប់ៗគ្នាដើម្បីការពារខ្លួនពីការឆ្លងរាលដាលជំងឺកូវីដ ១៩៕